زارۆكه‌كێ دهۆكێ 9 ساله د نه‌خۆشخانێدا هاتیه نڤاندن
باسنيوز:
ل نه‌خۆشخانا هیڤى یا زارۆكان، زارۆكه‌كێ 14 سالى ب ناڤێ (سه‌عه‌د مه‌سعود) 9 ساله د نه‌خۆشخانێدا هاتیه نڤاندن ب ئه‌گه‌رێ نه‌خۆشیه‌كا قنێتى یا ویراسى یه و هه‌تا نوكه د ژیانا خوه هه‌موویێ دا چو لڤین نه‌كرینه و ل ژێر چاڤدێریا نۆژدارانه.
د. نزار به‌كر ئه‌لمزورى، رێڤه‌به‌رێ نه‌خۆشخانا هیڤى یا زارۆكان، بۆ (باس) دیاركر، ئه‌ڤ زارۆكه د ژیێ پێنچ سالیێ دا تووشى نه‌خۆشیه‌كا قنێتى بوویه، چونكو ئه‌نزیمه‌ك ژ جیناتێن زارۆكى یێ كێمه و ئه‌ڤ نه‌خۆشیه ژ دایك و بابان بۆ زارۆكى دهێته ڤه‌گوهاستن و پتر ل ده‌ڤ وان زارۆكان په‌یدا دبیت ئه‌وێن دایك و باب ناسیارێن ئێك بن و ئه‌ڤ نه‌خۆشیه وه ل زارۆكى دكه‌ت كو پتریا ئه‌ندامێن له‌شێ وى ژكار بكه‌ڤن.
ئاشكراژى كر، نه‌خۆشیا ڤى زارۆكى یا وه‌لێ كرى كو دل و مێلاك ژ كار بكه‌ڤن و ئاڤ د مه‌ژیێ وى دا ب راوه‌ستیت و ب چو ره‌نگان نه‌شێت لڤین و هاتن و چوونێ بكه‌ت و گۆت: ئه‌ڤ زارۆكه 9 ساله ل نه‌خۆشخانێ هاتیه نڤاندن و به‌رده‌وام ل ژێر چاڤدێریا نۆژدارانه و مالا وى ژى به‌رده‌وام ل ده‌ڤ وى نه و پتریا ده‌مێ وان ل نه‌خۆشخانێ دهێته نڤاندن.
خویاژى كر، خوارنا سه‌عه‌دى ب تنێ سێلان و ئاڤن و نه‌شێت چو خوارنێن دى بخۆت و د ماوێ 9 سالێن نه‌خۆشخانێدا ژبلى برێڤه‌چوونا ژیانا وى، چو گوهۆرین د له‌شێ ویدا په‌یدا نه‌بووینه.
ل گۆره‌ى داتایێن جیهانى، ئه‌ڤ نه‌خۆشیا سه‌عه‌د تووش بوویى، ل سه‌رانسه‌ر جیهانێ ژ هه‌ر ملیۆن كه‌سان پێنچ كه‌س تووش دبن.
مه‌سعود بابێ ڤى زارۆكى بۆ (باس) خویا كر كو ژبه‌ركو ئه‌ز و هه‌ڤژینا خوه ناسیارێن ئێكین، له‌وما مه سێ زارۆك هه‌نه و هه‌رسێ د نه‌خۆشن و ئێش و ئازارێن سه‌عه‌دى ژ هه‌ردوكێن دى پترن، چونكو 9 ساله د نه‌خۆشخانێدا و هه‌ردوو زارۆكێن من یێن دى ژى د نه‌خۆشن د مالێدا و ئه‌وژى به‌رده‌وام دهێنه چاره‌سه‌ركرن.
مه‌سعود ئاشكراژى كر، ئه‌ز كرێكارم و ره‌وشا من یا ئابوورى گه‌له‌ك یا لاوازه و من شیانێن هندێ نینن زارۆیێن خوه ببه‌مه ده‌رڤه‌ى وه‌لاتى چاره‌سه‌ر بكه‌م، له‌وما هه‌تا نها د نه‌خۆشخانێدا مایه.
تُتاح هذه الصورة أيضا في: کوردی
