وەزارەتا دارایی بریارا دادگەها فیدرالی وەك خۆ بهێتە جێبەجێ کرن، دشێت پشت ب (هژمارا من) ببەستیت
باسنيوز:
ئەڤرو چارشەمبی 28ێ شوباتێ 2024، دادگەها فیدرالی ب فەرمی، ناڤەرۆكا بریارا خۆ دەربارێ مووچەیێن مووچەخۆرێن هەرێما كوردستانێ بڵاڤکر كۆ وەك هەمی بریارێن دی یێن دادگەهێ، د روانگەها دژایەتیكرنا هەرێما كوردستانێ و كێمكرنا دەسهەلاتێن دەستووریێن هەرێما كوردستانێ دەرخستیە.
ب گوتنا پەرلەمانتارێن لژنا داراییا پەرلەمانێ عێراقێ، تەیف سامی، وەزیرا داراییا عێراقێ گوتیە هەتا هەمی مووچەخۆرێن هەرێما كوردستانێ ل بانكێن فیدرالیێن عێراقێ هژمارا بانكی چێنەکەن، مووچەیێ هەیڤا سێ ناهنێرین، بەلێ ئەگەر وەزیرا داراییا عێراقێ بریارا دادگەها فیدرالی ب تمامی جێبەجێ بكەت، ئەڤە پێتڤی ب ڤەكرنا هژمارا بانكی ل بانكێن فیدرالی نینە.
ل دیف دیفچوونا (باسنیوز)، د برگا (ئێکێ) یا بریارا دادگەها فیدرالییا عێراقێدا چ ئاماژەكا راستەوخۆ ب وێ نەدایە كۆ دڤێت هەمی مووچەخۆر هژمارا بانكی ل بانكێن فیدرالی ڤەكەن، بەلكو تنێ ئەو كریە مەرج كۆ هەمی سازیێن هەرێما كوردستانێ هەماهەنگییا راستەوخۆ دگەل وەزارەتا داراییا عێراقێ بكەن بۆ هندێ کۆ مووچەیێن مووچەخۆران ل بانكێن فیدرالی بهێتە جێگیر (توطين) کرن.
هەڤدەم ب دەق د بریارێدا هاتیە: ”لسەر هەمی بانكێن سەر ب داخازكریێ ئێكەم (حكوومەتا فیدرالی) هێسانکاری بۆ كرداریێ جێگیركرن (توطين) بكەن و هەمی رێکێن پێتڤیە بگرنە بەر بۆ هندێ کۆ مفاداربن (فەرمانبەر یان راسپاردی ب ئەركێ گشتی یان خانەنشینی یان مفادارێن تۆرا پاراستنا جڤاکی) بشێن ل جهێ ئاکنجیبوونا خوە مووچەیێن خوە وەربگرن، ئەو ژی برێکا وان دەروازێن ل هەرێمێ بڵاڤبوونە یان برێکا وان بانكێن ل هەرێما كوردستانێ و دەستێری ژ بانكێن ناڤەندیێن عێراقێ وەرگرتیە.“
لگورەی شەهرەزایێن یاسایی، ل دیف وێ برگا بریارا دادگەها فیدرالی، وەزارەتا داراییا عێراقێ و بانكێن فیدرالی دشێن بلەز بریارێ جێبەجێ بکەن و مووچەیێن مووچەخۆرێن كوردستانێ نەهێتە پاشخستن، پەنایێ بۆ پرۆژێ (هژمارا من) ببەن كۆ دەمەکە حكوومەتا هەرێما كوردستانێ كار لسەر دكەت و د ڤێ رێکێدا سەدان هزار مووچەخۆراا هەتا نوکە هژمارا بانكی ژ بانکێن كوردستانێ ڤەکریە.
تُتاح هذه الصورة أيضا في: کوردی
