تۆرا لالش
سەعید جردۆ، سه‌رۆكێ بنگه‌هێ لالش د دیداره‌كێ دا بۆ ڕاگه‌هاندنا بنگه‌هێ لالش دا دیاركرن: حكومەتا هەرێما كوردستانێ، ب تایبەت كابینەیا نەهێ، گەلەك خزمەتا ئێزدیان كریە، لێ ژلایێ حكوومەتا عێراقێ ڤە هاتینە پشتگوهـ ئێخستن.
دیار ژی كر: حكوومەتا هەرێمێ و سەرۆكێ وێ ب تایبه‌ت رێزدار مه‌سرور بارزانی، گرنگییەكا مەزن دایە هەموو پێكهاتان و گاڤێن باش هاڤێتینە بۆ پێشڤەبرنا هەرێما كوردستانێ، و دڤێ چارچۆڤێ دا، هەرچی ژ دەستێ وان هاتییە، خزمەتا مە كرییە.
سه‌عید جردۆ هەروەسا گۆت: حكوومەتا هەرێمێ چەندین پرۆژە بۆ خزمەتا كوردێن ئێزدی جێبەجێ كرینە، ژ وانژی:
- دانا مینحا رزگاربوویێن ژ دەستێ داعش كو سێ هزار و 372 رزگاربوو ژێ سوودمەند بووینە.
- دانا چەندین پۆستان بۆ كوردێن ئێزدی.
- ئەنجامدانا ژمارەكا زۆر یا پرۆژان ل ناوچەیێن كوردێن ئێزدی.
سەرۆكێ بنگه‌هێ لالش وەسا ژی گۆت: ئەم هێڤیدارین د كابینەیا دەهێ دا خزمەتێن پتر بێنە كرن، چونكی سەرۆكێ حكوومەتا هەرێما كوردستانێ گرنگییێ ددەتە هەمی پێكهاتان، ژ وان پێكهاتان ژی كوردێن ئێزدینه.
ئاشكه‌راكر: مه هڤیەكا مەزن یا ب حكوومەتا هەرێما كوردستانێ هەی داكو بگەهتە ئارمانج و هیڤییێن خۆ، چونكی عێراقێ پێكهاتا ئێزدی پشتگوهـ ئێخستییە، پێدڤی بوو وان ژ رۆژا ئێكێ یا جینۆسایدا كوردێن ئێزدی، وەك ئەركێ خۆ دەنگێ مە گەهاندبا جیهانا نێڤدەولەتی و دادگەها تاوانێن نێڤدەولەتی. لێ ب كەسەرڤە، چ گاڤ نەهاتنە هاڤێتن و بەلكو چ خزمەت ژی نەهاتنە كرن و ناوچەیێن مە هاتنە پشتگوهـ ئێخستن، ئەڤ سەبەبەیە كو ئێزدی حكوومەتا هەرێما كوردستانێ وەك خودانێ خۆ دبینن، نە حكوومەتا عێراقێ.
تُتاح هذه الصورة أيضا في: کوردی
