بنگەهێ لالش رۆلەكێ بەرچاڤ دگەهاندنا ئێش و ئازار و خزمەتكرنا جڤاكا ئێزدیان دا هەبوویە
تۆرا لالش:
ل رێككەفتی 12/5/1993 بنگەهێ لالش یێ رەوشەنبیری و جڤاكی لژێر دروشمێ (لالش كانیەكا زەلالە دهۆرتە د رۆبارێ رەوشەنبیریا كوردی دا) ل سەردەستێ كۆمەكا خەمخۆر و كەسایەتیێن ئێزدیان ب پشتەڤانیا حكومەتا هەرێما كوردستانێ هاتە دامەزراندن،هەر رۆژا دامەزراندنێ تا ئیرۆ رۆژ بنگەهێ لالش خزمەتەكا مەزن و دیار د بیاڤێن كەلتۆری و فلكلۆری و رەوشەنبیری و كۆمەلایەتی و ئاینی دا پێشكێشكریە،زێدەباری رۆلەكێ بەرچاڤ بۆ گەهاندنا ئێش و ئازارێن ئێزدیان هەبوویە.
دلڤین خەلەف،وەكو چالاكڤانەكا كچ لدۆر بیرەوەریا 29سالیا دامەزراندنا بنگەهێ لالش دیاركر،ب راستی دامەزراندنا بنگەهێ لالش پێنگاڤەكا گەلەكا باش و پێشكەفتی بوو ژبۆ ناساندن و گەهاندنا داب ونەریتێن جڤاكێ ئێزدیان دناڤ كۆمەلگەها كوردی دا ب شێوەیەكی بەرفرەهـ،هەروەسا بنگەهێ لالش د هەموو بیاڤان دا خزمەتەكا مەزن كریە لەوما رۆلێ بنگەهی بلند دنرخینم و جیێ سەرفەرازیا هەموو خەلكێ خۆ دبینین،بنگەهێ لالش هەموو جاران دگەل ئێش و ئازارێن مللەتێ خۆ یە و ب تایبەت د فەرمانا ئێزدیێن شنگالێ دا رۆلەكێ بەرچاڤ هەبوویە و خزمەتا خەلكێ خۆ كریە و دگەل سەركردایەتیا سیاسی یا كوردستانێ هەردەم داخوازا مافێ خەلكێ خۆ كریە و تا نها ژی ل سەر ئەڤێ خزمەتێ یێ بەردەوامە،دیسان بنگەهێ لالش هەردەم دناڤ خەلكێ شنگال دا بوویە و پشكداری ئێش و خەمێن شنگالیان دا بوویە و رۆلەكێ سەرەكی د خزمەتكرنا ئاوارێن ئێزدی یێن دناڤ كەمپان دا هەیە.
دبەردەوامیا ئاخفتنا خۆدا گۆت:هەر چەندە بنگەهێ لالش بتر ب بابەتێن جڤاكی و رەوشەنبیری ڤە گرێدایی بوویە، لێ فەرە بەرەفرەهتر خزمەتا گەنجان بكن و دگەل وان هاریكار بن و لێ خودان دەركەڤن، داكو گەنج ب رێیا بنگەهێ لالش پێنگاڤێن باش د هەموو بوارێن ژیانێ دا پاڤێژن،ژلایێ كۆمەلایەتی ڤە د هەموو بیاڤان دا رۆلەكێ كارا و بەرچاڤ هەبوویە، لێ ژبۆ ژنان و ئافرەتان دخوازین بنگەهێ لالش بتر هاریكار و پشتەڤان بت داكو د جڤاك و سازییان دا زێدەتر رۆلێ خۆ بگێرن.
نێچیرڤان فواد،قوتابیەكێ زانكۆیا دهۆكێ یە وەها دبێژت:بنگەهێ لالش هەر رۆژا دامەزراندنێ تا ئیرۆ رۆژ لژێر دروشمێ (لالش كانیەكا زەلالە دهۆرتە د رۆبارێ رەوشەنبیریا كوردی دا) خزمەتەكا مەزن و دیار د بیاڤێن كەلتۆری و فلكلۆری و رەوشەنبیری و كۆمەلایەتی و ئاینی دا پێشكێشكریە و ل سەر هەمان رێ هێشتا یێ بەردەوامە،شوون تبلێن بنگەهی د دیارن و كارێن گەلەك باش د درێژاهیا ژیێ خۆ دا ئەنجام داینە و بەردەوام رەسەنایەتیا زمانێ كوردی پاراستی یە، ژلایەكێ دی ڤە ب رێیا راگەهاندنا بنگەهێ لالش و د گەهاندنا ئێش و ئازارێن ئێزدیان بۆ كوردستانێ و جیهانێ و چاپكرنا پەرتۆكان و بەرهەمێن چاپێ خزمەتا ئێزدیان كریە و هەردەم خۆ ل هەموو تەخ و چینێن جڤاكێ ئێزدی كریە خودان ب تایبەت تەخا گەنجان كو بەردەوام پالپشت بوویە و خۆ ل داخوازیێن گەنجان كریە خودان،بنگەهێ لالش ب دەهان و سەدان گەنج و خۆرتێن كچ و كور و رەوشەنبیر و زانا دناڤ ئۆرگانێن بنگەهی دا ژبۆ خزمەتكرنا ئێزدیان و ئێزدیاتیێ هەنە ل سەر رێیا راست و دروست و بەرسنگگرتنا هزر و بێرێن ئێزدیاتیێ كو ئێزدی مللەتەكێ خودێ ناس و باوەری ب ئێكانیا خودێ هەیە و خزمەتا كوردستانێ دكن و بەردەوام هەول و بزاڤێن وان ل هەر جیەكی هەینە.
هەروەسا رۆژنامەڤان سەردار گۆلو دیاركر،بنگەهێ لالش هەر ژ دەستپێكا دامەزراندنێ و تا نۆكە پێگەهەك بوویە بۆ ناسینا ئێزدیاتیێ بۆ جیهانێ و هشیاركرنا جڤاكی ب تایبەت گەنجان داكو ب ئاخ و وەلاتێ خۆڤە بێنەگرێدان، هەروەسا هاریكاریكرنا قوتابیان و دابینكرنا دەرفەتێن كاری بۆ گەنجێن جڤاكی بەردەوام بنگەهێ لالش د ئەڤان بیاڤان دا رۆلێ خۆ گێرایە، دخوازم ئەندام و كادرێن بنگەهێ لالش هەروەكو چاوان خودێ ژێ رازی شێخ شامۆ د ژیانا خۆ دا كاری بوو ب هەموو ئاوایەكی دگەل خەلكێ خۆبت و هەموو هەول ددان تاكو خزمەتا قوتابیان و تەخا گەنجان بكت،لەورا دخوازن ئەندام و كادرێن بنگەهێ لالش ل سەر ئەڤێ رێبازا پیرۆز بەردەوام بن و بپارێزن،ژلایەكێ دی ڤە دەمێ كۆمكوژیا ئێزدیان ل سالا 2014ێ ل سەردەستێ رێكخراوا تیرۆرستیا داعش هاتیە ئەنجام دان و خەلكێ شنگالێ ئاوارەی هەرێما كوردستانێ بووین بنگەهێ لالش رۆلەكێ مەزن د خزمەتكرنا ئاواران و پێشكێشكرنا خزمەتگۆزاریان بخۆ ڤە دیت و دگەهاندنا گلی و گازندێن ئاواران بۆ جیێن شۆلەژێ بنگەهێ لالش ب رۆلێ خۆ رادبت.
تُتاح هذه الصورة أيضا في: کوردی
