هه‌ڤپه‌یمانیا نێڤده‌وله‌تى: ب كارێ پێكڤه‌یى د شیان دایه له‌زاتی د پرۆسێسا چاكسازیێ یا پێشمه‌رگه‌ى دا بهێته كرن
گاڤ
هه‌ڤپه‌یمانیا نێڤده‌وله‌تى راگه‌هاند كو ب رێكا هه‌ڤپشكیێ و كارێ پێكڤه‌یى د شیان دایه له‌زاتی د پرۆسێسا چاكسازیێ یا پێشمه‌رگه‌ى دا بهێته كرن.
ئه‌ڤرۆ پێنجشه‌مبیێ ل دیوانا وه‌زاره‌تا پێشمه‌رگه‌ى ب ئاماده‌بوونا فه‌ریق روكن عیسا عوزێر سه‌رۆك ئه‌ركانێ وه‌زاره‌تا پێشمه‌رگه‌ى و جێگرێن سه‌رۆكێ ئه‌ركانى بۆ ئۆپه‌راسیۆنان و ئیداره و میره‌یێ، به‌رپرسێ بنكه‌یێ ئوپه‌راسیۆنان و رێڤه‌به‌رێ حه‌ره‌كاتێن سه‌ربازى و كولۆنێل مه‌كێنزى فه‌رمانده‌یێ هێزێن هه‌ڤپه‌یمانان ل هه‌رێما كوردستانێ و تیمه‌كا شیره‌تكارێن سه‌ربازى یێن هه‌ڤپه‌یمانان، د كۆمبوونه‌كێ دا كارنامه‌یا هێزێن پێشمه‌رگه‌ى (Operating Concept) كو ئێكه ژ خالێن گرنگ یێن یاداشتنامه‌یا لێكتێگه‌هشتنێ دناڤبه‌را وه‌زاره‌تا پێشمه‌رگه‌ى و وه‌زاره‌تا به‌رگریێ یا ئه‌مریكا دا دانوستاندن ل سه‌ر هاته كرن.
ل گۆره‌ى به‌یانه‌كا وه‌زاره‌تا پێشمه‌رگه‌ى “د وێ كۆمبوونێ دا، كارنامه‌یا هێزێن پێشمه‌رگه‌یێ كوردستانێ و قووناغێن بجهئینانا یاداشتنامه‌یا لێكتێگه‌هشتنێ دناڤبه‌را وه‌زاره‌تا پێشمه‌رگه‌ى و وه‌زاره‌تا به‌رگریا ئه‌مریكا دا هاتنه به‌حسكرن و هه‌ردو لایان ب گرنگى ڤه به‌حس ل بجهئینانا هه‌مى بڕگه و خالێن دناڤ یاداشتنامه‌یا لێكتێگه‌هشتنێ دا كر”.
سه‌رۆكێ ئه‌ركانێ هێزێن پێشمه‌رگه‌ى دوپاتكر كو د به‌رده‌وامن و بزاڤێن خۆ چڕكرینه بۆ رێكخستنا هێزێن جودا جودا یێن پێشمه‌رگه‌ى و گاڤێن باش هاتینه هاڤێتن، ئاماژه دا وێ چه‌ندێ ژى كو پلانا وان بجهئینانا هه‌مى به‌رنامه و بڕگه‌یێن یاداشتنامه‌یا لێكتێگه‌هشتنێ یه ل گه‌ل ئه‌مریكا بۆ ئێكخستنا هێزێن پێشمه‌رگه‌ى.
شاندێ هه‌ڤپه‌یمانان دلخۆشیا خۆ ب بزاڤێن وه‌زاره‌تا پێشمه‌رگه‌ى ده‌ربڕى و راگه‌هاند “ب گرنگى ڤه ل بزاڤ و گاڤێن وه‌زاره‌تا پێشمه‌رگه‌ى و حكومه‌تا هه‌رێمێ بۆ بجهئینانا بڕگه‌یێن یاداشتنامه‌یێ دنێرین، هه‌ڤده‌م ئاماژه دا وێ چه‌ندێ كو ب هه‌ڤپشكى و كارێ پێكڤه‌یى ل گه‌ل پێشمه‌رگه‌ى دشێین له‌زاتیێ د پرۆسێسا چاكسازیێ یا پێشمه‌رگه‌ى و پرۆسێسا رێكخستنا هێزان دا بكه‌ین”.
ل دويماهيێ دوپاتى ل سه‌ر گرنگیا به‌رده‌وامیا پشتگیریا هه‌ڤپه‌یمانیا نێڤده‌وله‌تى بۆ هه‌رێما كوردستانێ و هه‌ڤكارى و هه‌ماهه‌نگیێ ل گه‌ل هێزێن پێشمه‌رگه‌یێ كوردستانێ هاته كرن.
تُتاح هذه الصورة أيضا في: کوردی
