ئه‌ڤ ساله زێده‌تری 26 هزار كه‌سان ل عیراقێ قوربانیێن روودانێن توندوتیژیێ بوون
ئه‌ڤرۆ نیوز:
ب گۆره‌ی ئاماره‌كا نه‌ته‌وێن ئێكگرتی ل سالا 2016ێ ل هه‌موو پارێزگه‌هێن عیراقێ 12 هزار و 38 كه‌سان ژ ئه‌گه‌رێ روودانێن توندوتیژبێ هاتینه كوشتن و 14 هزار و 411 كه‌س ژی بریندار بووینه.
نڤیسینگه‌ها نه‌ته‌وێن ئێكگرتی ل عیراقێ “یۆنامی” د سالا 2016ێ دا هه‌موو ته‌قین و شه‌ر و كریارێن توندوتیژیێ ل عیراق و هه‌رێمێ رووپیڤ كرینه، ب گۆره‌ی ئامارێ ل ده‌سپێكا سالێ 12 هزار و 38 كه‌س هاتینه كوشتن و 14 هزار و 411 كه‌س بریندار بووینه.
پتریا ته‌قین و توندوتیژیان ل پارێزگه‌ها به‌غدا، سه‌لاحه‌دین، مووسل، كه‌ركووك، ئه‌نبار و دیالا هاتینه تۆماركرن، پترترین ته‌قین ژی ل به‌غدایا پایته‌خت هاتینه ئه‌نجام دان.
د وێ ئامارێ دا كوشتی هاتینه جوداكرن و ئاماژه ب وێ چه‌ندێ كریه كو شه‌ش هزار و 492 كوشتی وه‌لاتیێن مه‌ده‌نی بووینه، پێنج هزار و 456 كه‌س ژی د وارێ له‌شكری دا كار كریه.
رێژا توندوتیژیێ ل هه‌یڤێن ئیلۆن، چریا ئێكێ، چریا دویێ و كانوونا ئێكێ بلند بوویه و د وان چه‌ند هه‌یڤێن دووماهیێ دا، پێنج هزار و 683 كه‌س هاتینه كوشتن و دكه‌ته نیڤا ژمارا قوربانیێن ئه‌ڤ ساله.
تُتاح هذه الصورة أيضا في: کوردی
