کەرکووک.. پێشمەرگە و ھێزێن ئێمناھییا ئیراقێ نێزیکی رێککەفتنێ نە
WAAR-دهۆك:
شاندەکا ھێزێن ئێمناھییا ئیراقێ ل گەل ھێزێن پێشمەرگەی کۆم بوون و بریارە پشتی دو حەفتیێن دی، بریارا دوماھیێ ل سەر ڤەگەریانا ھێزێن پێشمەرگەی بۆ سنۆرێن کەرکووکێ بھێتە دان.
ل دووڤ زانیاریێن ھەژار رەشید پەیامنێرێ وار ل کەرکووکێ: ئەڤرۆ کۆمبوونەک د ناڤبەرا ھێزێن ئێمناھییا ئیراقێ و پێشمەرگەی دا ل پردێ ھات کرن، تێدا بەحس ل ڤالاھییا ئێمناھیێ یا ل دەڤەرێن د ناڤبەرا پێشمەرگەی و سوپایێ ئیراقێ دا ب تایبەت ل سنۆرێن قەرچۆخ و کانی دۆمەلان کر، کو ب وێ ئەگەرێ ژی داعشێ مفا ژ نەبوونا ھێزێن ئێمناھیێ ل وان ھەردو دەڤەران دبینیت.
پەیامنێرێ وار گۆت ژی: بریارە ل بیست و سێی ڤێ مەھێ کۆمبوونەکا ئێکلاکەر د ناڤبەرا ھێزێن ئێمناھییا ئیراقێ و پێشمەرگەی دا بھێت کرن، ئێکەم پێنگاڤ ژی پشتی رێککەفتنێ لیوایێن ئێک و دو یێن پێشمەرگەی دێ ڤەگەرن بۆ سنۆرێ کەرکووکێ.
کۆمبوونا ئەڤرۆ یا ھێزێن ئێراقی و پێشمەرگەی پشتی چەندین کۆمبوونان د ناڤبەرا شاندێن ھەرێم و بەغدایێ دا ب چاڤدێرییا نەتەوەیێن ئێکگرتی بۆ ئاساییکرنا رەوشا کەرکووکێ و ڤەگەریانا ھێزێن پیشمەرگەی بۆ سنۆرێن وێ پارێزگەھێ ھات کرن.
تُتاح هذه الصورة أيضا في: کوردی
