ل ناڤبه‌را (تلیلی) یا عه‌ڤدالی و (پێدڤیه شه‌رم ژ خوه بكن)ا ڤه‌دانی
فاضل عمر
15-16ی تیرمه‌هێ، ل تركیا كۆده‌تایه‌كا له‌شكه‌ری روودا و وا دیاره سه‌رنه‌گرت. دو ره‌وشه‌نبیرێن مه، دو چریوری twitter به‌لاڤه‌كرن، ئێكی تلیلی ڤه‌دان و یێ دی ب ئه‌ره‌بی نڤێسی؛ ئه‌وێ دلخوه‌شییا خوه بۆ كۆده‌تایێن له‌شكه‌رێ تركیا دیار بكه‌ت، پێدڤیه شه‌رم ژ خوه بكه‌ت. ب دیتنا من، تلیلی و شه‌رم ژ خوه كرن یان نه‌كرن، دو هه‌لوه‌ستێن سۆزدارینه و نه‌گرێدایی هه‌لوه‌سته‌كێ سیاسی یان هزری یان ئابۆرینه، كو پێدڤیه هه‌لوه‌ستێ دروست لسه‌ر بهێته ئاڤاكرن.
من دڤێت بێژم؛ هه‌ر بویه‌ره‌كا ل پارچه‌یه‌كا كوردستانێ و دنیایێ روو بده‌ت، پێدڤیه ئه‌م باشی و خرابییێن وێ هه‌لسه‌نگینین پاشی شه‌رمه‌زار بكه‌ین یان ده‌ستخوه‌شیێ لێ بكه‌ین. له‌و، پرسیار ئه‌وه: كۆده‌تایه‌كا له‌شكه‌ری ل ده‌وله‌تا مه‌زنترین پارچه‌یه‌كا كوردستانێ لێ و ده‌رگه‌هێ هه‌رێما كوردستانێ بت بۆ رۆژاڤا و بۆڕیا نه‌فتا ئیراقێ به‌ری كوردستانێ تێڕا دبۆرت.. تشته‌كێ باشه یان خرابه؟ بۆ مه به‌ری تركیا و جیهانێ.
به‌ری هه‌ر تشتی، ئه‌ز هه‌رده‌م دبێژم: خرابترین سیسته‌م چێتره ژ بێ سیسته‌میێ، هه‌لبه‌ت بۆ كۆمه‌لی. له‌و، وه‌كو ته‌مامی بۆ ئه‌ڤێ هزرێ دێ بێژم؛ خرابترین دیمۆكراسی، (وه‌كو دیمۆكراسییا نه‌ته‌وه‌ییا تركیا) چێتره ژ ده‌ستهه‌لاتداریا له‌شكه‌ری و پستالێن جه‌ندرمه و جه‌نه‌رالان.
له‌و، ئه‌ز نه تلیلیان ڤه‌دده‌م، نه‌ژی دێ بێژمه كه‌سێ؛ شه‌رمه كه‌یفا مرۆڤی ب كۆده‌تایێ دژی حوكمه‌تا تركیا بهێت. ئه‌ز سه‌د ژ سه‌دێ نه دگه‌ل تلیلیانم، چونكی ژبلی تێكچۆنه‌كا هنده‌ك رۆژییا ره‌وشا تركیا ل ناڤ خوه و دگه‌ل جڤاكێن سڤیل، كۆده‌تایا له‌شكه‌ری هیچ مفایه‌كێ دۆمدرێژ بۆ كوردان تێدا نینه. ئانكو، بۆ ده‌مه‌كێ كورت، ره‌وشا ناڤخوه‌ییا تركیا دێ تێكچت و دێ فشار ژسه‌ر خه‌لكێ باكۆرێ كوردستانێ سڤكتر بت، چونكی ده‌وله‌تا تركان دێ مینته ب خوه‌ڤه. لێ گه‌له‌ك پێڤه ناچت، دێ سه‌رده‌مه‌كێ له‌شكه‌ری ل تركیا ده‌ست پێ كه‌ت و ئه‌ز باوه‌ر ناكه‌م گه‌له‌ك كه‌یفا ئێك جه‌ندرمه‌ی ژی ب كوردان بهێت، چونكی ئێكه‌مین كه‌سێ به‌رسینگا جه‌ندرمه‌یان گرتین و هه‌یبه‌تا وان شكاندین ترك نه‌بوون، كورد بوون. تو بێژی ئێكه‌مین كه‌سێ له‌شكه‌رێ ترك دژ راوه‌ستت دێ كی بت؟ (هه‌لبه‌ت پشتی ده‌ستهه‌لاتێ وه‌ردگرن و جهگیر دبن یان حوكمه‌ته‌كا سڤیل وه‌كو دێمجامه دادنن). بێگومان دێ كورد بن.. له‌و، تلیلی ڤه‌دان بۆ كۆده‌تایێ، پتر وه‌كو ره‌فتارا ئه‌وی كه‌سییه یێ مالا خوه ژ كه‌ربێن كێچان دا سۆتی.
ئه‌ز نه دگه‌ل كه‌كێ ڤه‌دانم ژی، كو شه‌رمه ب هه‌ر ره‌نگه‌كی ئه‌م باسێ ئێك قه‌نجییا بزاڤا كۆده‌تایێ ژی بكه‌ین! هنده‌ك تشت ل تركیا نهۆ روو دده‌ن، گه‌له‌ك خرابن و هیچ هیڤیه‌كێ بۆ كوردان ناهێلن:
پشتی ئاكپارتی پێنگاڤێن باش به‌ره‌ڤ چاره‌كرنا دۆزا كوردی ل باكۆری هاڤێژتین، ل ئه‌ڤێ دوماهیێ، پێنگاڤێن پاشڤه ب هه‌مان له‌زێ دهاڤێژت.
دووركرنا داود ئۆغلۆی ژ سه‌رۆكاتییا وه‌زیران پاشڤه‌كشانه‌كا پراكتیكیه ژ سیاسه‌تا ناڤخوه و ده‌رڤه‌یا تركیا ژ (سفر ئاڕێشه) بۆ (چێكرنا ئاڕێشه‌یان).
ئه‌ردۆغان، هه‌می شیانێن خوه و پارتا خوه بۆ سه‌نترالیزمێ بكاردئینت و ئه‌ڤه ل مه‌ودایێ دوور، دێ دكتاتۆریێ په‌یدا كه‌ت و هیچ هیڤیه‌كێ بۆ كوردان ناهێلت.
بۆ رازیكرنا نه‌ژادپه‌رێسێن ترك، ئاكپارتی چه‌ندین پێنگاڤ دژی ئاشتییا ناڤخوه‌یی و چاره‌كرنا دۆزا كوردی هاڤێژتینه. ب گۆتنه‌كا دی، ل شوونا وێنه‌یه‌كێ نیشتمانی و مرۆڤانی بده‌ته مرۆڤێ كورد، هه‌مان وێنه‌یێ كه‌مالیستان بۆ ڤه‌گه‌ڕاند و تركیا به‌ره‌ڤ شه‌ڕێ ناڤخوه‌یی بریه.
رۆلێ تركیا ل سۆریێ و دگه‌ل داعشێ و به‌ری هینگێ دگه‌ل مسرا مورسی.. جهێ گومانێنه كو تركیا وه‌كو هێزه‌كا مه‌زنا هه‌رێمی، ب رۆلێ راگرتن و ئاشتیێ راببت.
بۆ راوه‌ستاندنا ئه‌ڤێ، كۆده‌تایا له‌شكه‌ری، به‌لكو ببته زه‌نگله‌كا هوشیاركرنێ بۆ ئه‌ردۆغانی و ئاكپارتی كو رێ هند ڤه‌كری نینه، ئیسلامچی بن و نه‌ژادپه‌رێس بن و دیمۆكرات بن و ئۆرۆپی بن و ئاشتیخواز بن و شه‌ڕخواز بن.. ئه‌ڤ گێلما گاڤانی، پێكڤه ناهێته خوارنێ، ئه‌وێ بخوت دێ تووشی زكچۆنێ بت!
ل دوماهیێ من دڤێت بێژم: ئاكپارتی و ئه‌ردۆغان هندی خراب بن، له‌شكه‌ر ژ وان خرابتره.
ئه‌ڤ گۆتار ل مالپه‌رێ وار ميديا،ل 17/7/2016به‌لاڤ بوويه.
تُتاح هذه الصورة أيضا في: کوردی
