ژ به‌ر ڤی ئه‌گه‌رێ كاره‌با نشتیمانی دێ كێم بیت
ئه‌ڤرۆ نیوز:
وه‌زاره‌تا كاره‌بێ هوشداریا كێمبوونا ده‌مژمێرێن دانا كاره‌با نشتیمانی دده‌ت و داخوازێ ژی ژ وه‌لاتیان دكه‌ت بۆ كێمكرنا فشارێ ل سه‌ر تۆڕا كاره‌با نشتیمانی، ئامیرێن كاره‌بێ بۆ خوه گه‌رمكرنێ بكار نه‌ئینن.
محه‌مه‌د ئه‌مین هه‌ورامی ئاخفتنكه‌رێ ب ناڤێ وه‌زاره‌تا كاره‌بێ راگه‌هاند كو ل ده‌سپێكا هه‌یڤا ئیلۆنا ئه‌ڤ ساله داخواز ژ سه‌رۆكاتیا جڤاتا وه‌زیران و پارێزگه‌ران هاتیه كرن كو گازا سپی بۆ وه‌لاتیان دابین بكه‌ن و نوكه ژی مژوولی میكانیزمه‌كێ نه هه‌تا ب هه‌مان رێ پانزین و گازا سپی ل بازاران دابین بكه‌ن دا كو كاره‌ب بۆ خوه گه‌رمكرنێ بكارنه‌هێت و وه‌كو سالێن بۆری كێشه بۆ دروست نه‌بن.
ئاماژه ب وێ چه‌ندێ ژی كر كو نوكه 22 ده‌مژمێران كاره‌با نشتیمانی ب هه‌مان ره‌نگێ هه‌یڤێن بۆری دهێته دابینكرن و گۆت: “ده‌ما به‌ر ب وه‌رزێ زڤستانێ دچین، وه‌لاتی كاره‌بێ بۆ گه‌رمكرنێ ب كاردئینن و فشارێ ل سه‌ر زێده دكه‌ن، هه‌كه وه‌لاتی د هاریكار نه‌بن، دێ پێدانا كاره‌با نشتیمانی كێم بیت”.
ده‌رباره‌ی كێمبوونا ده‌مژمێرێن پێدانا كاره‌بێ ب وه‌لاتیان، ئاخفتنكه‌رێ ب ناڤێ وه‌زاره‌تا كاره‌بێ راگه‌هاند: هێشتا زوویه كو كێمبوونا كاره‌بێ ب فه‌رمی رابگه‌هینین، به‌لێ هه‌كه د وه‌رزێ زڤستانێ دا وه‌لاتی ئامیرێن كاره‌بێ بۆ خوه‌گه‌رمكرنێ ب كار بینن، دێ كارتێكرن ل سه‌ر دانا ده‌مژمێرێن كاره‌بێ هه‌بیت”.
تُتاح هذه الصورة أيضا في: کوردی
