كار ل سەر كەیسا جینۆسایدكرنا كوردێن ئێزدی ل دادگەها لاهای نەهاتیە كرن
تۆرا لالش یا راگەهاندنێ/عەزیز شەركانی
باژێرێ شنگالێ ب رێژەیا 80% وێران بوویە و ملك ومالێن خەلكێ هاتینە تالانكرن،شنگالێ پێتڤی ب 10 ملیار دیناران هەیە هەتا كو بێتە ئاڤاكرن و ل سەر پێشنیارا سەرۆكێ هەرێما كوردستانێ سەنتەرێ باژێری وەك یادگاریەك دێ مینت وب رەخ وێڤە شنگالەكە نوو دێ ئێتە ئاڤاكرن،هەتا نۆكە پتر ژ 3500 ژن وزارۆكێن ئێزدی ل دەستێ داعش دانە و30 گۆرێن ب كۆم هاتینە دیتن و ئامادەكاری بۆ هلدانا 10 گۆرێن دی هاتینە كرن،ل دادگەها لاهای ژی كار ل سەر جینۆسایدكرنا ئێزدیان نەهاتیە كرن،داخواز دئێتە كرن هەولێن جدی ژبۆ رزگاركرنا گرتیان بێنە دان.
ئافرەتەكە ئێزدی ب ناڤێ “لەیلا”خەلكا كۆمەلگەها تل قەسەبە دیاركر:”داخوازێ دكەم ب زووترین دەم دەڤەرێن مە یێن ماین بێنە رزگاركرن وپشكنین ژبۆ وان گۆرێن ب كۆم رە بێتە كرن،داكو روفاتێن كەس وكارێن خۆ ناس بكن و بن ئاخ بكن وهەولێن جدی ژبۆ رزگاركرنا گرتیان بێنە دان”.
قایممقامێ شنگالێ “مەحما خەلیل”خویاكر:”هەتا نۆكە ل ئاستێ خواستیێن مە وخەلكێ شنگالێ هاریكاری وخزمەتكاری نەهاتینە كرن،ل دەمەكی دە شنگال ب رێژەیا 80% وێران بوویە و ملك ومالێن خەلكێ هاتینە تالانكرن،لەوما شنگالێ پێتڤی ب 10 ملیار دیناران هەیە هەتا كو بێتە ئاڤاكرن و ئەم ژی دێ ل سەر پێشنیارا سەرۆكێ هەرێما كوردستانێ(مەسعوود بارزانی) دێ سەنتەرێ باژێرێ شنگالێ وەك یادگاریەك بهێلن وب رەخ وێڤە شنگالەكە نوو ئاڤابكن،گۆتژی هەتا نۆكە پتر ژ 3500 ژن وزارۆكێن ئێزدی ل دەستێ داعش دانە و30 گۆڕێن ب كۆم ل شنگالێ هاتینە دیتن،ئەڤ چەندە كارەساتەكە گەلەك مەزنە ئەم داخواز دكن ب زووترین وەخت سەركردایەتیا مە بریار بدەت كو بەشێ مایی ژ شنگالێ رزگاربكن و هەولێن جدی بهێن دان بۆ رزگاركرنا گرتیێن مە،ئاشكەراكر كو حكوومەتا عێراقێ ژ چ ئالیەكی ڤە هاریكاری ژ مەرە نەكریە و رۆلێ رێكخراوێن نێڤ دەولەتی ژی گەلەك لاواز بوو و نە ل وێ ئاستێ كو مە پێشبینی بۆ دكر تنێ هندەك هاریكاری هاتبتە كرن ژ ئالیێ حكوومەتا كوردستانێ ڤەبوویە و هەر چەندە ئەم چاڤەرێنە پتر هاریكاربت،دیسان ئەم ل وێ باوەریێ دانە دێ پلانێن باش هەبن بۆ پاشەرۆژەكە گەش بۆ شنگال وشنگالیان”.
رێڤەبەرێ گشتی ل وەزارەتا شەهیدان وئەنفالكریان ل هەرێما كوردستانێ”بەرەڤان حەمدی”دبێژت: “هەتا نۆكە 30 گۆڕێن ب كۆم ل شنگالێ هاتینە دیتن و 3 ژ وان هاتینە هلدان ،بەردەوام كار ل سەر ڤان گۆڕێن ب كۆم دكن و هلدانا گۆڕان نە تشتەك ئاسانە دەمەكێ باش پێتڤیە هەتا پشكنین بۆ وان بێتە كرن و بێنە دكیۆمێنتكرن،لەوما تنێ سێ گۆڕێن ب كۆم هاتینە هلدان وئەوێن دی ل نێزیكی جهێن ژێر كۆنترۆلا داعشێ دانە،ب ئاسانی نكارن كار ل سەر بكن،ژبەركو پێتڤی یە ب هوری كار ل سەر بكن و وان روفاتان هەموویان ب باشترین شێوە پشكنین ودكیۆمێنت بكن،دا ببن بەلگە بۆ جینۆسایدا شنگالێ،ئاشكەراكرژی ل وان هەرسێ گۆڕێن هاتینە هلدان دا روفاتێن 67 كەسان تێدابوون و ب ئاخێ هاتن سپارتن،هەروەسا نۆكە ئامادەكاری بۆ هلدانا 10 گۆڕێن دی یێن ب كۆم هاتینە كرن ول نێزیكترین دەم دێ ئێنە هلدان”.
پارێزەر وشارەزا ل كەیسێن جینۆسایدێ كو كار ل سەر جینۆسایدا ئێزدیان دكت”ئەیاد كاكەیی”دیاركر:”ئەو كارەساتا ب سەر خەلكێ شنگالێ هاتی ب هەموو پیڤەران جینۆسایدە،ژبەركو ئَێك ژ بنەمایێن سەرەكی بۆ ناساندنا جینۆسایدێ ئەوە كو تاوان دژ ب پێكهاتەكێ جێواز هاتبتە كرن،لەورا ئەڤا دژ ب ئێزدیان هاتی كرن ئاینێ وان جێوازە و نێزیكی دوو هەزار كەس شەهید بووینە و شەش هەزار كەس هاتینە گرتن و باژێرێ وان ب تەمامی وێران كرینە و ملك ومالێن خۆ بجی هێلاینە و ئاوارەبووینە،زێدەباری چەند تاوانێن دی یێن مەزن،ئاماژەكرژی ناساندنا كەیسا ئێزدیان وەك جینۆساید ژلایێ چەند جهێن وەك وەزارەتا دەرڤە یا ئەمریكا و نەتەوەیێن ئێكگرتی وپەرلەمانێن چەند وەلاتان ڤە تشتەك گەلەك باشە،لێ یا هەرە گرنگ ئەوە ل دادگەها لاهای وەك جینۆساید بێتە قەبوولكرن هەر چەندە هەتا نۆكە كار ل سەر ڤێ كەیسێ نەهاتیە كرن،ژبەركو عێراق نە ئەندامە ل وێ دادگەهێ دا،بەرپرسێن ل دادگەها لاهای گۆتینە هەول بدەن ئێك ژ وان چەكدارێن داعشێ بگرن كو هەلگرێ ناسنامەیا وەلاتەكێ ئەندام بت ل وێ دادگەهێ وەك تونس وئوردن،حكوومەتا هەرێما كوردستانێ ژی ل هەولێن بەردەوام دایە،بۆ ڤێ چەندێ كو ئێك ژ وان تیرۆرستان بگرت و ب سەدان تیرۆرست هاتینە گرتن،لێ خەلكێ وان وەلاتان نینن كو ئەندامن ل لاهای،پتریا وان خەلكێ وەلاتێن مەغرەب و فلەستین وسعودیە وسوریا وعێراقێ نە،تەكەز كر كو گەشبینم كەیسا ئێزدیان وەك جینۆساید بێتە ناسكرن و هۆشداری دا كو ل سەر ئاستێ ناڤخۆیی دادگەه بۆ ڤێ كەیسێ بێنە ڤەكرن،ژبەركو ئەڤ كەیسە ژ دادگەهێن ناڤخۆیی مەسترە ودێ مافێ خۆ وڤان قوربانیان ون دا بكن”.
تُتاح هذه الصورة أيضا في: کوردی
