ئایار 30, 2024

Lalish Media Network

صحيفة إلكترونية يومية تصدر باشراف الهيئة العليا لمركز لالش الثقافي والاجتماعي في دهوك - كوردستان العراق

بنگه‌هێ لالش: ب دله‌كێ پرێ خه‌مگين ڤه‌ بيره‌وه‌ريێن كۆمكوژيێن گرعزێر و سيباشێخدرێ و گوندێ كۆچۆ ل بيردئينين

بنگه‌هێ لالش: ب دله‌كێ پرێ خه‌مگين ڤه‌ بيره‌وه‌ريێن كۆمكوژيێن گرعزێر و سيباشێخدرێ و گوندێ كۆچۆ ل بيردئينين

جاره‌كا دى ب دله‌كێ پرێ خه‌مگين ڤه‌ هه‌ردوو بيره‌وه‌ريێن كۆمكوژيێن گرعزێر و سيباشێخدرێ و گوندێ كۆچۆ ل بيردئينين،ئه‌ڤه‌ 16ساڵ ل سه‌ر كۆمكوژيا گرعزێر و سيباشێخدرێ و 9ساڵ ل سه‌ر كۆمكوژيا كۆچۆ يا بريندار ده‌رباز دبن،مەرەما دوژمنێ‌ خوین مژ ژڤێ‌ هێرشا بێ‌ وژدان قركرن و نەمانا جڤاكێ‌ ئێزدیان بوو ل شنگالێ‌،لەوما ب هزرو بیرێن خۆ یێن گەنی دەست ب هێرشا تیرۆرستی كرن و ب هەزاران زه‌لام كچ و دەیكێن مە یێن ئێزدی كوشتن و گرتن و ئێخسیركرن و هەولێن بێ‌ روومەت كرن و شكاندنا كەسایەتیا وان دان،وەكو هەر كەرستەكێ‌ ل بازارێ‌ كرین و فرۆتن ب وان هاتە كرن..ل 14ى ته‌باخا ساڵا 2007 ل دوو جیێن جودایێن سەر ب قەزا شنگالێ‌ خەلكێ‌ هەژار و بێ‌ دەسەلات و بێ‌ گونەهێ ئێزدی ل كۆمەلگەهێن “گرعزێر و سیباشێخدر” كەفتنە بەر پێلا كریارێن تیرۆڕستی ژلایێ‌ دوژمنێن مرۆڤایەتیێ‌ و د (4) پەقینێن هەڤدەم دا ب سەدان كەس ژ چینێن جێواز بوونە قوربانیێن هزرا تیرۆرێ‌ ب كوشتن و برینداربوون و وەندابوونێ‌ ژبلی زەرەر و زیانێن مادی و كۆمكوژیەك دن و فەرمانەك دن ل سەر فەرمانێن ئێزدیان هاتە زێدەكرن كو ب فەرمانا(73) دئێتە هژمارتن، هه‌ر ديسان هێش ئێزدی لبن شۆكا كۆمكوژيا گرعزێر و سیباشێخدر دەرنەكەفتین و برینێن وان سارێژنەبووین، پشتی ماوەیەكی كێم جارەكا دى تیرۆرستێن چەرخێ‌(21)ێ‌ لژێر ناڤەكی دن روویێ‌ خۆ یێ‌ رەش و تاری نیشانی جیهانێ‌ دان و بناڤێ‌ دەولەتا ئیسلامێ‌ ل عێراق و شام “داعش” ل ڕۆژا 15/8/2014 ژ ئەنجامێ هێرشەکا دڕندانە بۆ سەر گوندێ کۆچۆ ژلایێ تیرۆرستێن داعشێ قەلەرەشکێن بیابانا ڤە ب هەزاران ژ خەلکێ گوندێ کۆچۆ و دەڤەرێن دی یێن شنگالێ ب دەستێن وان یێن قرێژ هاتنە کوشتن وگرتن ومالێن وان تالان و وێران کرن و ژسەر جهـ و وارێن خۆ دەربەدەربوون، دڤێ هێرشێ دا تیرۆرستان ب هزاران کچ و ژنێن ئێزدی ب دارێ زۆرێ رەڤاندن و لبازارێ کرین و فرۆتن ب وان دکرن وەکو هەر کەلوپەلەکی بێ بها وئەڤە ژی جارا بەریە ل سەرانسەری جیهانێ رووبدەت و ئەڤ جۆرێ سەرەدەریێ دگەل مرۆڤان بێتە کرن و بڤێ رەنگی ئافرەت بێتە تەپەسەر کرن وئێشاندن،گرتن ورەڤاندنا ئافرتێن ئێزدی ل کۆچۆ دیاردەکا جەرگ برە وگونەهباریەکا مەزنە هەستێ هەر کەسەکی خودان وژدان ل سەر روویێ ڤێ ئەردێ هژاند ومانا وان هەتا نهۆ دناڤ دەستێن هۆڤ ونەمەردان دە شەرمەزاریەکا هەتکبەرە بۆ هەر مرۆڤەکی خودان کەرامەت.
ل هەردوو فەرمانێن (73 و 74)ێ‌ جارەكا دى ئێزدی كەفتنە بەر فەرمانا و بوونە نێچیرا توندرەویا ئۆلی و بزاڤێن كۆمكوژی و تیرۆرستی،ئه‌ڤ هه‌ردوو بيره‌وه‌ريێن دلته‌زين ب درندەترین و داخبارترین كۆمكوژى نه‌ بسەرێ‌ مللەتێ‌ مە یێ‌ ئێزدی دا هاتی، بێشك ژی ئەڤ برینا كور چ جارا د دل و هزرا مەدا دەرناكەڤت دێ‌ هەر مینت برینەكا كور،چنكو چ جارا ل پێش چاڤێن مە ناچت ئەڤه‌ تاوانه‌ دژی مرۆڤایەتیێ‌.
هه‌ر بڤێ هه‌لكه‌فتێ داخوازێ ژ کۆمەلگەها ناڤدەولەتی دکەین ب زوترین وەخت ڕەوشا خەلکێ شنگالێ ل بەر جاڤ بگرن وداخوازێ ژ هەردوو حکومەتێن عێراقێ و کوردستانێ دکەین ب هەموو رێکا هەول بدەن ئەوێن ماینە دناڤ دەستێن تیرۆرستان دە ژی رزگاربکەن و بگەهنە کەسوکارێن وان،هیڤیا ژیانەکا ب سەربلندی بۆ خەلکێ کۆچۆ ب گشتی دکەین وسەرەخۆشیێ ل کەسوکارێن قوربانیا دکەین وهەڤپشکیێ ددەرد وخەمێن دایک و خوشکێن خۆراگر دکەین هەر سەر بەرز و سەربلند بن هەموو ئافرەتێن شنگالێ و کوردستانێ.
ل ڤێدەر دڤێت ئەم هەردەم پەیڤا جەنابێ سەرۆك بارزانی لبیرا خۆ بینن و نوژەن بکەین کو کەرمکری و گۆتی (كەچا ئێزدی هيمايێ شەرف و کەرامەتا گەلێ كوردە) و داخویاکری کو هەر کەسێ دەست د کوشتن و گرتنا ئێزدیان دا هەبت دێ برێکێن یاسایی هێتە سزادان،نەمری بۆ قوربانیێن فەرمانا شنگالێ وسەربلندی بۆ ئافرەتا شنگالی ومرن و ڕورەشی بۆ دوژمنێ مرۆڤایەتیێ تیرۆرستێن بێ وژدان.
ده‌سته‌يا بلندا بنگه‌هێ لالش/دهۆك
13ى ته‌باخا 2023

تُتاح هذه الصورة أيضا في: کوردی

مقالات ذات صله

الرد

پۆستی ئەلکترۆنیکەت بڵاو ناکرێتەوە . خانە پێویستەکان دەستنیشانکراون بە *

Copyright © 2021 by Lalish Media Network .   Developed by Ayman qaidi