تۆرا لالش
پسپۆرهكێ كهشناسیێ دیار دكهت كو زڤستانا ئهڤ ساله دێ جودا بیت و چاڤهرێ زڤستانهكا ساردتر دهێته كرن بهراورد دگهل سالێن بوری.
ئاراس جهبار یێ پسپۆرێ كهشناسیێ د ههژمارا خۆ یا فهیسبووكێ دا بهلاڤ كریه، نوكه ئهم د ناڤ وهرزێ زڤستانێ داینه و دیاردهیا لانینایا لاواز ل ناڤهراستا زهریایا هێمن دێ بهردهوام بت ههتا ههیڤا ئێكێ یا سالا ٢٠٢٥.
ههروهسا ئاماژه پێ دایه دئێته چاڤهرێ كرن د ههیڤێن داویێ یێن وهرزێ زڤستانێ دا لاوازتر ببت و ڤهگهریتهڤه بارێ ههڤسهنگیێ، ئهڤ دیاردهیه رۆل و كارتێكرنهكا جیهانی یا ههی ل سهر گوهۆرینێن كهش و ههوایی بۆ ماوهیێ وهرزهكی یان درێژتر، كو كێمبارانیا دهڤهرا رۆژههلاتا ناڤین د پایزا ئهڤ ساله دا ئێك ژ ئهگهران بوویه دگهل ئهگهرێن سروشتی یێن دی.
دبێژت، گهۆرینا كهش و ههوایی د ڤێ ناڤبهرێ دا ئهگهرهكێ دی یه د ڤان سالێن داویێ دا، كارڤهدانا ڤان دیاردهیان پتر كریه ل سهر كهش و ههوایێ دهڤهرێ و جیهانێ ب شێوهیێن جۆراوجۆر.
ئاراس جهبار پسپۆرێ كهشناسیێ ههروهسا دیار كر، ل دویڤ پێشبینیان و خواندنێن وهرزی، زڤستانا سالا ٢٠٢٥ێ ب شێوهیهكێ گشتی بۆ عیراقێ و سعودیێ و باكوورێ رۆژههلاتا سوریا و بهشهكێ مهزن یێ دهڤهرێن ئیرانێ، كێمبارانی و هشكی د كهش و ههوایی دا دێ بهردهوام بت، ل دهڤهرێن ههرێما كوردستانێ و رۆژههلات و باكوورێ كوردستانێ، ب تایبهت دهڤهرێن چیایی، رهوش دێ باشتر بت و ههتا رادهیهكێ رێژا بهفر و بارانێ دێ ڤهگهرت دۆخێ نۆرمال و ئاسایی، بهلێ ل دهڤهرێن نزم د سنوورێ گهرمیان و پارێزگههێن كهركووك و ههولێرێ دا، پێشبینی دهێته كرن كو رێژا بارانێ دێ یا پێتڤی نابت و وهكی وهرزێ پایزێ، شهپۆلێن بارانێ ل ڤان دهڤهران دا دێ كارتێكرنهكا لاواز ههبت.
ههروهسا دبێژت، دهربارهی شهپۆلێن سهرما و بهفربارینێ، ئهڤ سال دێ جوداتر بت و زڤستانهكا ساردتر ل دهڤهرێ دا چاڤهرێ دئێته كرن بهراورد دگهل هندهك ژ سالێن بۆری، ههروهسا رێژا دابارینا بهفرێ دێ پتر بت ب تایبهت ل دهڤهرێن چیایی و شهپۆلێن بهێز یێن سهرما و با دێ پتر بن، و ل ناڤهندا باژێران و هندهك ژ ڤان دهڤهران ژی دێ بهفر لێ بارت، یێن كو د سالێن بۆری دا لێ نهباری ژبهر گهرمیا وهرزێ زڤستانێ و نهبوونا بارستێن ههوایێ سار یێن چالاك.
تُتاح هذه الصورة أيضا في: کوردی
