ژنه‌ك لسەر مۆبایلێ مێرێ خۆ دکوژت
خەندان 
ژنێک کە لەسەرئەوەی بەردەوام مێردەکەی مۆبایل بەکاردەهێنێت بە چەقۆ دەیکوژێت، دوای ئەوەی دەستگیردەکرێت لەبەردەم دادوەری لێکۆڵینەوە لە دادگا دەکەوێت بەسەر دەست و قاچی باوک و دایکی مێردەکەیی و داوای لێخۆشبوونیان لێدەکات.
ئەم ژنە کە تەمەنی ٢١ ساڵە و لە تارانی پایتەختی ئێران دادەنیشێت بۆ دادوەری لێکۆڵینەوە دەڵێت “ماوەیەک بوو مێردەکەم ئینتەرنێتی سیم کارتەکەی کارا کردبوو، هەموو ژیانی بە ئینتەرنێت و کاتبەسەربردن لە تۆڕە کۆمەڵایەتیەکان بەڕێدەکرد، بەردەوام خەریکی مۆبایلەکەی بوو، منیش گومان لا دروستبوو کە قسە لەگەڵ کەسێکی تر بکات و کەسێک بیەوێت بێتە ناو ژیانمەوە و لێم تێکبدات بۆیە شەوی ڕووداوەکە داوام کرد کە مۆبایلەکەیم بداتێ بۆ ئەوەی ئینتەرنێت بەکاربهێنم، بەڵام ئەو ڕەتیکردەوە و ئامادە نەبوو مۆبایلەکەیم بداتێ”.
ئەو ژنە بە گریانەوە بەردەوام بوو لە گێڕانەوەی ڕوداوەکە و وتیشی :دوای ئەوەی مێردەکەم ئامادەنەبوو بۆ یەک خولەک مۆبایلەکەی بدات بە دەستمەوە گومانەکانم زیاتر بوو، دەمەقاڵێ لەنێوانماندا دروستبو و منیش لەناکاو گازێکم لە دەستی مێردەکەم گرت، ئەویش هێرشی بۆ کردم و قژی ڕاکێشام و زۆری لێدام.
ئەو ژنە تۆمەتبارە ئاماژەی بە کاتی کوشتنی مێردەکەی کرد و وتی: کاتێک مێردەکەم لێیدام زۆر توڕە بووم و ڕۆیشتمە چێشتخانەکەوە و چەقۆیەکی گەورەم هێنا، لەو کاتەدا مێردەکەم خەریک بوو دەچووە دەرەوە چەقۆکەم بۆ وەشاند و ئەویش بە سودفە لای کردەوە و چەقۆکە کێشای بە سەر دڵیدا و گیانی لە دەستدا، هەر ئەو کاتە لە کارەکەم پەشیمان بووم، بەڵام پەشیمانی سوودی نییە.
دوای دانپێدانەکانی ژنەکە، دۆسیەکەی ڕەوانەی دادگا کرا و دادوەر بە ئامادەبوونی باوک و دایکی پیاوە کوژراوەکە دانیشتنی دادگای دەستپێکرد.
سەرەتا دادوەر وتەی باوک و دایکی کوڕەکەی وەرگرت و هەردووکیان داوای لەسێدارەدانی ژنەکەیان دەکرد بە تۆمەتی کوشتنی کەسێک بە ئەنقەست.
بەڵام ژنەکە بە گریانەوە داوای لێخۆشبوونی دەکرد و دەیوت: من بە ئەنقەست مێردەکەم نەکوشتوە من خەمی ژیانی هەردووکمان هەبووە ڕوداوەکە ئەنقەست نەبووە.
ژنەکە ڕویکردە باوک و دایکی مێردەکەی و وتی: تخوا دەرفەتم بدەنێ با کچە سێ ساڵەکەم خۆم بەخێوی بکەم، من پێنج ساڵ لەگەڵ کوڕەکەتان ژیاوم و هیچ كێشەم نەبووە.
بەڵام باوک و دایکی کوژراوەکە سوور بوون لەسەر لەسێدارەدانی ژنەکە و دادگاش بۆ لێکۆڵینەوەی زیاتر دۆسیەکەی بۆ دانیشتنێکی تر دواخست.
تُتاح هذه الصورة أيضا في: کوردی
