سه‌رۆكێ حكومه‌تا هه‌رێما كوردستانێ، رێزدار مه‌سرورر بارزانی: به‌رپرسێن حكومه‌تا فیدرال ب شێوه‌یه‌كی ناره‌وا، بریارا ڕاگرتنا مووچه‌یێ خه‌لكێ كوردستانێ دایه.
تۆرا لالش
ڕێزدار مه‌سرور بارزانی، سه‌رۆكێ حكومه‌تا هه‌رێما كوردستانێ د رێوره‌سما ڤه‌كرنا دامه‌زراوه‌یا ڤیزت كوردستان گۆت: به‌رپرسێن حكومه‌تا فیدرال ب شێوه‌یه‌كی ناره‌وا و نه‌یاسایی و نه‌ده‌ستووری، بریارا ڕاگرتنا مووچه‌یێ خه‌لكێ كوردستانێ دایه، و هه‌رێما كوردستانێ ژ كاروانێ ئاڤه‌دانیێ راناوه‌ستت.
ل دۆر فشارێن به‌غدایێ ل سه‌ر هه‌رێما كوردستانێ دا دیاركرن: ب پشته‌ڤانیا خودایێ مه‌زن و خۆراگریا گه‌لێ مه، د سالێن ده‌ربازبووی دا مه قه‌یرانێن زه‌حمه‌تتر ده‌ربازكرینه، له‌وران خه‌لكێ كوردستانێ پشت راست دكه‌ین ده‌ستبه‌رداری مافێن خوه یێن ده‌ستووری نابین، هه‌ولێن مه ژ بۆ چاره‌سه‌ركرنا ڤێ قه‌یرانێ دێ د به‌رده‌وام بن، هیڤیدارین د ده‌مه‌كێ نێزیك دا بگه‌هینه ئه‌نجامه‌كی كو د به‌رژوه‌ندیا هه‌موو لایه‌كی دا بت.
ل دۆر رێككه‌فتنێن د ناڤبه‌را هه‌ولێر و به‌غداد ڕێزدار مه‌سرور بارزانی، سه‌رۆكێ حكومه‌تا هه‌رێما كوردستانێ دیار كر: هه‌موو پابه‌ندیێن ده‌ستووری یێن ل سه‌ر مه، مه جێبه‌جێ كرینه، به‌لێ ب مخابنی ڤه رێز ل مافێن ده‌ستووری یێن خه‌لكێ كوردستانێ و هه‌روه‌سان ل وان رێككه‌فتنان ژی یێن به‌غداد ئیمزاكرین نه‌هاتینه گرتن.
گۆتژی: دڤێت عیراق بزانت وه‌لاته‌كی ده‌ستووری یه و هه‌رێما كوردستانێ ژی ل په‌ی ده‌ستووری قه‌واره‌یه‌كی ده‌ستووری و یاسایی یه، و برسیكرنا وه‌لاتیێن هه‌رێمێ هیچ ئه‌نجامه‌ك نابت بتنێ پشلیكرنا ده‌ستووری و یاسایی یه.
تُتاح هذه الصورة أيضا في: کوردی
