كەسایەتی و رەوشەنبیرێن كوردستانێ رۆلێ بنگەهێ لالش بلند دنرخینن
بنگەهێ لالش د29 سالان دا رەسەنایەتیا رەوشەنبیریا كوردی و كەلتۆر و فلكلۆرێ ئێزدیان ناساند
تۆرا لالش:
كەسایەتی و رەوشەنبیرێن كوردستانێ ددەنە خویاكرن كو بنگەهێ لالش د 29 سالێن تەمەنێ خۆ دا كاریە دەرگەهان ب سەر گەنجینەیا دەولەمەندا ئاینێ پیرۆزێ ئێزدی بۆ ڤەكۆلەر و شەیدایێن ئاینێ ئێزدیان دا ڤەكەت و خزمەتەكا بەرچاڤ بۆ ئێزدیان كریە د بیاڤێن رەوشەنبیری و كەلتۆری و كۆمەلایەتی دا و رەسەنایەتیا رەوشەنبیریا كوردی و نەتەوا كوردی بۆ هەموو پێكهاتێن ل كوردستانێ دژین و كەلتۆر و فلكلۆرێ ئێزدیان ناساندیە.
عەبدالرزاق عەلی،رێڤەبەرێ رادیۆیا دەنگێ كوردستانێ بۆ دەنگێ لالش دیاركر،د ساخكرنا ئەڤێ بیرەوەریێ دا نابت رۆلێ خودێ ژێ رازی (پیر خدر سلێمان و شێخ شامۆ) بێتە ژبیركرن،ژبەركو دوو كەسایەتی و كوردپەروەر و نیشتیمان پەروەرێن كوردستانێ و ئێزدیخانێ بوون و خزمەتەكا مەزن پێشكێشكرینە،هەروەسا بنگەهێ لالش چەند بۆ كۆمەلگەها ئێزدیان گرنگە هەر ب هەمان شێوە بۆ كەلتۆر و رەوشەنبیریا كوردستانێ ژی گرنگە،ئەوا بنگەهێ لالش دكت ناساندنا رەسەنایەتیا رەوشەنبیریا كوردی و رەسەنایەتیا نەتەوا كوردی بۆ هەموو پێكهاتێن ل كوردستانێ دژین و كارەكێ دن یێ بنگەهێ لالش ناساندنا كەلتۆر و فلكلۆرێ ئێزدیانە و ڤی بنگەهی رۆلەكێ مەزن د بیاڤێ پێكڤەژیانێ دا گێرایە.
هەروەسا نێچیرڤان حسێن،سكرتێرێ ئێكەتیا قوتابیێن كوردستانێ بۆ دەنگێ لالش دبێژت:بنگەهێ لالش خزمەتەكا بەرچاڤ بۆ ئێزدیان كریە د بیاڤێن رەوشەنبیری و كەلتۆری و كۆمەلایەتی دا و شوون تبلێن وان د دیارن، د هەمان دەمدا د سالێن بۆری دا داكو قوتابی ژ پرۆسێسا خووندنێ ڤەنەقەتن بەردەوام پالپشتی و هاریكاریا قوتابیان كریە،دیسان وەكو دەزگەهەكی كاریە خزمەتا قوتابیان بكت جیێ رێز و پێزانێن ئێكەتیا قوتابیایێن كوردستانێ یە و بلند د نرخینین،هیڤیدارین بنگەهێ لالش ل سەر خزمەتكرنا دۆزا رەوایا گەلێ كوردستانێ و تایبەت د خزمەتكرنا كوردێن ئێزدی دا بەردەوام بن.
ژئالیێ خۆڤە نامق هەورامی،ڤەكۆلەرێ ئاینێن كەڤنارێن زاگرۆس و رێڤەبەرێ راگەهاندن و پەیوەندیان ل وەزارەتا رەوشەنبیری و لاوان بۆ دەنگێ لالش گۆت:د 29 سالێن تەمەنێ خۆ دا بنگەهێ لالش كاریە دەرگەهان ب سەر گەنجینەیا دەولەمەندا ئاینێ پیرۆزێ ئێزدی بۆ ڤەكۆلەر و شەیدایێن ئاینێ ئێزدیان دا ڤەكەت، دخوازم ئەڤ ناڤەندا خۆشتڤی بتر و بتر زانیاریان ل دۆر داب و نەریت و قەول و بەیتان بەلاڤ كەت،داكو ئەوێن دخوازن ژ ڤی ئاینی تێبگەهن ژ ژێدەرێن باوەرپێكری فێرببن و ژبەركو پشكەك ژ نڤیسەرێن بیانی دیرۆكا ئێزدیان شێواندی یە چ مەبەست یان بێ مەبەست،ئەم وەكو وەزارەتا رەوشەنبیری و لاوان ب رێزڤە تەماشەی بنگەهێ لالش دكەین ژبەركو خزمەتەكا دێرینا كوردان كریە و ئاستێ رەوشەنبیریێ ئێزدیان نیشان ددەت.
ئەمیر عەلی،رێڤەبەرێ پێكڤەژیانا ئاینان ل وەزارەتا ئەوقاف و كاروبارێن ئاینی بۆ دەنگێ لالش دیاركر، بنگەهێ لالش دماوێ ڤان سالێن بۆری دا خزمەت كریە و بوویە پرا پەیوەندیان دناڤبەرا ئاین و ئاینزانان، هەروەسا هەردەم پەیوەندیێن مە دگەل بنگەهێ لالش د خورت بووینە و ئامادەی وخۆشحالیا دەردبرین ل هەر دەمەكی هەڤكار وهەماهەنگ بن ل هەر پرۆژەیەكی دا دگەل بنگەهێ لالش،كو خزمەتا ئاشتیا ناڤبەرا پێكهاتەیان دا بكت.
تُتاح هذه الصورة أيضا في: کوردی
