ب هەرێم کرنا کەرکوکێ د بەرژەوەندا کێ دایە؟
ئامينه زكرى
ئێك ژ بابەتێن گەرمێن روژێ د قادا سیاسی یا هەرێمێ دا پروژێ بـ هەرێم کرنا کەرکوکێ یە، کو ژلایێ پارێزگارێ کرکوکێ و ئەندامێ مەکتەب سیاسی یا ئێکەتیێ بەرێز نەجمەدین کەریم ڤە یا هاتیە ئامادەکرن، و یا خویایە کو هێزا بالا دەست لـ وێ دەڤەرێ ئێکەتیی نشتیمانیا کوردستانێ یە.
ددەمەکێ دا کو هەرێما کوردستانێ ئامادەکاریان بو ئەنجامدانا گشتپرسیێ بو هەرێم و ناوچێن کوردستانیێن دەرڤەیێ ئیدارا هەرێمێ دکەت کو ب خوینا شەهیدێن کوردستانێ ئەڤرو یا بویە دیفاکتو، ئەڤ پروژە هاتە ئامادەکرن، هەلگرێن ڤی پروژەی کو ب دیتنا من بو دو مەرەمان ئەڤ بابەتە ورژاند، یا ئێكی تستا رایا گشتی یا کوردستانی و یا دووێ نەرینا پارتیێن سیاسی یێن کوردستانی، کو ئەگەر خەلك و لایەنێن سیاسی بێدەنگ نڤاندن هەمبەر ڤی پروژەی، ب ئاسانی سیاسەتا حزبی یا خوە جیبەجێ بکەن و ئەگەر نەرازیبون و دژایەتی دروست بون وەك سیاسەتا هەردەمیا ئێکەتیێ بانگەوازی بکەن ئەڤە رەیا شخصی یا وی ئەندام مەکتەبا سیاسی یە و تەعبیرێ ژ سیاسەتا وان ناکەت و بێ ئاگەهـن ژ وی پروژە ی!!خوشبەختانە رایا گشتی و پارتیێن سیاسی یێن کوردستانی دگەل وی پروژەی د ناکوك و هەڤدژ بون و نارازیبونەکا جەماوەری لێ دەرکەفت.
ل گور پەیرەوێ ناڤخویێ هەمی پارتیێن سیاسی ئەندامێن مەکتەب سیاسی، دارێژەر و جێبەجێکارێن بەرنامە، بریار و سیاسەتاحزبێن خوەنە.
د ناڤ هەر حزبەکی دا پرەنسیپ، بەها، ستراتژیەت، ئارمانج و دسپلین یێت هەین، و هەمی ئورگان و داریژەرێن سیاسەتا حزبێ پابەندێ جێبەجێکرن و سەرئێخستنا وان پرەنسیپانە، و گەر لادانەك ژلایێ ئەندامان ڤە دروست ببیت لـ گور یاسا و دسپلینێن حزبی و جورێ سەرپێچیان دێ کەڤنە لـ بەر لێپرسینێ.
ل هەرێما کوردستانێ، سیاسەتا کو ژلایێ هندەك حزبان ڤە دهێتە پەیرەو کرن سیاسەتا گوشت بو من و بەرماکێت وێ بو تە دهێتە پەیروە کرن، ئەندام مەکتەب سیاسی و پارێزگارێ کەرکوکێ کو پێگەهەکێ بهێز دناڤ حزبا خوە دا هەیە پروژێ ب هەرێم کرنا کەرکوکی ئامادە دکەت و لـ کەنالین راگەهاندنێ هەولا شروڤەکرن و ئیجابیاتێن وی پروژەی و پەیداکرنا لوبیێ بو دکەت، و بانگەوازیێ دکەت کو نوکە زەمینە و دەم یێ گونجاو نینە بو ئەنجامدانا رێفراندومێ و ئەو ناوچێن کوردستانی کو هزارن شەهید و قوربانی بو پاراستنا ناسناما کوردستانیەتا وێ و ڤەگەراندن بو سەر هەرێمێ ڤە داین، بگرە شورەشەکا مەزن و گرانا وەك ئەیلولێ ژی پیخەمەت پاراستنا کوردستانیەتا کەرکوکێ هاتیە قوربانیکرن.
ل شوینا هندێ کو حزب لێپرسینێ بکەت و داخوازا لیبورینێ بەرامبەر ئەو بێرێزیا ب خوینا شەهیدان و خەلکێ کەرکوك و کوردستانێ کربا، مەکتەب سیاسی یا پارێزگاری ئیدیعایا هندێ دکەن کو ئاگەهدارێ ڤی پروژەی نینن؟؟
و ئەندامێن پەرلەمانی و سەرکردایەتیا هەمان حزب و نڤیسەرێن هەڤپەیمانێن ئێکەتیێ (بزاڤا گوران)پروپاگندان دکەن ئەڤە پروژەیەکێ تەوافقی و ستراتژی و دونیابینی دناڤبەرا پارتی و تورکی دا!!
ئەگەر پروژەیەکێ تورکیە، حەقە سەرکردایەتیا ئێکەتیێ ژ ئەندامێ مەکتەبا سیاسی یا خوە بپرسن تە چ پەیوەندی ب پروژەیەکێ وەلاتەکێ بیانی ڤە هەیە؟بـ وەکالەت شەرکرن بو پروژەیەکی تورکی پێخەمەت چیە؟بـ رێکا کێ و چەوا و بەرامبەر چ پروپاگندان بو ڤی پروژەی دکەی؟
براستی رویی قایمیا سیاسی یە، ببێژن ئەڤ پروژە د بەرژەوەندا پارتی دایە، وەکی وێ چەندێ یە کو بێژنە خەلکێ کوردستانێ کەرکوك یا لـ ژێر نفوژا پارتیدا و نجمدین کەریم ژی ئەندامێ مەکتەبا سیاسی یا پارتی یە و ئەڤ پروژە یێ ئامادەکری!
هەمی خەلکێ کوردستانێ دزانن پروژێ فێدرالیەتا پارێزگەهان پروژێ بەرێز مام جەلال بو، لێ سەروک بارزانی و ب هەمی هێزا خوە دژی وی پروژێ راوەستیا و نەهێلا ئەو پروژە سەربگریت، سەرکردایەتیا سیاسی پشتی هەول و ماندیبونەکا زور شیان مادی 140 دەربارەیی ناوچێن کوردستانی و میکانیزما ڤەگەراندنا وان لـ سەر هەرێمێ د دستورێ ئێراقێ دا بنەجهـ بکەن، هەلبەت پروژێ بـ هەرێم کرنا کەرکوکی دژی دستور و یاسایایە، واتە ژلایی دستوری و یاسای ڤە ژی یا رەد کریە و نابیت کورد بو قوناغا پێش 2005 ڤەگەریت.
ل جڤینا 2014-07-03 سەروك بارزانی د جڤینەکا دگەل پەرلەمانی کوردستانێ، پەرلەمان راسپارد بو دو ئەرکین گرنگ؛
1. دەرئیخستنا یاسایا کومسیونا سەربەخوەیا هەلبژاردن و راپرسیان بو کوردستانێ.
2. دیراسەت کرن ل دور چەوانیا ئەنجامدانا رێفراندومی بو هەرێمێ و ناوچێن کوردستانی یێن دەرڤەیی ئیدارا هەرێمێ و دیراسەت کرن ل دور دەست نیشان کرنا روژەکێ بو ئەنجامدانا رێفراندومێ.
لی بـ مخابنی ڤە ل جهێ هندێ کو پەرلەمان کار لـ سەر پرسا ریفراندومێ بکەت، ئەجندایێن حزبی بو سەرنەگرتنا ڤی پروژەی و فەراموشکرنا وێ دەرئێخستن و خەلکی کوردستانێ بـ بەرنامێن حزبی و لاوەکی ڤە مژویل کرن.
و پاش شەری داعش و دەرکەفتنا حشدا شعبی و سەرەرای نەرازیبونا سەروك بارزانی بو هاتنا حشدا شعبی بو دەڤەرێن کەرکوك، خانقین و دوزخورماتور و وان ناوچان ژ بو سەرهەلنەدانا شەرەکێ نەخوازرا و پارستنا بەرژەوەندیێن بالایێن نەتەوەیی کو پێشمەرگە بـ خوین ئەو سنور ئازاد کر بون، لێ ئیسرارا هەمان ئەحزابێن خودان نفوژ و دەستهەلاتێن لـ دەڤەرێ بو کو ئەو هێز بنەجهـ بون.
بـ دلنیای ئەڤ پروژە دێ کەرکوکی بو هەمیشە لـ هەرێمێ ڤەبریت و دور ئێخیت و نە پارتی و نە هیچ هێزەکا کوردستانی ژێ سودمەند نابن، ئەڤ پروژە خیانەتە دەرحەق گەلێ کوردستانێ و زەرەرمەندێن ئێکێ بێگومان دێ کورد بن.
جیهان د هەولا دارشتنا نەخشەێ جیوسیاسی یا روژهەلاتا ناڤەراست دایە و ناوچە یا د گورانکاریێن ریشەی دا کو کورد دێ دەورەکی ئەساسی تێدا بینن و بێگومان پاش شەری داعش ئاسویێن ڤێ نەخشێ نوی دێ بـ پراکتیك دەرکەڤیت.
نابیت ئەم ڤێ دەرفەتا زێرین ژ دەست بدەین، لایەنێن سیاسی پێدڤیە بو کومبونا 2015-05-18 یا لایەنێن سیاسی یێن هەرێمێ دگەل جەنابێ سەروك بارزانی، بو دروستکرنا ژورا عملیاتان بو سەربەخوەیا کوردستانێ بزڤرن و ناکوکیێن حزبی دانە رەخەکێ و ب پروژەیەکێ نەتەوەیی و ئێکگرتی بەرەف رێفراندوم و پەیمانا سەربەخوەی پینگاڤا بهاڤێژن و دەست ژ تستا رایا گشتی یا کوردستانێ و بانەک و دو هەوا بەردەن.ئەگەر نە ئەم هەمی دێ پێکڤە د ڤێ کەشتیێ دا نقوم بین.
ئه‌ڤ گۆتار ل مالپه‌رێ ئين ئارتى،ل 27/6/2016 به‌لاڤ بوويه.
تُتاح هذه الصورة أيضا في: کوردی
