حسێن قائیدی: ل ده‌ما رزگاركرنا مووسلێ دڤێت ژن و زارۆكێن ماینه د ده‌ستێ داعشێ دا بهێنه رزگاركرن
ئێزديخان نيوز:
رێڤه‌به‌رێ نڤیسینگه‌ها رزگاربوویان ل پارێزگه‌ها دهۆكێ راگه‌هاند؛ ل ده‌ما رزگاركرنا مووسلێ دڤێت هه‌موو بزاڤ بهێنه‌كرن، ژن و كچ و زارۆیێن ماینه د ده‌ستێ تیرۆرستێن داعشێ دا ب سلامه‌تی بهێنه رزگاركرن.
حسێن قائیدی، رێڤه‌به‌رێ نڤێسینگه‌ها رزگاربوویان ل پارێزگه‌ها دهۆكێ گۆت: ل ده‌ما رزگاركرنا مووسلێ و ده‌ستپێكرنا ئۆپه‌راسیۆنا وێ پارێزگه‌هێ، فه‌ره هێزێن ئێمناهییا ئیراقێ و هێزێن پێشمه‌رگه‌ی و هه‌ڤپه‌یمانان ب رژدی كاری بۆ رزگاركرنا كه‌سێن د ده‌ست تیرۆرستاندا ل وێ پارێزگه‌هێ ماین بكه‌ن، هه‌روه‌سا دوپاتكر ژی وان زانیاری هه‌نه كو هه‌ژماره‌كا مه‌زن یا ژن و زارۆیان ل وێ پارێزگه‌هێ نها د بن ده‌ستێ تیرۆرستان دا ماینه.
قائیدی، نه‌ڤه‌شارت كو هێزێن ئێمناهیێ و هێزێن پێشمه‌رگه‌ی دێ كاری ژ بۆ ڤێ یه‌كێ كه‌ن، لێ دوپاتكر؛ ئه‌و د خوازن د ئۆپه‌راسیۆنێن جودا و نهێنی دا ئه‌و بهێن رزگاركرن، چونكی ل ده‌ما شه‌ڕی ترسا بۆمبه‌بارانكرنێ ژ ئالیێ فرۆكه‌یان ڤه ئه‌گه‌ره‌كێ سه‌ره‌كی یه.
هه‌روه‌سا گۆتژی؛ دبت داعش ل ده‌ما ره‌ڤینێ به‌ری ده‌ستپێكرنا ئۆپه‌راسیۆنێ وان د گه‌ل خوه به‌ره‌ڤ سووریا ببه‌ن، لێ دڤێت هه‌ڤپه‌یمان ب هووری چاڤدێریێ ل سه‌ر ڤێ یه‌كێ بكه‌ن و زانیارییان وه‌رگرن و هه‌ر زوو وان رزگاربكه‌ن.
هه‌روه‌سا حسێن قائیدی، خواست ژی ل ده‌ما رزگاركرنێ ئه‌و د گه‌ل ئاواره‌یێن دی نه‌هێنه تێكهه‌لكرن و هه‌ر زوو ب نڤێسینگه‌ها كاروبارێن ره‌ڤاندییان ل سنۆرێ پارێزگه‌ها دهۆكێ بكه‌ن بۆ وێ یه‌كێ ب هووری ژ ئالیێ ساخله‌می و چاڤدێریێ ڤه د هاریكاربن د گه‌ل وان رزگاربوویێن ده‌ستێ تیرۆرستان.
حسێن قائیدی نه‌ڤه‌شارت كو ئۆفیسا كاروبارێن ره‌ڤاندییان هه‌موو به‌رهه‌ڤی كرینه ل ده‌ما ده‌ستپێكرنا ئۆپه‌راسیۆنا رزگاركرنا مووسلێ و ئاشكراكر؛ ئه‌و ب هه‌موو ره‌نگان دێ بزاڤان كه‌ن قوربانیێن ده‌ستێ داعشێ د گه‌ل ئالیێن فه‌رمی ب پارێزن .
تُتاح هذه الصورة أيضا في: کوردی
