ئێزدیێن عه‌فرینێ ئاوارەیی شكەفتان دبن
باسنيوز:
ل گۆرەی راپۆرتەكا مالپەرێ (ئێزدینا)، هژمارەكا ئێزدیێن وان گۆندێن نێزیكی باژێرێ عفرینێ ئاوارەی شكەفتان دبن بۆ خوە پاراستنێ ژ شەرێ وەلاتێ توركیا ل سەر باژێرێ عفرینێ.
ل دووڤ وێ راپۆرتان مالپەرێ (ezdina.com)، ل دەوروبەری باژێركێ عفرینێ ل چیایێ لیلۆن و ل دەوروبەرێن دەڤەرا شیراوا یێن چیایی، هژمارەكا مەزن یا گوندێن ئێزدی هەیە و ژ وان گۆندان (باسۆڤان، باعی، براد، كیمار، ئیسكا، شادیرە، غەزاویە، برج عەبدالو و عین دار) و ئەو ئێزدیێت ل ڤان دەڤەران دژین ژ نیڤا خەلكێ وێ پترن.
ئاشكرا ژی كریە، ل ڤان چەند رۆژێن بۆری گۆندێ باسۆڤان تووشی توپبارانەكا گەلەك ب تۆند بوویە و خەلكێ هەردوو گۆندێن ئیسكا و شادیرە ژی هەموو ئاوارە بووینە و ژ مەترسیا شەری و كۆشتن و كۆمكۆژیێ خوە دپارێزن. د سەر وێ یەكێ ژی را كو ل هندەك گۆندێن ئێزدیان هێشتا د هێمن و شەر لێ نەهاتیە كرن، بەلێ خەلكێ وان دەڤەران ژ ترسان دا هەر درەڤن و ئاوارە دبن.
مالپەرێ ئێزدینا ئەو یەك ژی ئاشكرا كریە كو پتریا ئەو ئێزدیێن نها ل دەوروبەری عفرینێ دژین ئامادەكاریێن رەڤینێ و ئاوارەبوونێ كرینە و د بەرهەڤیان دانە بۆ هەر ترسەكا ل سەر گۆند و دەڤەرێن وان پەیدادبیت و هندەك خێزان هەر نها بەرەڤ شكەفتان چووینە.
پێشتر، كەریم سلێمان راوێژكارێ ئەنجومەنێ رۆحانی یێ ئێزدیان بۆ (باسنیۆز) راگەهاند بوو، دیاركر كو نێزیكی 25 هزار ئێزدیان ل وەلاتێ سۆریا دژین و بەشەك ژ وان ل باژێرێ عفرینێ دژین و نها ل ژێر مەترسیا كۆمكۆژیێ نە و ژیانا وان د مەترسیێ دایە. ناڤبری ئاشكرا ژی كر كو نێزیكی 25 هزار كوردێن ئێزدی ل وەلاتێ سۆریا دژین و ئەو ژی وەكو هەموو كوردان ل سەر چوار وەلاتان پشتی شەرێ جیهانی یێ ئێكێ ل سالا 1914 دابەش بووینە و نها ژ بەر تێكچوونا رەوشا سۆریا و شەرێ ل سەر عفرینێ، ئێزدی بۆ وەلاتێن دەرڤە و ئەورۆپا مشەخت دبن دا خۆ ژ مەترسیا كۆشتنێ و كۆمەلكۆژیێ بپارێزن.
تُتاح هذه الصورة أيضا في: کوردی
