پشتی رزگاركرنا وێ ژی داعش ناهێلیت مووسل ئارام بیت
دواڕۆژ:
ئه‌ندامێ لژنه‌یا ئێمناهیێ ل جڤاتا پارێزگه‌ها نه‌ینه‌وا راگه‌هاند كو، ئه‌گه‌ر مووسل بهێته رزگاركرن ژی بۆ ده‌مه‌كێ ئێمناهی بۆ وی باژێڕی نازڤریت، چونكو دێ شانه‌یێن نڤستیێن داعش ب كارێ په‌قین و كۆشتن و ره‌ڤاندنێ رابن.
داوود جۆندی، ئه‌ندامێ لژنه‌یا ئێمناهیێ ل جڤاتا پارێزگه‌ها نه‌ینه‌وا بۆ دواڕۆژ گۆت”پشتی داعش چۆیه دناڤا مووسل دا هنده‌كان هه‌ڤسۆزییا خوه بۆ دیاركرن، له‌وا ئه‌گه‌ر پشتی پرۆسه‌یا رزگاركرنێ ئه‌و كه‌س نه‌هاتبنه كۆشت نیان گرتن و لناڤا باژێڕی دا بمینن، دێ به‌ره‌به‌ره كڕیارێن تیرۆرستی ئه‌نجامده‌ن، له‌ورا پێدڤییه ده‌زگه‌هێن ئێمناهیێ، حزبی، ئه‌وقاف و جڤاتا پارێزگه‌هێ هه‌ر ژ نوكه پلانه‌كێ بۆ نه‌هێلانا كاریگه‌رییا ره‌وشه‌نبیرییا داعش لسه‌ر خه‌لكی بدانیت و ب به‌رفره‌هی كار لسه‌ر بكه‌ت”.
داوود جۆندی ئاماژه ب ڤێ چه‌ندێ دا “تیرۆرا هزری كاریگه‌رییا وێ ژ تیرۆرا ب چه‌كی دژوارتر و به‌رده‌وامتره، چونكو داعش پرۆگرامێ قوتابخانه‌یان دانایه، شێوازێ ژیارێ بۆ ژن و زه‌لامان دانایه، شێوازێ ره‌فتاركرنا زه‌لامی دگه‌ل ژنێ دانایه، چه‌وانییا پێكئینانا پرۆسه‌یا هه‌ڤژینیێ و شێوازێ په‌روه‌رده‌كرنا زارۆیان لمال ژی دانایه، دێ چه‌وا ئایینێ خوه ب رێڤه‌به‌ن، ئه‌ڤه هه‌موو دێ بۆ پاشه‌رۆژا مووسل بنه مه‌ترسی”.
ئه‌ندامێ لژنه‌یا ئێمناهیێ ل جڤاتا پارێزگه‌ها نه‌ینه‌وا زه‌لالكر “پێدڤییه وه‌قفا سوننی ل مووسل نه‌مینیت، چونكو پترییا گۆتاربێژێن مزگه‌فتان ب شێوه‌یه‌كێ فه‌رمی ژلایێ حوكمه‌تێ ڤه ل مزگه‌فتان نه‌دهاتنه دانان و به‌رده‌وام توندره‌وییا ئایینی به‌لاڤ دكرن و داعش ژی ئه‌ڤ چه‌نده بۆ خوه ب ده‌لیڤه دیت”.
ناڤبۆری خویاكر”ستراتیژییا ده‌ستپێكێ یا داعش گرتنا باژێڕ و پارێزگه‌هان بوو، لێ نها زۆر لاواز بوویه، له‌وا دوماهی ستراتیژییا داعش دێ بكارئینانا شانه‌یێن نڤستی بیت”.
تُتاح هذه الصورة أيضا في: کوردی
