نێچیرڤان بارزانی:دێ به‌رده‌وام بين ل هه‌ولا ب جینۆساید ناساندنا كۆمكوژيا كوردێن ئێزدی
باسنيۆز:
نێچیرڤان بارزانی، سه‌رۆكى حكوومه‌تی هه‌رێمی كوردستان له ساڵیادی كاره‌ساتی شنگال په‌یامێك بڵاوده‌كاته‌وه و تیایدا سه‌رجه‌م كوردانی ئێزدی دڵنیا ده‌كاته‌وه كه حكوومه‌تی هه‌رێمی كوردستان له هه‌وڵه‌كانی به‌رده‌وام ده‌بێت له به‌جینۆساید ناساندنی كۆمه‌ڵكوژی ئێزدییان.
په‌یامه‌كه‌ی سه‌رۆكی حكوومه‌تی هه‌رێمی كوردستان وێنه‌یه‌كی بۆ(باسنیوز) نێردراوه و ئه‌مه‌ی خواره‌وه ده‌قه‌كه‌یه‌تی:-
پەیاما نێچیرڤان بارزانی بۆ سێیەم ساڵڤەگەڕا جینۆسایدا شەنگالێ
د سێیەمین ساڵڤەگەڕا جینۆسایدا شەنگالێ و كەسوكارێن مە یێن ئێزدیدا، سەرێ خۆ لبەر گیانێ پاقژێ هەموو شەهیدێن ڤێ جینۆسایدێ دچەمینین و ب خەم و كۆڤانەكا كوور ڤێ ڕۆژا ڕەش د دیرۆكا كوردستانێدا ب بیر تینین.
جینۆسایدا شەنگالێ و كەسوكارێن مە یێن ئێزدی و خەلكێ دی یێ دەڤەرێ، برینەكا كوورە و زوو دەرمان نابیت و چ جارا ژی ژبیرا گەلێ كوردستانێ ناچیت. ڤێ تاوانا مەزن یا كو تیرۆرستا ل دژی كەسوكارێن مە ییێن ئێزدی ئەنجام دا، جارەكا دی ئەو ڕاستی سەلماند كو دڤێت گەلێ كوردستانێ بگەهیتە هەموو مافێن خۆ و سەروەریا خۆ بدەستڤە بینیت داكو چ جارێن دی تاوان و جینۆساید هۆسا ب سەرێ گەلێ كوردستانێ و پێكهاتێن وێ یێن نەتەوەیی و ئۆلی نەیێن.
د ڤێ بیرئانینا ب كۆڤان و خەمگیندا ئەم جارەكا دی كەسوكارێن خوە یێن ئێزدی پشتڕاست دكەین كو دێ هەموو هەولا دەین و یا پێدڤی بیت دێ كەین داكو هەمی گرتی ییێن د دەستێ تیرۆرستادا ماینە، بهێنە ڕزگاركرن. هەروەسا دێ هەمی شیانێت خۆ بۆ ئاڤەدانكرنا شەنگالێ و ڕزگاركرنا دەڤەرێن مایی ژی بكارئینین و دێ ژ بەرێ باشتر ژیانێ ڤەگەرینینە دەڤەرێ ب گشتی.
هەموو كەسوكارێن خوە یێن ئێزدی پشتڕاست دكەین كو حكوومەتا هەرێما كوردستانێ یا بەردەوامە و هەتا دوماهیێ ژی دێ كاری لسەر كەت داكو كەیسا كۆمكوژیا ئێزدیان و وەكە جینۆساید بهێتە ناساندن. بۆ ڤێ چەندێ ژی لێژنەیا تایبەت یا حكوومەتا هەرێما كوردستانێ دگەل دامودەزگەھ و لایەنێن نێڤدەولەتی لسەر هەولێن خوە یا بەردەوامە و دڤی واریدا گاڤێن باش هاتینە هاڤێتن.
جارەكا دی هەڤسۆزی و هەڤخەمیا خۆ دگەل كەسوكارێن خوە یێن ئێزدی دووپات دكەین و هیڤیدارین د پاشەڕۆژەكا نێزیكدا هەمی دڤەرێن مایی ژی بهێنە ئازادكرن و كەسوكارێن مە یێن ئێزدی و هەموو ئاوارە و پەنابەرێن دی ژی سەربلند و سەركەفتی ڤەگەرن سەر جھ و مالێن خۆ.
نێچیرڤان بارزانی
سەرۆك وەزیرێن هەرێما كوردستانێ
2-8-2016
تُتاح هذه الصورة أيضا في: کوردی
