ئایار 31, 2024

Lalish Media Network

صحيفة إلكترونية يومية تصدر باشراف الهيئة العليا لمركز لالش الثقافي والاجتماعي في دهوك - كوردستان العراق

بنگه‌هێ لالش..زێده‌تر ژ 50% په‌رستگه‌ها لالش هاتيه نووژه‌نكرن‌

بنگه‌هێ لالش..زێده‌تر ژ 50% په‌رستگه‌ها لالش هاتيه نووژه‌نكرن‌

ئه‌ندازيار خالد نه‌رمۆ:داخوازا دانانا ئيداره‌يه‌كێ بۆ ب ڕێڤه‌برنا كاروبارێن لالش دكه‌ين

تۆڕا لالش/دهۆك

ئێڤاريا ئيرۆ ڕۆژا پێنج شه‌مبوويێ 9ى ئه‌يارا 2024ێ ل باره‌گايێ بنگه‌هێ لالش ل دهۆكێ ب ئاماده‌بوونا هه‌ژماره‌كا كه‌سايه‌تى و ڕه‌وشه‌نبير و مامۆستايان،دانوستاندنه‌كا ڤه‌كرى ل دۆر(نووژه‌نكرنا په‌رستگه‌ها لالش گه‌هشتيه‌ چ قۆناغ)،بۆ ئه‌ندازيار “خالد نه‌رمۆ” ئێك ژ سه‌رپه‌رشتيارێن نووژه‌نكرن و ئاڤاكرنا په‌رستگه‌هێ هاته‌ ڕێكخستن.

ل پێشيێ وه‌ك ڕێزگرتن ل سه‌ر گيانێ جانگۆريان و سه‌روه‌رێ وان بارزانيێ نه‌مر و ئدريسێ جوانه‌مه‌رگ ئاماده‌بوويى خۆله‌كه‌كێ ڕاوه‌ستيان،ل پێرا ئه‌ندازيار “خالد نه‌رمۆ” ئێك ژ سه‌رپه‌رشتيارێن نووژه‌نكرن و ئاڤاكرنا په‌رستگه‌ها لالش ئاماژه‌ دا قۆناغێن ده‌ستپێكرنا نووژه‌نكرنا لالش و دياركر؛پشتى ساڵا 1990ڕه‌وشه‌نبيرێن ئێزديان هزر ل نووژه‌نكرنێ دا كرن و و ئێك ژ لايه‌نان بنگه‌هێ لالش ل دهۆكێ بوويه‌ و حكومه‌تا هه‌رێما كوردستانێ ژى ل سالا 2012ێ ماسته‌ر پلان بۆ لالش دا،هه‌ر ژ ماسته‌پلانێ ل ساڵا 2018ێ هه‌ر ئێك ژ حكومه‌تا هه‌رێما كوردستانێ و زانكۆيا يا ئه‌مريكى و خێرخوازێن ئێزديان هاريكاربوون بۆ سه‌ركه‌فتنا ڤێ پرۆسه‌يێ،هه‌ر ديسان ناساندنا ڤى جهێ پيرۆز ژلايێ گه‌شتياريا ئايينى و شوونوارى ڤه‌ كاره‌كێ گرنگ بوو.

ئه‌ندازيارى ئاماژه‌ ب وێ چه‌ندێ دا دنۆكه‌ دا كار ل سه‌ر نووژه‌نكرنا په‌رستگه‌هێ دئێته‌ كرن و ب گشتى ب ڕێژه‌يا زێده‌تر ژ 50%هاتيه‌ نووژه‌نكرن و كار يێ به‌رده‌وامه‌ و ب وى شێوازى كو ده‌ست كارى ب ڕه‌سه‌ناتى و نه‌خشه‌ و سیمایێ په‌رستگه‌هێ نه‌ئێت كرن بتنێ هنده‌ك جهان چیمه‌نتو لێ هه‌یه‌ ئه‌و جهـ دئێنە  خراپكرن و به‌رێن تایبه‌ت ب ده‌ستێ هۆستایێن كه‌ڤنار هاتیه‌ چێكرن دئێت دانان و ئه‌ڤ پرۆسه‌ ب شێوازێن ئه‌ندازه‌يى  ب ڕێڤه‌دچت داكو جهێن پيرۆز يێن شوونوارى و كه‌ڤنار وه‌كو خۆ بمينن،چنكو لدووڤ بریارا میرێ ئێزدیان كو ئه‌و جهێن پیرۆز یێن ئاینى بێن پاراستن ژبه‌ركو پاراستنا جهێن پیرۆز یێن ئایينى دناڤ په‌رستگه‌هێ پیرۆزتره‌ ژ نووژه‌نكرنێ.

گۆت ژى:ده‌ست ب ئه‌نجامدانا چه‌ندين پرۆژێن خزمه‌تگۆزارى هاتيه‌ كرن،بۆ هندێ ڕێ بێته‌ خۆشكرن بۆ سه‌ره‌دانكه‌ران بۆ ناڤا لالش و ئاسته‌نگى  هه‌مبه‌ر هاتنوچوونا خه‌لكى نه‌مينن.

خالد نه‌رمۆ زێده‌تر گۆت: ژ ئارمانجێن نووژه‌نكرنا په‌رستگه‌ها لالش ئه‌وه‌ ببته‌ جهێ گه‌شتياريا ئايينى و شوونوارى و نه‌قش و نيگاران و كه‌ڤناريا لالشێ ڤه‌گه‌ڕينين،هه‌رديسان دخوازين ڕێوره‌سمێن ئايينى يێن جه‌ژن و هه‌لكه‌فتان ل لالش پتر ڕێكخستى بن‌ داكو ڕوويه‌كێ جوانتر يێ جه‌ژنێن خۆ نيشا خه‌لكێ بيانى بده‌ين‌ و داخازا دانانا ئيداره‌يه‌كێ ژى بۆ ب ڕێڤه‌برنا كاروبارێن لالش دكه‌ين.

ل داویێ دانوستاندنەکا ب تێرو تەسەل دناڤبەرا ئامادەبوویان دا پەیدابوو،پشتى ئاڕاسته‌كرنا پرسياران ل دۆر چاوانيا ب ڕێڤه‌چوونا پرۆسه‌يا نووژه‌نكرنا لالش ژلایێ ئه‌ندازيارى ڤه‌ بەرسڤا هەموو پرسیاران هاتنە دان.

په‌رستگه‌ها پيرۆزا لالش تاكه‌ په‌رستگه‌ها ئێزديانه‌ ل سه‌رتاسه‌رى جيهانێ و  ڕێوره‌سمێن چه‌ندين جه‌ژن و هه‌لكه‌فتێن ئۆلى لێ دئێنه‌ گێڕان و ساڵانه‌ ب هه‌زاران ئێزدى قه‌ستا په‌رستگه‌هێ دكه‌ن.

دچارچووڤێ پێنج شه‌ما ڕه‌وشه‌نبيرى دا كو ل باره‌گايێ بنگه‌هێ لالش ل دهۆكێ بۆ ڕه‌وشه‌نبيرێن ئێزديان دئێته‌ ل دارخستن،چه‌ندين مژارێن گرنگ يێن گرێدايى ب ڕه‌وشا ئێزديان ڤه‌ دئێنه‌ گۆتوبێژكرن.

 

تُتاح هذه الصورة أيضا في: کوردی

مقالات ذات صله

الرد

پۆستی ئەلکترۆنیکەت بڵاو ناکرێتەوە . خانە پێویستەکان دەستنیشانکراون بە *

Copyright © 2021 by Lalish Media Network .   Developed by Ayman qaidi