پشتی په‌قینێن به‌غدا عه‌بادی هه‌ژماره‌كا بریاران ده‌ركرن
وار
هه‌ژمارا قوربانیێن په‌قینێن به‌غدا 300 كه‌س ده‌ربازكرن كو زێده‌تری 180 كه‌سان ژ وان كوشتینه، لگۆری زانیارییان سێ ژ قوربانیێن ناڤا په‌قینێن به‌غدا كوردن حه‌یده‌ر عه‌بادی ژی سێ رۆژ وه‌ك به‌هی ل ئیراقێ راگه‌هاندن و چه‌ند بریاره‌ك ژی ده‌ركرن، سه‌لیم جبووری ژی ب گرنگ ته‌ماشه‌یی وان بریاران دكه‌ت.
دو ترومبێلێن تی ئێن تی كری ل شه‌ڤا شه‌مبی ل سه‌ر ئێك شه‌مبێ و ل سات 1ی سپێدێ، خوه د ناڤا حسێنییه‌كا شیعه‌یان دا ل تاخێ كه‌راده ل ناڤه‌ڕاستا به‌غدا یا پایته‌ختێ ئیراقێ په‌قاندن و بوو ئه‌گه‌را كوشتنا زێده‌تر ژ 180 كه‌سان و برینداربوونا زێده‌تر ژ 180 كه‌سان و لگۆری زانیارییان ژی سێ ژ قوربانییان كوردن و هه‌ژماره‌كا دی یا قوربانییان كو تا نها ژ ئالیێ تیمێن هه‌وارهاتنێ ڤه نه‌هاتینه رزگاركرن و د بن ئاڤاهییاندا ئاسێ ماینه، پشتی په‌قینان ژی رێكخستنا تیرۆرستییا داعشێ به‌رپرساتییا خوه ل هه‌مبه‌ری په‌قینان راگه‌هاند، خێزانێن قوربانییان ژی هه‌ر زوو ده‌ست ب خوه نیشاندانان كرن و ل ده‌ما حه‌یده‌ر عه‌بادی، سه‌رۆكوه‌زیرێن ئیراقێ قه‌ستا وی جهی كری ب پێلاڤ و به‌ران هێرش كریێ.
حه‌یده‌ر عه‌بادی، سه‌رۆكوه‌زیرێن ئیراقێ حه‌فت بریار ده‌ركرن بۆ وێ یه‌كێ باژێڕێ به‌غدا ژ هێرشێن رێكخستنا تیرۆرستییا داعشێ كۆنترۆل بكه‌ت و ب پارێزیت.
عه‌بادی ب پێدڤی دبینیت، هه‌موو هێزێن ئێمناهیێ ئامیرێن ئاشكراكرنا بۆمبان ئای دی ئای كو ب سه‌ر خالێن وه‌زاره‌تا ناڤخوه هاتینه دابه‌شكرن، بهێنه كۆمكرن و لێكۆلین د كه‌یسا كڕین ب وان ئامیران دا بهێته‌كرن و هه‌ر كه‌سه‌كێ ده‌ست د گه‌نده‌لیێ دا هه‌یی بهێته ده‌سته‌سه‌ركرن.
پێدڤییه ژی وه‌زاره‌تا ناڤخوه ئامیرێ رابسكان یێ ئاشكراكرنا بۆمبان ل هه‌موو ده‌رگه‌هێن به‌غدا و ده‌رگه‌هێن پارێزگه‌هێن دی بۆ پشت راستبوونێ بدانیت.
هه‌ر دیسا ژی عه‌بادی ب پێدڤی دبینیت، سه‌ركردایه‌تییا ئۆپه‌راسیۆنا به‌غدا له‌زێ بكه‌ت د ته‌مامكرنا پشتینه‌یا ئێمناهیێ بۆ باژێڕێ به‌غدا، بۆ ڤێ مه‌ره‌مێ ژی مفا ژ وه‌زاره‌تا به‌رگریێ و وه‌زاره‌تێن دی و ئه‌میندارییا گشتییا به‌غدا بهێته وه‌رگرتن.
هه‌روه‌سا ژی دیاركرییه؛ پێدڤییه سه‌ركرداتییا ئۆپه‌راسیۆنێن هه‌ڤپشك پشكنین و چاڤدێرییا ئاسمانی و هه‌والگێری ب سه‌ر پایته‌ختی ب گشتی و هه‌رچار ئالیێن وێ بۆ ئاشكراكرنا تیرۆرستان بكه‌ت.
هه‌روه‌سا ژی بكارئینانا ئامیرێن په‌یوه‌ندیێن مۆبایلێ ژ هێزێن ئێمناهیێ و خالێن پشكنینێ بهێنه قه‌ده‌غه‌كرن و ب پێدڤی ژی دبینیتن هێزێن ئێمناهیێ و ئۆپه‌راسیۆنێن به‌غدا پێداچۆنێ د خالێن پشكنێ دا بكه‌ن و كارێ وه‌لاتییان سڤك بكه‌ن و پشت ب هێزا به‌رسڤدانێ بهێته به‌ستن، ئه‌ڤه ژی بێگومان ل دووڤ پشت به‌ستنا ل سه‌ر زانیاریێن هه‌والگێریێ.
عه‌بادی د خالا داویێ یا بریارێن خوه دا ئاشكراكرییه؛ به‌رپرساتییا پشكه‌كا ئێمناهیێ ب هه‌ڤكاری د گه‌ل سه‌ركردایه‌تییا ئۆپه‌راسیۆن و وه‌زاره‌تا ناڤخوه و ده‌رزگه‌هێ ئاسایشێ و هه‌والگێریێ و لژنه‌یا ئێمناهییا به‌غدا و پارێزگه‌هێن دی دوور ژ ناكۆكییان بۆ ته‌مامكرنا كارێ خوه كار بهێته‌كرن.
تُتاح هذه الصورة أيضا في: کوردی
