مامۆستایێن وانەبێژ ل قوتابخانێن كەمپا بێرسڤێ مووچێ چار هەیڤا وەرنەگرتیە
تۆرا لالش یا راگەهاندنێ/لەیت حسێن
ل كەمپا بێرسڤێ2،مامۆستایێن وانەبێژ یێن سەر ب پەروەردا شنگال یا زمانێ كوردی ڤە مل ب ملێ مامۆستایێن دلسۆز ماندی نە و بەردەوامن لسەر ئەركێ خۆ بۆ پێشكێشكرنا وانان بۆ قوتابیان،هەر ژ دەستپێكا سالا نوو یا خووندنێ و هەتا نهۆ چ مووچە وەرنەگرتینە و پێنووسێن نڤیسینا وانەیان بۆ قوتابیان ژ بەریكا خۆ دكرن،رێڤەبەرێ قوتابخانا بێرسڤێ4 یا ئامادەیی ژی دبێژت:ئەڤە چار هەیڤ دەربازبوون مووچێ وانەبێژان نەهاتیە دابینكرن وب هەماهەنگی دگەل رێڤەبەریا كەمپێ مە ناڤێن وان یێن داینە هندەك رێكخراوان بۆ هاریكاریێ.
(سادق ئیسماعیل) مامۆستایەكی وانەبێژە ل قوتابخانا بێرسڤێ4 یا ئامادەیی دیاركر،هەتا رێژەیەكا بلند ژیانا مامۆستایان سەر مووچەیی یە ومافەكی رەوایە مووچەیێ وان بێتە دان،ئەڤە ماوێ چەند هەیڤایە دسالا بۆری دا و هەتا نهۆ مە مووچە وەرنەگرتی،دنهۆ دا ل هەر قوتابخانەكێ رێژەیەكا ژ مامۆستایێن وان دكێمن و پێتڤی ب وانەبێژانن و وانەبێژ هەتا نهۆ مل ب ملێ مامۆستایێن دلسۆز ماندی نە و بەردەوامن لسەر ئەركێ خۆ بۆ پێشكێشكرنا وانان بۆ قوتابیان،سەبارەت سەرەدەریكرنا قوتابیان دڤێ رەوشی دا بەرامبەر مامۆستایان ب شێوەیەكی گشتی تا رادەیەكی باشە،لێ هندەك حالەتێن خراب و نە چاڤەرێكری ژی هەبوون،لێ ئەڤ چەندە نابت خرابی بۆ گشت قوتابیان ومامۆستا رێ نیشاندەرێ قوتابیە بێگومان ئەركە رێز ل وان و ماندیبوونا وان بێتە گرتن.
هەروەسا (ئەحمەد دەخیل)وانەبێژەكی دی یە ل هەمان قوتابخانە دبێژت:ئەم وەكو وانەبێژ هەر ژ دەستپێكا سالا خووندنێ هەتا نهۆ مە چ مووچە وەرنەگرتینە،بێگۆمان ئەگەر هات و رەوش بڤی شێوەی بمینت دێ زەرەرەكا زۆر هەبت لسەر پرۆسا خووندنێ،دیسان هەتا رادەیەكی سەرەدەریا قوتابیان یاباشە دگەل مامۆستایان لێ ل ڤێ قەیرانێ دا چ هاریكاریێن ماددی ژلایێ هیچ كەسەكی ڤە نەهاتینە كرن و هەتا نهۆ ژی پێنووسێن نڤیسینا وانەیان بۆ قوتابیان ژ بەریكا خۆ دكرن سەرەرای وێ ماندووبوونا ئەم دبینن،داخوازا مە ژ حكومەتا هەرێما كوردستانێ ئەوە مووچەیێ مامۆستا و وانەبێژان بێتە دابینكرن.
لدۆر ڤێ چەندێ رێڤەبەرێ قوتابخانا ناڤبری(عەباس خەلەف)گۆت:رەوشا وانەبێژا گەلەك خرابە ژبەر وەرزێ ئێكێ ب داوی هات وهەتا نهۆ چ بۆ وانەبێژا نە هاتیە دابینكرن،مە وەكو كارگێریا ئامادەیا خۆ داخوازی ژ هەموو لایان كریە بۆ چارەسەركرنا ڤێ ئاریشێ،بەری نهۆ ژی چ مووچە بۆ وانەبێژا نەهاتیە دان،هەروەسا وەكو كارگێریا قوتابخانێ مە یا گۆتیە رێڤەبەرێ پەروەردێ كو وانەبێژ پێتڤی ب هاریكاریێ نە،ئەڤە چار هەیڤ دەربازبوون بێ كو مووچێ وان وانەبێژان بێتە دابینكرن،دیسا ب هەماهەنگی دگەل رێڤەبەریا كەمپێ مە ناڤێن وان وانەبێژان یێن كو نهۆ وانان بۆ قوتابیان ل قوتابخانێ دبێژن یێن داینە هندەك رێكخراوان بۆ هاریكاریێ،ئەم نكارین چ تشتەكی بكەین ژبەر رێڤەبەریا پەروەردێ كۆمكرنا دراڤی قەدەغە كریە،بارێ خەلكێ مە دكەمپان دا یێ لاوازە وخەلك ئاوارەبووینە ئەڤ هەموو كارتێكرن وەسا دكن كو ئەم نكارین تشتەكی بكەین،نهۆ گەلەك وانەبێژ هاتینا قوتابخانێ كو مفایی بگەهیننە خەلكێ خۆ و هندەك وانەبێژ ل قوتابخانا مەنە ژ رۆژا ئێكێ یا قوتابخانا هاتیە ڤەكرن دەوامێ دكن وهەتا نهۆ وان بەحسی چ تشتی نەكریە،بەرامبەر هندەك وانەبێژان ل دەستپێكا وەرزێ دووێ قوتابخانا ب جیهێلان ،ئەم هەموو دبارەكی نە باش دا دبۆرن ژبەر ڤێ قەیرانا دارایی یا هەرێما كوردستانێ ڤەگرتی گەلەك كارتێكرن لسەر هەموویێ كریە و ئەڤ قوتابی ژی هەر ئەون زارۆك وخەلكێ ڤان مووچە خۆرانن،ژبەر ڤێ چەندێ ئەم نكارین چ فشارێ بێخنە سەر وان.
تُتاح هذه الصورة أيضا في: کوردی
