“شانده‌كی بلند یێ فه‌ره‌نسی سه‌ره‌دانا په‌رستگه‌ها لالش كر”
تۆرا لالش یا راگه‌هاندنێ/ په‌رستگه‌ها لالش
شانده‌كی بلند یێ فه‌ره‌نسی ب سه‌رۆكاتیا ” كوندال برویارد” ئه‌ندامێ جڤاتا نشتیمانی یا فه‌ره‌نسی و ” جواشان ئاكیم ” جێگرێ جڤاتا نشتیمانی یا فه‌ره‌نسی و ” برنوئاوبیر” بالیۆزێ فه‌ره‌نسا ل به‌غدا و ” جون نویل” شیره‌تكارێ ره‌وشه‌نبیری ل بالیۆزخانا فه‌ره‌نسا سه‌ره‌دانا په‌رستگه‌ها پیرۆزا لالش كر.
ئیرۆ پێنج شه‌مبوویێ 11ی ته‌مووزا 2019ێ شانده‌كی بلند یێ فه‌ره‌نسی ب سه‌رۆكاتیا ” كوندال برویارد” ئه‌ندامێ جڤاتا نشتیمانی یا فه‌ره‌نسی و ” جواشان ئاكیم ” جێگرێ جڤاتا نشتیمانی یا فه‌ره‌نسی و ” برنوئاوبیر” بالیۆزێ فه‌ره‌نسا ل به‌غدا و ” جون نویل” شیره‌تكارێ ره‌وشه‌نبیری ل بالیۆزخانا فه‌ره‌نسا سه‌ره‌دانا په‌رستگه‌ها پیرۆزا لالش كر و ژبال به‌رێزان “شێخ شامۆ” شیره‌تكارێ سه‌رۆكێ حكومه‌تا هه‌رێما كوردستانێ بۆ كاروبارێن ئێزدیان و “عسمه‌ت ته‌حسین به‌گ “و ژماره‌كا ئه‌ندازیارێن سه‌رپه‌رشتێن ئاڤه‌دانكرنا په‌رستگه‌ها لالش و زه‌لامێن ئایینی ڤه هاته پێشوازیكرن.
به‌رێز” شێخ شامۆ” شیره‌تكارێ سه‌رۆكێ حكومه‌تا هه‌رێما كوردستانێ بۆ كاروبارێن ئێزدیان دیاركر: ” ژیانا ئاواران ل كه‌مپان دا زۆر یا ب زه‌حمه‌ته و ئه‌ڤ ره‌وشا ناله‌بار درێژبوو،ره‌وش گونجای نینه خێزانێن ئێزدی ل شنگال بچنه ده‌ڤه‌رێن خۆڤه كو هێش ده‌ڤه‌ر ئارام نینه و چه‌ندین باسك تێدانه،زێده‌باری نه‌بوونا پێتڤیێن ژیانا رۆژانه ژبه‌ر زیانا ب وان ده‌ڤه‌ران كه‌فتی پشتی هاتنا داعش”.
” شێخ شامۆ” گۆت: ” مه دڤێت بێژینه وه ژ سالا 1991ێ وه‌ره ل رۆژانێن كۆچا ملیۆنی یا گه‌لێ كوردستانێ خانم دانیال میرتان و حكومه‌تا فه‌ره‌نسا لگه‌ل گه‌لێ كوردستانێ بوویه ب هه‌موو پێكهاته‌یان ڤه و ئه‌ڤ پشته‌ڤانی یا به‌رده‌وامه هه‌تا ئیرۆ رۆژ و هه‌لویستێ حكومه‌تا فه‌ره‌نسا یێ خویابوو ل ده‌ما ده‌ست بسه‌رداگرتنا داعش بۆ ده‌ڤه‌رێن مه” .
هه‌روه‌سا سه‌رۆكێ شاندێ فه‌ره‌نسی گۆت: ” ئه‌ڤه سه‌ره‌دانا دووێ یه بۆ ڤی جیێ پیرۆز و سه‌ره‌دانه‌كا گرنگه كو هایداری داخوازیێن ئێزدیان ببین و دگه‌ل بارودۆخێ تێدا ده‌رباز دبن بین،دوهی لگه‌ل به‌رێز شێخ شامۆ ل هه‌ولێرێ به‌حس ل ژیانا ئێزدیان ل كه‌مپان و زیانا ب شنگال كه‌فتی كر”.
پاشی شاندی گه‌ریانه‌ك دناڤ هندروێ په‌رستگه‌هێ دا كر بۆ زانینا فه‌لسه‌فا ئایینێ ئێزدیان و ژئالیێ به‌رێز ” كه‌ریم سلێمان” شیره‌تكارێ جڤاتا رۆحانیا ئێزدیان ڤه هێمایێن ئایینی لسه‌ر دیوارێن په‌رستگه‌هێ و رێوره‌سمێن ئایینی یێن تێنه گێران بۆ شاندی هاتنه شلۆڤه‌كرن.
ل داویا سه‌ره‌دانێ به‌رێز”شێخ شامۆ” ژماره‌كا په‌رتۆكان لدۆر په‌رستگه‌ها لالش و فه‌لسه‌فا ئایینێ ئێزدیان پێشكێشی شاندی كرن.
تُتاح هذه الصورة أيضا في: کوردی
