ته‌مموز 17, 2024

Lalish Media Network

صحيفة إلكترونية يومية تصدر باشراف الهيئة العليا لمركز لالش الثقافي والاجتماعي في دهوك - كوردستان العراق

شه‌مۆ قاسم:ڕێورەسمێن جەژنا سەرسالێ

ڕێورەسمێن جەژنا سەرسالێ

شه‌مۆ قاسم

هەر ژ كەڤندا مللەتێن ئاری ل رۆژهەلاتا ناڤین ب شێوەیەكی گشتی و ل وەلاتێ‌ میسۆپۆتامیا ب شێوەیەكی تایبەتی پێشوازی ل سالا نوو دكرن و دكرنە جەژن و ئاهنگێن جۆرا وجۆر ب ڤێ‌ هەلكەفتێ‌ دگێران و هەر ئێكی ناڤەك دگۆتێ‌، سۆمەریا دگۆتێ‌: جەژنا زاكمۆك، بابلیا دگۆتێ‌: جەژنا ئەكیتۆ ومیدیا دگۆتێ‌ نەورۆز
ئێزدی ڤێ جەژنێ ل دەستپێكا سالا نوو دگێڕن ودبتە دەست پێكا بەهارێ و كەڤنترین جەژنا ئێزدیایە ودكەفتە د چارشەمبویا ئێكێ‌ ژ مەها نیسانێ‌ ب هژمارا رۆژهەلاتی، بۆ زانین هژمارا رۆژهەلاتی ١٣ رۆژا ل پاش هژمارا رۆژێاڤای یە .
رۆژا چارشەمێ ژ بۆ ئێزدیان رۆژەكا پیرۆزە ، د ڤێ رۆژێ دە كنیات هاتیە ئافراندن و گیان د قالبێ ئادەم دە ئێوری یە وسەمبۆلا نووبوون، ونوو ژیان وهاتنا بھارێ یە وەكی دڤان تێكستێن پیرۆزدە خویا دبت:
هات چارشەمبووا سەرێ‌ نیسانێ‌
مەلەك زان دئێتە خوارێ‌
دەنگ دكەت ل بەهارێ‌
هات چارشەمبووا سۆروزەره
بەهار خەملاند بوو بخوەرە
مە پێ خەملاندن سەرەدەره
مەراسیم ورێ ورەسمێن ڤێ جەژنێ ئەڤەنە:
1- ئێڤارا سێشەمێ ل پەرەستگەھا لالشێ ب مەراسمێن ئۆلی یێن تایبەت ب بەشداریا بابا شێخ وێۆلدار وهەر كەسێ بڤێت پشكداربت ، ل بەر دەنگێ مووزیکا دەف وشبابا دەست پێ دکە و ٣٦٥ مووم ل لالشا پیرۆز دئێنە ڤێخستن وەك رێزگرتنەك بۆ رۆژێن سالا نوو .
٢- ل گوند و مالان ژن ھێکان دکەلینن و رەنگین دکن، ونانەکی تایبەت ئامادە دکن و ل جیرانان بەلاڤ دکن، دبێژنێ (سەووک)
٣-سبەیا چارشەمێ خۆرت و کەچ ژی گولیلكێن سۆر کۆم دکن ومالخوا مالێ دگەل قالكێن ھێکێن رەنگین ب سەرەدەریێن مالێڤە دكەن ب ھەڤیرێ یان ب هەریێ وەك نیشانا هاتنا سالا نوو
٤- زەلام وخۆرت ل بەر مەزارگەهێ گوندی كۆم دبن وجەژنا هەڤدوو پیرۆزدكن وپاشی جۆق ب جۆق سەرەدانا مالا دكەن
٥- یاریا هێكانێ لیستکا سەرەکە یا ڤێ جەژنێ یە
٦- جۆتیار ژێ هندەك قالكێن ھێکان ل زەڤیا خۆ درشینە دا کو بەرھەم زێدە بت و بەرەکەت بكەڤە ناڤدە .
٧- سپێدەیا رۆژا جەژنێ پەز و بەرخكان تێکەل دکن ودبێژنێ (ستیکۆش) .
٨- ھەر وەھا مەراسیمێن شڤان وبێریڤانێ دهێتە گێران وگۆپالێ شڤانی دهێتە شكاندن وهەر بێریڤانەك پرتەكێ دبتە مال وب مەشگا خۆ ڤەكەت بۆ بەرەگەتێ وگۆپالەكی نوو ددەنە شڤانی وەك دەستپێكا شڤانیێ بۆ سالا نوو .
٩- دیسا مەراسیمێن دن ژی ھەنە کو ژن سپێدێ زوو سەردانا مەزارێ مریێن خوە دکن وخێر وخێراتا ل سەر دەست كورتا بەلاڤ دكەن .
ڤەكۆلینا دایە خویاكرن كو پەیڤا نیسان ژ پەیڤێن:نووزان یان نوو ژیان یان نوو سال هاتی یە. وھەژی گۆتنێ یە کو ئێزدی رێز وبەها وپیرۆزیێ‌ ددەنە ڤێ‌ مەهێ‌ ژبەر هندێ‌ دڤێ‌ مەهێدا بووكا نا ڤەگوهێزن ، چونكی نیسان بخۆ بووكا سالێیە و ب جوانترین رەنگ وخەمل یە خەملاندییە و چوو بووكا دسەر خۆرا نابینت.
ئێزدی دڤێ‌ مەهێ‌ دا جۆتی ناكەن و عەردی ناكۆلن ژبۆ پاراستنا گژ وگیا و وهەموو رووەكا ڤێجا كۆلانا عەردی دڤێ‌ مەهێدا ب گونەه دئێتە دانان تاكو جوانتر روویێ‌ عەردی بخەملت وژینگەه بهێتە پاراستن ، و ئەڤ مەهە دەستپێگا ڤەژین و بووژاندنا هەموو گیاندارایە
كەلاندنا هێكێ رامانا بەستنا عەردیە بشتی كنیات هاتتە ئافراندن ، ورەنگكرنا هیكێ‌ رامانا خەملینا عەردی ددەت.
جەژنا هەموو ئێزدیان پیرۆزبت وهیڤیێ ژ خودێ دكەین خێر وخۆشی وتەناهی وئارامیێ پەیدابت

تُتاح هذه الصورة أيضا في: کوردی

مقالات ذات صله

الرد

پۆستی ئەلکترۆنیکەت بڵاو ناکرێتەوە . خانە پێویستەکان دەستنیشانکراون بە *

Copyright © 2021 by Lalish Media Network .   Developed by Ayman qaidi