سەرۆکێ فراکسیۆنا پارتی: بێ ئەدەبی بەرامبەر هۆشیار زێباری قه‌بوول ناکەین
رووداو
پەرلەمانی عێراق 25-8-2016 -ی دیاریکردووە بۆ لێپرسینەوە لە وەزیری دارایی عێراق، سەرۆکی فراکسیۆنی پارتیش دەڵێت:” بێ ئەدەبی لە هیچ کەسێک بەرامبەر وەزیرە کوردەکان قبوڵ ناکەین”.
پەرلەمانی عێراق هۆشیار زێباری وەزیری دارایی عێراق بانگهێشت دەکات بۆ لێپرسینەوە بەرامبەر کەموکوڕییەکان و روونکردنەوە لە سەر سیاسەتی دارایی عێراق.
خەسرۆ گۆران، سەرۆکی فراکسیۆنی پارتی دیموکراتی کوردستان لە پەرلەمانی عێراق بە تۆڕی میدیایی رووداوی راگەیاند:” تاوەکو ئێستا روون نییە چ رۆژێک بانگهێشتی وەزیری دارایی دەکرێت، بەلای ئێمەوە پرسیار ئاراستەکردن و روونکردنەوەدان و لێپرسینەوە بە رێوشوێنی یاسایی بەرامبەر وەزیرە کوردەکان ئاساییە، بەڵام بێ رێزی و بێ ئەدەبی بەرامبەر هیچ وەزیرێکی کورد قبوڵ ناکەین”.
خەسرۆ گۆران کە هاوکات ئەندامی سەکردایەتی پارتییە لە بارەی بانگهێشتکردنی وەزیرەکەی پارتی کە ئەندامی مەکتەبی سیاسی ئەو حیزبەیە دەڵێت: “لێپرسینەوە و بانگهێشتکردن بابەتێکی دەستوورییە بەڵام دووبارەکردنەوەی سیناریۆی هاوشێوەی وەزیری بەرگری لە کەس قبوڵ ناکەین، رێگا نادەین کەس سوکایەتی و بێ رێزی بەرامبەر وەزیرە کوردەکان بکات”.
لە لایەن خۆییەوە هۆشیار عەبدوڵڵا، ئەندامی پەرلەمانی عێراق لە فراکسیۆنی گۆڕان پشتگیری بزووتنەوەکەی بۆ ئەو زنجیرە لێپرسینەوانە راگەیاند و لە پەیجی تایبەتی خۆی لە تۆڕی کۆمەڵایەتی فەیسبووک نووسیویەتی: “هەندێک دەیانەوێت ئەم باسە وەک پرسێکی نەتەوەیی و کوردایەتی بخەنەڕوو؛ ئێمە پێمانوایە ئەوە هەڵەیە و هەر وەزیرێک لە هەر حزبێک بێت دەبێت ئیستجواب وەک کارێکی ئاسایی وەربگرێت و ئامادە بێت بێ سێ و دوو بێتە بەردەم پەرلەمان”.
هۆشیار عەبدوڵڵا گوتی:” ئەوەی هەڵوێستی وەزیر یەکلا دەکاتەوە دەستپاکی و یاسایی بوونی کارەکانیەتی و یەکێک لە خۆی دڵنیا بێت ئەسڵەن ئیستجواب دەبێتە دەرفەت بۆ خستنەڕووی کارەکانی نەک کەوتن و ئیقالەکردنی”.
تُتاح هذه الصورة أيضا في: کوردی
