جڤاتا رۆحانیا ئێزدیان بریارێن تایبه‌ت بۆ جه‌ژنا جه‌مایێ ل په‌رستگه‌ها لالش ده‌ركرن
باسنيوز:
راوێژگارى جڤاتا روحانیا ئێزدیان بۆ(باس) دیاركر:” ئه‌ڤ سالا بریارێن تایبه‌ت بۆ جه‌ژنا جه‌مایێ ل په‌رستگه‌ها لالش هاتنه ده‌ركرن ونابیت گه‌نج بتنى بهێته لالش پێدڤیه دگه‌ل خێزانا خوه بیت وهه‌لگرتنا چه‌كى ژى هاته قه‌ده‌غه‌كرن و نابیت هه‌موو تشت بهێنه ناڤ په‌رستگه‌ها لالش دا”.
خدر دێر خانه‌سۆرى، راوێژگارى جڤاتا روحانیا ئێزدیان بۆ (باس) دیاركر:” ب هیچ ره‌نگه‌كى نابیت هیچ كه‌سه‌ك ڤه‌خۆارنێن قه‌ده‌غه‌كرى بینته په‌رستگه‌ها لالش ونابیت ژى ئامیرین موسیقى ژى بهێنه ناڤ په‌رستگه‌ها لالشى دا هه‌روه‌سا ژى چه‌ك هه‌لگرتن ل په‌رستگه‌ه لالش هاته قه‌ده‌غه‌كرن ب هیچ ره‌نگه‌كى نابیت كه‌س چه‌كى ل په‌رستگه‌ها لالش هه‌لگرت و پێدڤیه ل سه‌ر هه‌موو كه‌سێن ئێزدى ده‌مێ قه‌ستا په‌رستگه‌ها لالش دكه‌ن جل وبه‌ركێن ستاره بن ونابیت ئجل وبه‌ركێن بێ ستاره كه‌س بهێته گه‌لیى لالشى دا چونكو جهه‌كى پیروز ئولا ئێزدیانه پێدڤیه رێز لێ بهێته گرتن هه‌روه‌سا ژى پێدڤیه پاقژ راگرتنا لالش بهێته پاراستن ل سپێده‌هیا هه‌تا ئێڤارى دێ په‌رستگه‌ه لالش یا ڤه‌كرى بیت خه‌لك دشین قه‌ست بكه‌نى پێدڤیه بریارێن جڤاتا روحانیا ئێزدیان بۆ به‌رژوه‌ندیا هه‌موو خه‌لكى مه جه بینن”.
ئاشكرا كركو ئه‌ڤ بریارێن هاتینه دان ژ نوكه پێدڤیه دهێنه بجه ئێنانا هه‌موو هه‌لكه‌ڤت وجه‌ژن وبیروه‌رین ئۆلا ئێزدیان پێدڤیه پێگیریى پێ بهێته كرن ژلایێ وان كه‌سێن قه‌ستا په‌رستگه‌ها لالش دكه‌ن یێ پێگیرى ژى پێ نه‌كه‌ت رێك پێ ناهیته دان بچته ناڤ په‌رستگه‌ها لالشێ دا”.
خواجه خه‌تارى، ئولدارى ئێزدیان بۆ (باس) دیاركر:” جه‌ژنا جه‌مایێ ئێكه ژ جه‌ژنێن دێرینێن ئێزدیان رێ وره‌سمێن وێ بۆ ده‌مێ حه‌فت رۆژان ل په‌رستگه‌ها لالش دهێنه گێران ل رۆژا شه‌مبیى 6/10 ده‌ست ب گێرانا رێ وره‌سمێن جه‌ژنا جه‌مایێ دهێته كرن هه‌تا رۆژا 12/10/2018 رێ وره‌سمێن جه‌ژنا جه‌مایێ دهێنه گێران و هه‌موو ئێڤاریا چرایێن ئاقد ونیشانگه‌هیێن خاسا دهێنه ڤێخستن هه‌ر ئێزدیه‌كى قه‌ستا لالش بكه‌ت پێدڤیه د سه‌ر پرا سه‌لاتێرا بچیت ومه‌زارگه‌ه وخاسا زیاره‌تى بیت وهه‌موو ئێڤاریا سه‌ما دهێته كێشان وقه‌ول وبه‌یت و قه‌سیده دهێنه گۆتن”.
ئه‌وژى دیاركر:” ل رۆژا چارێ ژ جه‌ژنێ په‌رى دهێته سواركرن ورۆژا پێنجێ یا جه‌ژنێ رێ وره‌سمێن قه‌پاغێ دهێنه كرن ورۆژا دووڤدا ژى به‌رى شباكێ دهێته سواركرن هه‌ر كه‌سه‌كى نه‌مۆركرى بیت ب ئاڤا كانیا سپى دهێته مۆركرن وسه‌رده‌ریێن خاسا سماتێ چێدكه‌ن خه‌لك هه‌موو قه‌ستا په‌رستگه‌ها لالش دكه‌ن بۆ گێرانا رێ وره‌سمێن جه‌ژنا جه‌مایێ”.
خواجه خه‌تارى، گۆت:” چرا ڤێخستن نیشانا پیرۆزیا رۆناهیێ وئاگرییه و ده‌ربازبوون دسه‌ر پرا سه‌لاتێرا نیشانا پاككرنا نه‌فس وجانى یه ژ گوننه‌ها ومۆركرن ژى فه‌رزه‌كه ژ فه‌رزێن ته‌ریقه‌تێ ونیشانه بۆ پاككرنا حه‌لالكرنا مرۆڤى ئێزدى ژ هه‌موو جه و ده‌ڤه‌ران و ده‌وله‌تان بۆ گێرانا رێ وره‌سمێن جه‌ژنا جه‌مایێ قه‌ستا په‌رستگه‌ها لالش دكه‌ن”.
كوردێن ئێزدى هه‌شت جه‌ژن هه‌نه ژ وانا ژى رێ وره‌سمێن پێنج جه‌ژنا ل ناڤ جڤاكى دهێنه گێران و سێ جه‌ژن ل په‌رستگه‌ها لالش دهێنه گێران ئه‌وژى جه‌ژنا چلێ هاڤینێ و جه‌ژنا زڤستانێ و جه‌ژنا جه‌مایێ، هه‌روه‌سا جه‌ژنا سه‌ر ساڵێ و جه‌ژنا رۆژیێن ئێزى وجه‌ژنا بێلندێ وجه‌ژنا خدر ئلیاس وجه‌ژنا قوربانێ ل ناڤ جڤاكى دهێنه كرن.
تُتاح هذه الصورة أيضا في: کوردی
