بنگەهێ لالش دووەمین سالیادا گوندێ كۆچۆ ل دهۆكێ ساخكر
تۆرا لالش یا راگەهاندنێ
ب ئامادەبوونا “شێخ عبدالمهیمن” نوونەرێ سەرۆک بارزانی و ژمارەكا كەسایەتیێن سیاسی و رەوشەنبیری و جڤاكی و خەلكەكێ زۆر ب تایبەت خەلکێ گوندێ کۆچۆ،ئیرۆ رۆژا دووشەمبوویێ 15/8/2016 و ل دەمژمێر 10:30سبێ،دەستەیا بلندا بنگەهێ لالش ل دهۆكێ دووەمین سالیادا گوندێ كۆچۆ،ب چەندین چالاكیان ل هۆلا كۆنفرانسان ل زانكۆیا دهۆكێ ساخكر.
ل دەستپێكێ وەك رێزگرتن بۆ گیانێ جانگۆریێن كوردستانێ و شنگالێ ئامادەبوویی خۆلەكەكێ سەكنین،پاش پێشانگەهەكا شێوەكاری ل دۆر كارەساتا شنگال هاتە ڤەكرن لگەل نمایشكرنا پەرتۆكا كارەساتا شنگال كو 21ڤەكۆلینێن ئەكادیمی بخۆڤە دگرت،كو ژ ئالیێ بنگەهی ڤە هاتیە چاپكرن،ل پێرە پەیڤا بخێرهاتنێ هاتە خووندن ،هەروەسا وەك رێزگرتن بۆ گیانێ جانگۆریێن گوندێ كۆچۆ شەمالك هاتن هلكرن و پەیڤێن دەستەیا بلندا بنگەهێ لالش و حكوومەتا هەرێما كوردستانێ ونوونەرێ گوندێ كۆچۆ هاتنە خووندن.
دپەیڤەكێ دا”شێخ شامۆ”سەرۆكێ دەستەیا بلندا بنگەهێ لالش ل دهۆكێ و ئەندامێ پەرلەمانێ كوردستانێ،بەحسێ قوربانیێت گوندێ كۆچۆ كر كو كۆمكوژیا كۆچۆ داخەكە مەزن بوو ل سەر دلێ هەر ئێزدیەكی و داخوازكر ژ جڤاكێ نێڤ دەولەتی ئەڤ كارەسات ببتە جینۆساید و دیاركر كو جیهان هەموو ب ڤێ بوویەرێ حەسیا،چنكو تا وانەكە مەزن بوو ددەرهەقێ ئێزدیا دە و ب ئاسانی برینا كۆچۆ نایێ دەرمانکرن،ئاماژەكر كو بلا كەس نە بتە رێگر دپێشیا پرۆژێ دەولەتبوونا كوردستانێ دە ودەستێ خۆ بدەینە هەڤ بۆ كوردستانەكە ئازاد كو هەموو نەتەوە وپێكهات تێدە بژین،ئەو چەندە ژی ئاشكەراكر كو كار یێ دئێتە كرن شنگال ببتە ئیدارەكە سەربەخۆ وخەلكێ شنگالێ ببتە خودان بریار.
هەروەسا”عبد الخالق بابیری”بەرپرسێ لقا ئێك یا پارتی دیموكراتی كوردستان پەیڤەك پێشكێشكر و گۆت:” ئەڤا ل شنگال هاتیە ئەنجامدان بەردەوامیا چەندین تاوانێن دی یە یێ ب سەرێ كوردا داهاتین ددرێژیا دیرۆكێ د ،كو هەر دەمەكێ مللەتێ كورد نێزیكی ئارمانجێن خۆ بوو دێ وەسا دوژمن دربا خۆ دانێت.
ژلایێ خۆڤە”نایف جاسو”موختارێ گوندێ كۆچۆ دپەیڤا خۆ دا دیاركر:” چەند پێزانین ل دۆر گوندێ كۆچۆ دانە دیاركرن وداخوازكر نڤیسنگەها رەڤاندییان پتر خەمێ ل گرتیا بخۆت،دا كچ و ژنێن ددەستێ داعشێ دا زوو بێنە قورتالكرن”.
هەر دچالاكیێ دا،راپۆرتەك ل دۆر گوندێ كۆچۆ و تابلۆیەكا هۆنەری ژ ئالیێ تیپا شاریا یا هۆنەری ڤە ل دۆر كارەساتا شنگال هاتنە پێشكێشكرن.
ئەڤ چالاكی ب گۆتنا سترانا كۆمكوژیا كۆچۆ ژبال هەردوو هۆنەرمەندان(تەحسین و عەلی خدر فەقیر) ڤە ب داوی هات.
تُتاح هذه الصورة أيضا في: کوردی
