نیسان 15, 2024

Lalish Media Network

صحيفة إلكترونية يومية تصدر باشراف الهيئة العليا لمركز لالش الثقافي والاجتماعي في دهوك - كوردستان العراق

مەسرور بارزانی: سبەی دێ بڕیارەک د بەرژەوەندیا هەموو خەلکی دا ئێتەدان

مەسرور بارزانی: سبەی دێ بڕیارەک د بەرژەوەندیا هەموو خەلکی دا ئێتەدان

K24 – هەولێر:

سەرۆکوەزیران مەسرور بارزانی رایگەیاند: سبەی لە کۆبوونەوەی ئەنجوومەنی وەزیران، بڕیارێک لە بەرژەوەندیی خەڵکی کوردستان دەدەن.

سەرۆکی حکوومەتی هەرێمی کوردستان لەمیانی بەشداریکردنی لە ئێوارەخوانێکی بەربانگ لە یەکێک لە مزگەوتەکانی شاری هەولێر ڕایگەیاند: سبەی لە کۆبوونەوەی ئەنجوومەنی وەزیران بڕیارێک لە بەرژەوەندی هەموو خەڵکی کوردستان دەردەکەن.

ڕۆژی سێشەممە (26ـی ئاداری 2024) مەسرور بارزانی، سەرۆکی حکوومەتی هەرێمی کوردستان لە وتارێکدا سوپاسی خەڵکی کوردستانی کرد بۆ خۆڕاگری و پشوودرێژی و پشتیوانیی و متمانەیان بە حکوومەت کە ماوەیەکە بەهۆی دروستکردنی دۆخێکی نەخوازراوەوە مووچەکانیان دواکەوتووە بەهۆی نەناردنی لەلایەن بەغداوە.

سەرۆکوەزیران مەسرور بارزانی دووپاتی کردەوە، ئەوەی لە تواناماندا بێت دەیکەین بۆ چارەکردنی کێشەکان بەشێوەیەک لە بەرژەوەندیی خەڵکی هەرێمی کوردستان و عێراقیش بێت بەبێ ئەوەی واز لە مافی دەستووریی خەڵکی هەرێمی کوردستان بهێنین.

هەروەها سەرۆکوەزیران مەسرور بارزانی باسی لەوە کرد، ماوەیەکی زۆرە هەوڵێک هەیە بۆ ئەوەی قەوارەی هەرێمی کوردستان نەمێنێت یاخود لاواز بکرێت، بەشێوازی جۆراوجۆر پیلانەکە جێبەجێ کراوە و جێگەی داخە هەندێک بیروبۆچوونی ناحەز توانیویانە بەوشێوەیە مامەڵە لەگەڵ هەرێمی کوردستان بکەن و لەوەش ناخۆشتر ئەوەیە لە ناوخۆدا یارمەتی ئەو بۆچوونە شۆڤێنییە دراوە.

سەرۆکوەزیران مەسرور بارزانی گوتیشی: دروستبوونی هەرێمی کوردستان بەوشێوازەی هەیە، کەس خێری پێ نەکردووین، ئەمە بەرهەمی خوێنی شەهیدان و خەباتی خەڵکی ئێمەیە و ئێوە هەمووتان بەشداربوون لە دروستکردنی ئەم ئەزموونە، ئێمە دەستوورێکمان هەیە کە ماف و ئەرکەکانمانی تێدا دیاری کراوە و ئەوەی پێمان کراوە لە جێبەجێکردنی ئەرکەکانمان درێغیمان نەکردووە، بەڵام لە دابینکردنی مافەکانمان پێشێل کراوە و دابین نەکراوە و هەوڵی ئەوەش دراوە ئەوەی لە دەستووریش نووسراوە پێشێل بکرێت.

لە بەشێکی دیکەی قسەکانیدا، سەرۆکوەزیران مەسرور بارزانی ڕایگەیاند: لێرەدا بەسەر دوو بەرەدا دابەشبووین، بەرەی خۆڕاگری و پاراستنی ئەزموونەکانەمان و ڕێزگرتن لە خوێنی شەهیدان و خەباتەکەمان، بەرەی دووەمیش پێی وایە: تەنیا نانێکی زەلیلمان بدەنێ، هەموو کێشەی هەرێمی کوردستان بکرێت بە مووچە، کە دڵنیام زۆربەی خەڵکی کوردستان لەگەڵ ئەم بۆچوونەدا نین و ئێمە دەمانەوێت ڕێز لە خوێنی شەهیدانمان و خەباتی ئەم ئەزموونە بگرین و بیباپرێزین کە ئەمە ئەرک و ئەمانەتە دەبێت بیکەین.

هاوکات، سەرۆکی حکوومەتی هەرێمی کوردستان داوایەکی ئاراستەی سەرجەم لایەنەکان کرد واز لە بەرژەوەندیی حزبی و شەخسیی خۆیان بهێنن و واز لەوە بهێنن کە لایەنێک سوودمەند بێت بەسەر لایەنێکی دیکە، ئەمە دەستکەوت نییە، بەڵکو دەستکەوت ئەوەیە کە برایەتیی نێوان هەموو پێکهاتەکان بپارێزین ودەستکەوت و ئەزموونەکەمان بپارێزین.

سەرۆکوەزیران مەسرور بارزانی گوتیشی: عێراق وڵاتێکی دەوڵەمەندە بەڵام ئیدارەیەکی باشی داهات و سەروەت و سامانەکەی نەکراوە و دەکرا عێراق ببێتە یەکێک لە وڵاتە پێشکەوتووەکانی ڕۆژهەڵاتی ناوەڕاست، ئێستاش دەکرێت ئەوە بکرێت، ئەگەر بەبیری یەکتر قبووڵکردن و رێزگرتن لەیەک کار بکەین و بەردەوام بین.

لەبارەی هەڵوێستی هەرێمی کوردستان، سەرۆکوەزیران مەسرور بارزانی ڕایگەیاند: نیازی ئێمە ئەوەیە لەگەڵ هەموو خوشک و براکانمان لە عێراق، بە ئاشتی بژین ومافی هەموو پێکهاتەیەک ڕێزی لێ بگیرێت.

سەرۆکی حکوومەتی هەرێمی کوردستان جەختیکردەوە، ئێمە واز لە هیچ مافێکی دەستووری خەڵکی کوردستان ناهێنین و دەبێت هەموو پێکەوە بیربکەینەوە چۆن کێشەی خەڵک چارە بکەین و کێشەی ئێمە تەنیا مووچە نییە، ئێمە کێشەی ناسنامە و خاکمان هەیە، لە کۆتاییشدا سەرکەوتن هەر بۆ هەقە و بۆ ئێمەیە.

لە کۆتایی گوتارەکەیدا، سەرۆکوەزیران مەسرور بارزانی ئاشکرای کرد: سبەی لە کۆبوونەوەی ئەنجوومەنی وەزیران بڕیارێک لە بەرژەوەندیی هەموو خەڵکی کوردستان دەدەین و گوتیشی: لە کێشە و ناخۆشییەکاندا، خۆمان بە تەنیا دەبینین بەڵام خوا و خەڵکی کوردستانمان لەگەڵ بێت منەتی کەس هەڵناگرین.

هەروەها گوتیشی: لە کاتە سەختەکاندا پیاوی تەنگانە کەم لەگەڵ ئێمە وەستاوە و سبەی کە بڕیارەکەماندا، هەموو لایەک خۆیان دەکەن بە شەریکی ئەو بڕیارە.

دەقی وتەی مەسرور بارزانی، سەرۆكی حکومەتی هەرێمی کوردستان:

بە ناوی خوای گەورە و میهرەبان
بەڕێزان:
ئامادەبووانی هێژا:

زۆر خۆشحاڵم كە ئەمڕۆ ئێوارە لەگەڵ ئێوەی بەڕێز لێرە كۆبووینەتەوە، پێموایە باش دەبێت لەسەر بارودۆخی ئێستا هەندێك قسە بكەین. نامەوێ زۆر لە كاتتان بگرم و زۆر نەماوە بۆ بەربانگ، ئینشائەڵا خوا تاعەت و ڕۆژوو و نوێژی هەموو لایەكیشتان قەبووڵ بكات.

سوپاسێكی بێپایانی خەڵكی كوردستان دەكەم بۆ خۆڕاگری و پشوودرێژییان، بۆ پشتیوانی و متمانەیان بە ئێمە و بە حكومەتەكەی خۆیان. ئەو ماوەیە دۆخێکی ناخۆش بۆ خەڵكی كوردستان هاتۆتە پێشەوە، بە تایبەتیش كە بەهۆكاری جیاواز هەوڵ دراوە كە مووچەی هەرێمی كوردستان نەنێردرێ و بودجەی هەرێمی كوردستان دابین نەكرێ و كێشە و گرفتی ئابووری بۆ خەڵكی كوردستان زیاتر بووە. بەڵام سەرەڕای ئەوەش، خۆڕاگریی خەڵكی كوردستان وای كردووە كە ئێمە بتوانین بەردەوام بین لە خزمەتكردن. دەمەوێ دڵنیاتان بكەمەوە ئەوەی لە توانای ئێمەدایە دەیكەین بۆ ئەوەی ئەم كێشە و گرفتانە چارەسەر بكەین و بگەینە ئەنجامێك كە لە كۆتاییدا لە بەرژەوەندیی خەڵكی كوردستان و هەموو عێراقیشدا بێت، بەبێ ئەوەی ئێمە بە هیچ جۆرێك واز لە هیچ مافێكی دەستووریی خەڵكی خۆمان بهێنین.

دەمەوێ باسی ئەوە بكەم كە بۆ ئەم دۆخە بە ئێرە گەیشت و چۆن ڕووی دا.

لێتان ناشارمەوە ماوەیەكی زۆرە پیلان هەیە بۆ ئەوەی قەوارەی هەرێمی كوردستان نەمێنێت یاخود لاواز بكرێت، كە بە شێوازی جۆراوجۆر جێبەجێ كراوە. جێگەی داخە كە هەندێك بیروبۆچوونی ناحەز بەرامبەر بە هەرێمی كوردستان توانیوویانە بەم جۆرە رەفتار لەگەڵ خەڵكی كوردستان بكەن. لەوەش ناخۆشتر ئەوەیە، كە لە ناوخۆشدا یارمەتیی ئەم بۆچوونە شۆڤێنییە دراوە كە ڕێگە خۆش بكەن بۆ ئەوەی قەوارەی هەرێمی كوردستان و دەستكەوتەكانی هەرێمی كوردستان لەناو ببەن یاخود لاواز بكەن.

ئێمە تۆزێك بە مێژووی خۆماندا بچینەوە دەبینین كە دروستبوونی هەرێمی كوردستان بەم شێوازەی كە هەیە، كەس خێری پێ نەكردووین، ئەمە بەرهەمی خوێنی شەهیدەكانمانە، بەرهەمی خەباتی خەڵكی ئێمەیە، ئێوە هەمووتان لە دروستكردنی ئەم ئەزموون و ئەم هەرێمە بەشدار بوون. ئێمە دەستوورێكمان هەیە كە لە دەستووردا مافی هەرێمی كوردستان و ئەركەكانیشمان دیاریكراوە. ئەوەی پێمانكراوە لە جێبەجێكردنی ئەركەكانمان، درێخیمان نەكردووە، هەموو ئەركەكانی خۆمان وەكوو خۆی جێبەجێ كردووە، بەڵام بەداخەوە لە دابینكردنی مافەكانمان، بەداخەوە زۆر لە مافەكانمان دابین نەكراون و پێشێل كراون، تەنانەت هەوڵی ئەوەش دەدەن كە ئەوەی لە دەستووریشدا هاتووە، پێشێل بكرێن.

لێرەدا ئێمە بەسەر دوو بەرەدا دابەش بووین، بەرەیەك بەرەی خۆڕاگرییە، بەرەی پاراستنی ئەزموونەكەمان و بەرەی ڕێزگرتنە لە خوێنی شەهیدەكانمان و خەباتی ئەم گەلە ستەمدیدەیە. بەرەیەكیش كە پێیوایە هەموو ئەوانە قەیناكە با بڕوات، با تەنیا نانێكی زەلیلمان بدەنێ، هەموو كێشەی هەرێمی كوردستان و هەموو قەزیەی خەڵكی كوردستان بكرێ بە مووچە. من دڵنیام زۆربەی خەڵكی كوردستان لەگەڵ ئەو بۆچوونە نین. ئێمە دەمانەوێ ڕێز لە خوێنی شەهیدانمان بگرین، لە خەباتی ئێوە بگرین، لەم ئەزموونە بگرین، پاراستنی ئەم ئەزموونە، پاراستنی خەباتی گەلەكەمان، ئەركێكە، ئەمانەتێكە بەسەر ملی هەمووماندا هاتووە، ئەوەی پێمان بكرێ بۆ پاراستنی ئەو ئەزموونە دەبێ بیكەین.

لێرەدا من داوایەكی برایانەم لە هەموو لایەنە سیاسییەكانی كوردستان هەیە كە هەموویان واز لە بەرژەوەندیی شەخسی و حزبیی خۆیان بێنن، واز لەوە بێنن كە پێیانوابێت لایەنێك سوودمەند بێ بەسەر لایەنێكی تر ئەمە دەستكەوتە، بەهیچ جۆرێك ئەمە دەستكەوت نییە. ئێمە ئەو وەختە دەتوانین دەستكەوتمان هەبێت كە خزمەتی هەموو خەڵكی كوردستان بكەین بەبێ جیاوازی. ئەو وەختە دەتوانین دەستكەوتمان هەبێت كە ئێمە بتوانین پارێزگاری لە مافە دەستوورییەكانی خەڵكی كوردستان بكەین. ئەو وەختە دەتوانین دەستكەوتمان هەبێت كە برایەتیی بەینی هەموو پێكهاتە و نەتەوەكان لە كوردستان و عێراقدا بپارێزین.

لێرەوە جێی خۆیەتی من سوپاسی هەڵوێستی ئەو بەڕێزانەش بكەم چ لە بەغدا و چ لە ناوچەكانی تری عێراقدا كە هاوهەڵوێست و پشتیوانی خەڵكی كوردستان بوون، پشتیوانی ڕاستی بوون، ئەوانیش بەرگریی لە مافە دەستوورییەكانی هەموو عێراق دەكەن. خەڵكێكی زۆر هەیە كە ئێمە لەگەڵیاندا خەریكین بۆ ئەوەی بتوانین بگەین بە ئەنجامێك كە لەبەرژەوەندیی هەموو لایەكدا بێت. عێراق وڵاتێكی دەوڵەمەندە بەڵام بەداخەوە ئیدارەیەكی باشی داهات و سەروەت و سامانی ئەم وڵاتە نەكراوە، ئەگینا ئێستا دەمانتوانی ببین بە یەكێك لە باشترین وڵاتەكانی رۆژهەڵاتی ناوەڕاست. ئێستاش دەتوانین ئەوە بكەین ئەگەر بە بیری یەكتر قەبووڵكردن و ڕێز لە یەكتر گرتن لەگەڵ یەكتر بەردەوام بین.
ئێمە لە هەرێمی كوردستان نیەتمان وایە كە لەگەڵ هەموو خوشك و براكانی خۆمان لە هەموو ناوچەیەكی تری عێراقیش بە یەكەوە بتوانین بە ئاشتییانە بژین. مافی هەموو پێكهاتەیەك رێزی لێ بگیرێت، بتوانین بە یەكەوە وڵاتێكی خۆشتر و گەشتر و پێشكەوتووتر بینا بكەین.

لێرە من جارێكی تر داوا دەكەم با ئێمە یەكڕیزی لەسەر بنەمای یەكهەڵوێستی و ئەو ئامانجە پیرۆزەی كە هەمانە و بەرژەوەندیی باڵای گەل و هەرێمەكەمانە، لەسەر ئەوە یەكڕیز بین. ئێمە بێین بەیەكەوە بیر لەوە بكەینەوە چۆن مافی ئەو خەڵكە دابین بكەین. كێشەی ئێمە تەنیا كێشەی مووچە نییە، ئێمە كێشەی نەتەوەیی و كێشەی خاكمان هەیە. دەبێ هەموو ئەو مافانە دەستەبەر بكەین. دڵنیاتان دەكەمەوە ئێمە لە خزمەتی ئێوە دەبین و بە هیچ جۆرێك واز لە هیچ مافێكی دەستووریی ئەم خەڵكە ناهێنین، بەردەوامیش دەبین بۆ چارەسەركردنی ئەم كێشە و قەیرانانەی ئێستا هاتوونەتە پێشەوە. جارێكی تر من سوپاسی خۆڕاگری و پشوودرێژی و پشتیوانیی ئێوە دەكەم. چاویشمان لەوەیە خوا پشتیوانمان بێ، ئێوە پشتیوانمان بن، لە ئەنجامیشدا ئینشائەڵڵا سەركەوتن هەر بۆ حەقە و هەر بۆ ئێمەیە.

ئێمە هەمیشە لە وەختی خۆشیدا رەفیقمان زۆرە، لە وەختی تەنگانە و ناخۆشیدا خۆمان زۆر بە تەنیا دەبینین، تەنیا خەڵكی كوردستانمان لەگەڵە، ئەمەش بۆ ئێمە لە هەموو هێزێك زیاتر و پشتیوانییەكی بەهێزترە بۆ ئێمە، خوامان لەگەڵ بێ و ئێوەمان لەگەڵ بێ، منەتی كەس هەڵناگرین. هەر بۆ ئەمەش، تا ئێستا هەرچی بڕیارمان داوە كە سەخت بووە، پیاوی تەنگانە كەم لەگەڵ ئێمە وەستاوە. سبەی ئێمە بڕیارێك دەدەین، كۆبوونەوەی ئەنجوومەنی وەزیرانمان هەیە، من دڵنیام هەموو لایەك دەبێ بە شەریكی ئەو بڕیارەی كە سبەینێ دەیدەین، چونكە بڕیارێكە لە بەرژەوەندیی ئەم خەڵكەدا دەبێت.

تُتاح هذه الصورة أيضا في: کوردی

مقالات ذات صله

الرد

پۆستی ئەلکترۆنیکەت بڵاو ناکرێتەوە . خانە پێویستەکان دەستنیشانکراون بە *

Copyright © 2021 by Lalish Media Network .   Developed by Ayman qaidi