هـەر هـەفـت رۆژ د پـیــرۆزن
پیر خەلات ئەلیاس
دئێزدیاتیێ دا هەر هەفت رۆژ ژ ئەرکانێت کنیاتێ یێن خودێ ناسیێ نە:
ل گۆڕ ئەدەبێ دینێ ئێزدیان کەڤناتیا هەر هەفت رۆژێن هەفتیێ ل کنیاتێ ڤەدگەرێنە بەری میژوو و دیرۆک و نڤیسینێت هەرێن کەڤنار ، هەر هەفت رۆژ دباوەریا ئۆلا ئێزدیاندا د ئەزەلی نە لەوما د پیرۆزن و ژ ئەرکانا خودێ ناسیێ هاتینە ژ قەولێ مەها دایە دیارکرنە ژ رۆژا شەمبوویێ و هەتا رۆژا ئینیێ هاتیە زلالکرن و رۆن کرن و دبێژت:
پەدشێ من هەر هەفت رۆژ دکرن هژمارە
ئەڤ دنیا چێکر و هەل سپارە
رۆژا شەمبوویێ کرە ئاساس ب دنایێ ڤە سبارە.
پەدشێ من رەب ل سەمەد
لەم یولەد و لەم یەلەد
سبحانە ئەنتە خەلەقت یۆم ئەل ئەحەد.
پەدشێ منی بێ خەم بوو
ل ناڤ دوڕا خۆدا ب کەرەم بوو
ئەوی ئەفراندبوو دوو شەمبوو .
پدشێ منی بێری یە
قەدارا ڤێ دنیایێ ب دەستێ وی یە
ئەوی سێ شەمبوو کرە سێ یە .
پەدشێ منی جەبارە
ژ باوی وە فروارە
ئەوێ چارذەمبوو دکرە چارە.
چارشەمبوو رۆژەکە فادلە
مەلەک فەخرەدین ئەفراندبوو ژ ئەشق و دلە
بەلێ ناس نەدکر روحێت چو غافلە.
پەدشێ منی مەسێنجە
ئەڤ دنیا ل باوی سەعەت و سێنجە
ئەوی پێنج شەمبوو کرە پێنجە .
پەدشێ منی نورانی یە
ئەوی ئەفراندبوو ئینی یە
کرە ختمە هەر هەفت رۆژا ژ ئەزەلی یە.
ل گۆڕەی ڤان سەبەقان دەتە دیارکرن خودێ هەر هەفت رۆژ ئەفراندینە کرینە ئەرکانەک ژ ئەرکانێت کۆکا کنیاتێ و ئیرۆ ئینسان و هەموو خولیاقەت دڤان هەر هەفت رۆژان دا دژیت و هەکە عەمر چەند سال و زەمان بن ب تنێ هەفت رۆژ تێنە خوەندن و ژمارتن و دیسان ڤەگەریانە بۆ شەمبوویێ و کەس ژ هەفت رۆژا مینا: (شەمبوو ـ ئێک شەم ـ دوو شەم ـ سێ شەم ـ چار شەم ـ پێنج شەم و ئینی) دەرباز نابت و ژ پیرۆژا هەر هەفت رۆژان د قەولێ ئەفراندنا کنیاتێ دەتە دیارکرن و دبێژت:
رۆژا شەمبویێ دانا ئاساسە
رۆژا ئینیێ کر خلاسە
پشتی هەفت سەد سالە
هەفت سوڕ هاتنە دۆران و کاسە.
ل گۆڕەی ڤێ سەبەقێ دبێژت: ئەساسا ڤێ کنیاتێ رۆژا شەمبوویێ یە و رۆژا ئینیێ رۆژا دومایێ یە ، لەوما هەموو رۆژ دپیرۆزن و هەموو بناڤێ رۆژێنە ئانکو دمێ ناڤێ رۆژێ بێت دێ بێژن:
شەم بوو ئانکو رۆژ پەیدا بوو
ئێک شەم ئانکو رۆژا ئێکێ پەیدا بوو
دووشەم ئانکو رۆژا دوویێ پەیدا بوو
سێ شەم …..
چار شەم …..
پینچ شەم….
رۆژا ئینیێ: ناڤێ شەم لسەر نینە رامان ژێ رۆژ نەما و ل پشتی نڤیرۆ دێ بێژن هێڤارا شەمبوویێ یە و نابتە هەشت لەوما دێ ڤەگەرێتە سەر ئەساسێ و ناڤێ شەم ژ شەمس ژ رۆژێ هاتیە و دەمێ دبێژن: ئینی ئانکو ختمە هەر هەفت رۆژان و دیسان دێ ڤەگەرێتە شەمبوویێ و دێ نوو بتەڤە.
شەم یان شەمس یان رۆژ ب ناڤێ خودێ یە و ل گۆڕ قەولێ ئەفراندنا گنیاتێ تێتە زمان و دبێژت:
پەدشا و هەر هەفت سوڕێت خەولەنە
وێ رایەکێ دناڤ خۆدا دکەنە
ئێقین دێ کنیاتەکێ ئاڤا کەنە.
و هەر وەسا ژ ئەدەبێ دینێ ئێزدیان ژ قەولێ پیر سنی بەحری دبێژت:
ئەز ڤێرا دگەستم
ل بەندێ شاهێ مەستم
ب هەر هەفت سوڕێت سلتان ئێزی هەر هەوەستم.
راما ژڤان سەبەقا دەتە دیارکرن:
خودێ هەر هەفت سوڕ ژ نورا خۆ ئەفراندی نە و هەر رۆژەک ب ناڤێ سوڕەکێ بناڤکریە و لەوما دئێزدیاتیێ دا هەر هەفت رۆژ دپیرۆزن و ژسوڕا ناڤێ خودێنە و هەر کەسێ کێم و نەزانیێ و زلمێ و زۆرداریێ و نەهەقیێ بکەت ئەو رۆژا ئەو تێدا دێ عەمەلێ وی نڤیست و ل رۆژا ئاخرەتێ دێ جزایێ خۆ دەت و کەسەک بنەزانی دەرباس نابت و خودێ مە هەمووان پارێزت: ژ بێ خۆف و بێ باوەرە و هەر رۆژا بێت پیرۆزترە ژ رۆژا بۆری
تُتاح هذه الصورة أيضا في: کوردی
