ئاوارەیێن شنگالێ ب مەرج دێ ڤەگەرنە جهێن خۆ
تۆرا لالش یا راگەهاندنێ
ئاوارەیێن شنگالێ یێن ل دەڤەرا دێرەبوونێ ئاكنجی،داخوازێ دكن گرتیێن ئێزدی یێن د دەستێ تیرۆرستێن داعشێ دا بێنە ئازادكرن و دەڤەرێن ماین ژی بێنە رزگاركرن،دووپات دكن كو ب مەرجەكی پێشمەرگەیێ كوردستانێ و هێزەكا نێڤ دەولەتی پاراستنا وان بكن دێ ڤەگەرنە سەر مال و جهێن خۆ.
نایف شمو،ئاوارەیەكێ شنگالێ یە ول كەمپا باجدكەندالا ئاكنجییە بۆ رۆژناما دەنگێ لالش دیاركر،ئەڤە دوو سال بۆرین هێشتا دەڤەرێن مە ژ تیرۆرستێن داعش نەهاتینە پاقژكرن و ژن و كچێن مە ژی هێشتا دناڤ دەستێ هۆڤ و كافرێن داعشدانە،رۆژانە دئێنە ئەشكەنجەدان و رەوشا وان گەلەكا خرابە،لەوا داخوازا مە ئەوە ژن و كچ و زارۆك و گرتیێن مە بێنە ئازادكرن و دەڤەرێن مە ژی بێنە رزگاركرن،داكو ئەم ڤەگەرنە سەر مال و جهێن خوە،لێ ب مەرجەكی پێشمەرگەیێ كوردستانێ و هێزەكا نێڤ دەولەتی پاراستنا مە بكن.
هەروەسا (قاسم غانم) ئاوارەیەكێ شنگالێ یە ل دێرەبوونێ ئاكنجیە بۆ دەنگێ لالش خویاكر،رەوشا مە دخیڤەتان دا گەلەكا خرابە ب تایبەتی ل هەردوو وەرزێن زڤستانێ و هاڤینێ تووشی ئاستەنگان دبین،لەوا داخوازیا مەیا سەرەكی ژ هەموو رێكخراوێن مافێ مرۆڤی وهێزێن نێڤ دەولەتی و پێشمەرگەیێ كوردستانێ ئەوە ژن وكچێن مە بێنە ئازادكرن ژدەستێ داعش و گوندو كۆمەلگەهێن شنگالێ یێن ماین ژی بێنە رزگاركرن،داكو ئەم ڤەگەرنە سەر مال و جهێن خوە.
ژلایێ خۆڤە سەرپەرشتێ لژنا ئاوارەیان ل دێرەبوونێ (د.كەمال حەسەن) بۆ دەنگێ لالش دبێژت:ئەڤ دوو سال بۆرین هێشتا دەڤەرێن مە ب تەمامی نەهاتینە رزگاركرن و كچ وژن زارۆك ژی دبن دەستێ وان هۆڤاندانە،رۆژانە دئێنە ئەشكنجەدان،لەوا مە ئەم دخوازن ڤەگەرنە سەر مال و جهێن خوە،لێ ب مەرجەكی داعش ل شنگالێ و دەوروبەرا نەمینت و پێشمەرگەیێن كوردستانێ و هێزەكا نێڤ دەولەتی پاراستنا مە بكت،داكو ئێدی داعش مە نەكوژن و كریارێن هۆڤانە دژی مە ئەنجام نەدەن،ئاماژەكر ژی هەر ژ دەمێ ئاوارەبوونا خەلكێ شنگالێ هەتا ئیرۆ ژی حكوومەتا هەرێما كوردستانێ و رێكخراوین مافێ مرۆڤی و جیهانی و هەموو خەلكێ شەرەفمەندێ كوردستانێ هیچ درێخی نەكرینە بۆ ئاوارەیێن شنگالێ ل دێرەبوونێ،سەرەرای قەیرانا دارایی و نەبوونا مووچەی و برینا بودجەیێ هەرێمێ ژلایێ حكوومەتا عێراقێ ڤە،دهەمو بیاڤان دا دهاریكاربوون دگەل مەدا،بەلێ پا ژیانا دناڤ هەیكەلا و خیڤەتان دا هەرا نەخۆشە.
تُتاح هذه الصورة أيضا في: کوردی
