خۆله‌كا ڕۆژنامه‌ڤانى بۆ كادر و كارمه‌ندێن ڕاگه‌هاندنا بنگه‌هێ لالش هاته ڤه‌كرن
تۆڕا لالش/دهۆك
ئيرۆ ل ده‌مژمێر 10:30سبێ ل په‌رتۆكخانا پير خدر،به‌شێ ڕاگه‌هاندنێ ل ده‌سته‌يا بلندا بنگه‌هێ لالش يێ ڕه‌وشه‌نبيرى و كۆمه‌ڵايه‌تى ل دهۆكێ،خۆله‌كا ڕاگه‌هاندنێ يا ئێك ڕۆژى بۆ ته‌ڤايا كادر و كارمه‌ندێن تايى و نڤيسينگه‌هـ و ده‌سته‌يا بلند ڤه‌كر.
ب پشكداريا نێزيكى 30 كادر و كارمه‌ندێن تايى و نڤيسينگه‌هـێن لالش و ده‌سته‌يا بلند،ئيرۆ 23ى كانوونا ئێكێ 2023ێ،به‌شێ ڕاگه‌هاندنێ ل ده‌سته‌يا بلندا بنگه‌هێ لالش ڕابوو ب ڤه‌كرنا خۆله‌كا ڕاگه‌هاندنێ بۆ ڕۆژنامه‌ڤان “نه‌زير عه‌لى” ل دۆر(چاوانيا نڤيسينا ڕاپۆرتا هه‌والى،نڤيسين و پێشكێشكرن) و ڕۆژنامه‌ڤان “نه‌وزاد هلورى” ل دۆر(چێكرنا به‌رهه‌مێن ميديايى ب ڕێيا موبايلێ).
ل ده‌ستپێكێ ڕێزدار”سه‌عيد جردۆ”سه‌رۆكێ ده‌سته‌يا بلندا بنگه‌هێ لالش دپه‌يڤه‌كێ دا باس ل گرنگيا ڕۆلێ ڕاگه‌هاندنێ دقۆناغا ئيرۆ داكر و ڤه‌كرنا ڤێ خۆلێ بۆ ستافێ ڕاگه‌هاندنا لالش ب گرنگ ل قه‌له‌مدا و ده‌ستخۆشى و سه‌ركه‌فتن بۆ پشكداران خواست.
دڤێ خۆلێ دا هه‌ر ئێك ڕۆژنامه‌ڤانان نه‌زير عه‌لى و نه‌وزاد هلورى ب تێر و ته‌سه‌ڵ باس ل چاوانيا نڤيسينا ڕاپۆرتا هه‌والى،بيرۆكه،نڤيسين و پێشكێشكرن و چێكرنا به‌رهه‌مێن ميديايى ب ڕێيا موبايلێ،ب شێوازێ تێروى و پراكتيكى بۆ پشكداران كر و دانه دياركرن كو دڤێت خۆ ل گه‌ل ڕاگه‌هاندن و سۆشيال ميديا ڤى سه‌رده‌مى ب پيشه‌يانه و به‌رپرسيارانه بگونجينن و ب هوشيارى سه‌ره‌ده‌ريێ دگه‌لدا بكه‌ن.
هۆگر نه‌جيب،ئێك ژ پشكدارێن خۆلێ ئه‌ڤ بۆچۆنه هه‌بوو؛ڤه‌كرنا ڤان جۆره خۆلان دڤى ده‌مى دا بۆ پێشڤه‌برنا شيانێن كارمه‌ندێن ڕاگه‌هاندنا لالش گرنگن،داكو ب شێوه‌كى پرۆڤيشيناڵ سه‌ره‌ده‌ريێ دگه‌ل بابه‌تان دا بكه‌ن ب تايبه‌ت ژى ده‌مێ كار و بزاڤ و چالاكيێن خۆ به‌لاڤه دكه‌ن دسۆشيال ميديايێ دا.
سه‌باره‌ت ڤه‌كرنا خۆلا ناڤبرى “كاروان باعه‌درى” به‌رپرسێ ڕاگه‌هاندنا بنگه‌هێ لالش دبێژت:ئێك ژ ئارمانجێن بنگه‌هێ لالش ئه‌وه شيانێن كارمه‌ندێن خۆ دبياڤێ ڕاگه‌هاندنا سه‌رده‌ميانه دا پێشبێخت ب تايبه‌ت ژى سۆشيالێ،له‌وا ڕابوو ب ڤه‌كرنا ڤێ خۆلێ بۆ كادر و كارمه‌ندێن ڕاگه‌هاندنێ ل تايى و نڤيسينگه‌هان و ده‌سته‌يا بلند،خاله‌كا دن ژى ئه‌وه پشكدار بكارن ئێش و ئازارێن ئێزديان بگه‌هينن جيهانێ.
بۆ زانين ئه‌ڤه بۆ چه‌ندين جارانه به‌شێ ڕاگه‌هاندنێ ل ده‌سته‌يا بلندا بنگه‌هێ لالش خۆلێن ڕۆژنامه‌ڤانى و ڕاگه‌هاندنێ بۆ كارمه‌ندێن خۆ ڤه‌دكه‌ت.
تُتاح هذه الصورة أيضا في: کوردی
