وەلاتیێن دێرەبوونێ داخوازا دروستكرنا پرەكا پەیادێ دكن
تۆرا لالش یا راگەهاندنێ
گوندێ دیرەبوونێ دكەڤتە سەر رێیا سەرەكی و هاتووچوونەكا زۆر ژ ترومبێلێن بارهلگر ل سەر دئێتەكرن و قەلەبالغ لێ پەیدا دبت،لەوا وەلاتیێن گوندی دخوازن پرەكا دەربازبوونا پەیادەیان بۆ وان بێتە دروستكرن.
وەلاتی”زیاد ئەحمد”بۆ رۆژناما دەنگێ لالش دیاركر:”دروستكرنا پرەكێ بۆ مە گەلەك گرنگە،ژبەركو پتریا فروشگەهێن كەل و پەلێن خوارنێ وبازارێ زەرزەوات وفێكی و زێدەباری كەل وپەلێن جۆراوجۆرێن كو گرێدایی ب ژیانا وەلاتیان ڤە،دكەڤنە ئالیێ دی یێ جاددا سەرەكی ,ئەڤجا داخوازا مە ژ جهێن پەیوەندیدار ئەوە ب زووترین وەخت پرەكا پەیادا بۆ مە بێتە دروستكرن”.
هەروەسا وەلاتی”عزەت قەوال” بۆ رۆژناما دەنگێ لالش دبێژیت:”ڤێ رێیا سەرەكی گەلەك كارتێكرن ل هاتوو چوونا مە كرییە ب تایبەت دەمێ زارۆكێن مە دچنە قوتابخانێ،چنكو رێیەكە بەردەوام هاتن وچوونا ترومبێلێن بارهلگرو تانكەرێن نەفتێ ل سەر دئێتەكرن و دوو كۆمپانیێن نەفتێ هەنە ل نیزیك گوندێ مە كارتێكرنەكا راستەوخۆ ل سەر ڤێ رێیێ هەینە,هیڤیخوازم ژ جهێن بەرپرس كو پرەك بۆ دەربازبوونا وەلاتیان بێتە دروستكرن،داكو خەلكێ مەیێ پاراستی بن ژ هەموو جۆرە روودانێن دلتەزین ونەچاڤەرێكری”.
تُتاح هذه الصورة أيضا في: کوردی
