ENKS: مە داخواز ژ ئەمریکا کریە پێشمەرگەیێ رۆژ بچیتە رۆژئاڤا
دهۆك-KDP.info-
ئەنجوومەنا نشتمانیا کورد ل سووریێ (ENKS)ـێ، داخواز ژ وەزارەتا دەرڤەیا ئامەریکا کر کو رۆڵێ وان د رێڤەبرنا رۆژھلاتێ فراتێ دا ھەبیت و پێشمەرگێن رۆژ ژی بۆ رۆژاڤایێ کوردستانێ ڤەگەرن.
د داخویانیەکێ دە، (ENKS)ـێ راگەھاند، کو شاندەکە ئەنجوومەنی ب سەرۆکاتیا کامیران ھاجۆ، ل واشنتۆنا پایتەختا ئامەریکا ل ئاڤاھیا وەزارەتا دەرڤە ، ل گەل سەرۆکێ دەستەیا رۆژھلاتا ناڤین (ئەسن کۆلدرش) و سەرۆکێ تیما سووری د وەزارەتا دەرڤەیا ئامەریکا دە (کلفۆرد ھاینزەر) کۆمبوون.
ل گۆری داخویانیا ENKS ـێ، ھەردو ئالیان تەکەزی ل سەر راوەستاندنا شەرێ ئەفرینێ و پابەندیا ب چارەیا سیاسی ل سووریێ کرن.
دەربارێ ئاڤاکرنا رێڤەبەریەکێ ل رۆژھلاتی فراتێ، ئالیێ ئامەریکی دیار کر، کو ئەو دخوازە نەرین و ھەلوەستا ENKS ل سەر وێ پرسێ ناس بکەن و گۆت: “ئەم دخوازن نوونەراتیا ھەموو ئالیان ل رۆژھلاتێ فراتێ ھەبیت.”
ژ ئالیێ خوە ڤە، شاندا ENKS تەکەزی ل سەر تایبەتمەندیا نەتەوییا کوردی ل رۆژئاڤایێ کوردستانێ کر و د ھەمان دەمێ دە ژی، تەکەزی ل سەر پێویستیا ڤەگەرا ھێزێن پێشمەرگێن رۆژ ژ بۆ رۆژاڤایێ کوردستانێ کر ژ بۆ رۆژھلاتێ فەراتێ ژ بۆ کو ھەڤسەنگیەکە ھێزێ ل ویڕێ چێبیت.
ئەنەکەسێ بۆ ئامەریکا گۆت: ”ڤەگەراندنا ژیانا سیاسی و ئارامیێ و ڤەگەرا پێشمەرگێن رۆژ و کوردێن کو پەنابەر بوونە، گارەنتیا سەرکەتنا پێکانینا ئیدارەیا ناڤچەیا رۆژھلاتێ فەراتێیە.”
تُتاح هذه الصورة أيضا في: کوردی
