ئاواره‌یێن شنگالێ داخوازا هاریكاریان دكن
تۆرا لالش : رائد غانم
ل ناڤا گوند و كۆمه‌لگه‌هێن ئێزدیان ل سنوورێ پارێزگه‌ها دهۆكێ ب ده‌هان خێزانێن ئاواره‌یێن شنگالێ ل ده‌رڤه‌ى كه‌مپان دژین و ژیانه‌كا سه‌خت و دژوار ده‌رباز دكن،ئه‌ڤه ماوه‌یه‌كه هاریكارى ژلایێ رێكخراوان ڤه ل سه‌ر هاتینه برین و دبێ به‌هرن و داخواز دكن به‌لاڤكرنا هاریكاریان بسه‌ر واندا یا به‌رده‌وام بت.
خه‌لیل خه‌له‌ف،ئاواره‌یه‌كێ خه‌لكێ شنگالێ یه ل كۆمه‌لگه‌ها شاریا ئاكنجى یه بۆ ده‌نگێ لالش دیاركر،رۆژ بۆ رۆژێ ره‌وشا ئاواره‌یێن ده‌رڤه‌ى كه‌مپان ئالۆزتر دبت نه‌خاسمه پشتى رێكخستنێن مافێ مرۆڤى هاریكاریێن خۆ بۆ ئاواران كێمكرین و برین،نۆكه ب هه‌زاران خێزانێن خه‌لكێ شنگالێ ل ناڤ گوند و كۆمه‌لگه‌هێن ئێزدیان دا ئاكنجى نه و ژیانا خۆ ب دژوارى ده‌رباز دكن و ژ هاریكاریان دبێ به‌هرن،ئه‌ركێ حكومه‌تا به‌غدایه هاریكاریا خه‌لكێ شنگالێ بكن،لێ حكومه‌تا عێراقێ ب تمامى خه‌لك پشتگوه هاڤێتیه.
به‌رپرسێ بنگه‌هێ لالش تایێ شاریا،دلگه‌ش سه‌لیم،بۆ ده‌نگێ لالش گۆت:وه‌ك بنگه‌هێ لالش به‌رده‌وام ب رێیێن جودا جودا هاریكاریا ئاواره‌یێن ژده‌رڤه‌ى كه‌مپا دكه‌ین لدووڤ شیانێن خۆ،هنده‌ك داتایێن تایبه‌ت ب ئاواران ڤه چێكرینه ژ وان ژى داتا و ئامارێن خودان پێتڤیێن تایبه‌ت و رزگاربوویێن ژ ده‌ستێ داعش و بیژنا و داتایێن هه‌مه‌جۆر ل نك وان هه‌ینه و لدووڤ وان داتایان بنگه‌هێ لالش ب هه‌ڤكارى و هه‌ماهه‌نگى دگه‌ل رێكخراوان و كه‌سێن خێرخواز د ئاسته‌كا هه‌ره بلند دا وان كاریه هاریكاریا ئاواره‌یێن ژ ده‌رڤه‌ى كه‌مپێ بكن كرییه،دیسان دڤى ده‌مى دا ڤه‌كێشا رێكخراوێن بهێز دێ كارتێكرنه‌كا مه‌زن ل سه‌ر ئاواران كت،ژبه‌ركو ده‌ڤه‌را شنگالێ نه ده‌ڤه‌ره‌كا ئارامه خه‌لك بزڤرت،له‌وا دڤێت به‌رى هه‌ر تشتى شنگال بێته ئاڤاكرن و خزمه‌تگۆزارى ڤه‌گه‌رنه شنگالێ پاشى رێكخراو هاریكاریان ل سه‌ر ئاواران ببرن.
س.س
تُتاح هذه الصورة أيضا في: کوردی
