پارتی: ژ بریارا وێره‌ك و چاره‌نڤێساز یا گه‌لێ كوردستانێ په‌شێمان نابین
WAAR-دهۆك:
پارتی دیموكراتی كوردستان راگه‌هاندنه‌ك د سالڤه‌گه‌را رێككه‌فتنامه‌یا یازده‌ی ئادارێ به‌لاڤكر و راگه‌هاند؛ ب چ ره‌نگان ژ بریارا وێره‌ك و چاره‌نڤێساز یا گه‌لێ كوردستانێ په‌شێمان نابن.
د راگه‌هاندنا خوه دا مه‌كته‌با سیاسی یا پارتی دیاركرییه، رێككه‌فتناما یازده‌ی ئادارێ كو دناڤبه‌را پارتی دیموكراتی كوردستان و حكومه‌تا وی ده‌می یا ئیراقێ دا هاتبوو ئیمزاكرن، ئێكه‌م به‌لگه‌نامه‌یا قانوونی بوو كو حكومه‌تا ئیراقێ نه‌چار كر، دانپێدانێ ب مافێن سیاسی، نه‌ته‌وه‌یی و ئیداری و كه‌لتووری یێن گه‌لێ كورد بكه‌ت و ده‌ستكه‌فته‌كا مه‌زنا شوره‌شا ئیلۆنا مه‌زن بوو و بزاڤا رزگاریخوازا كوردی ده‌ربازی قۆناغه‌كا سیاسی یا پێشكه‌فتیتر كر.
مه‌كته‌با سیاسی یا پارتی دایه زانین، نها هه‌رێما كوردستانێ د ره‌وشه‌كا هه‌ستیار دایه، سه‌رباری كێشه‌یێن ناڤخوه‌یی، بزاڤا شكاندنا ئه‌زموونا هه‌رێما كوردستانێ دهێته كرن و حكومه‌تا ئیراقێ ب رێیا سیاسه‌تا برسیكرن و تاكره‌وییا ده‌ستهه‌لاتێ و عه‌قلیه‌تا دۆرپێچكرن و ژناڤبرنا كیانێ ده‌ستووری یی هه‌رێما كوردستانێ، ره‌وش گه‌هاندییه قۆناغه‌كا ب زه‌حمه‌تتر.
خویاژی كرییه، هه‌رێم ئاماده‌یه ل گۆره‌یی ده‌ستووری هه‌موو كێشه بهێنه چاره‌كرن و دایه زانین ژی، ئه‌و ب چ ره‌نگان ژ بریارا وێره‌ك و چاره‌نڤێساز یا گه‌لێ كوردستانێ په‌شێمان نابن و گهۆرینا كیانێ شه‌رعی و یاسایی یێ هه‌رێما كوردستانێ ب چ ره‌نگان قه‌بوول ناكه‌ن.
تُتاح هذه الصورة أيضا في: کوردی
