ئاب 31, 2025

Lalish Media Network

صحيفة إلكترونية يومية تصدر باشراف الهيئة العليا لمركز لالش الثقافي والاجتماعي في دهوك - كوردستان العراق

رۆژناما دەنگێ‌ لالش ل چاردە سالێن بۆری بوویە پرەك دناڤبەرا ئێزدیان و حكومەتا هەرێما كوردستانێ‌ دا

رۆژناما دەنگێ‌ لالش ل چاردە سالێن بۆری بوویە پرەك دناڤبەرا ئێزدیان و حكومەتا هەرێما كوردستانێ‌ دا
تۆرا لالش یا راگەهاندنێ‌/بەختیار قادر
رۆژناما دەنگی لالش ل چاردەمین سالڤەگەرا خۆ كو ل(12/10/2004)ێ‌ ژلایێ‌ دەستەیا بلندا بنگەهێ‌ لالش یێ‌ رەوشەنبیری و كۆمەلایەتی ل دهۆكێ‌ هاتیە وەشاندن،ئێكەم رۆژنامە بوو پشتی روخاندنا رژێما بەعس یا ژناڤچۆیی دەركەفتیە دناڤا جڤاكێ‌ ئێزدیان دا و دەنگ و ئێش و ئازار ب تایبەت كۆمكوژیا شنگالێ‌ ل سالا(2014)ێ‌ گەهاندیە دونیایێ‌،هەروەسا بوویە پرەك دناڤبەرا جڤاكێ‌ ئێزدی وبنگەهێ‌ لالش و ئێزدیان ودام ودەزگەهێن حكومەتا هەرێما كوردستانێ‌ دا.
(هەڤال عەلۆ)وەك خووندەڤانەكی رۆژناما دەنگێ‌ لالش دیاركر،ب شێوەكی گشتی بنگەهێ‌ لالش یێ‌ رەوشەنبیری و كۆمەلایەتی كاریە خزمەتەكا باش پێشكێشی جڤاكێ‌ ئێزدی ب تایبەتی و جڤاكێ‌ كوردی ب گشتی بكت،ئەو رۆژناما و گۆڤارا ل ڤی بنگەهی دئێتە وەشاندن هەم دەرفەتەكا باشە بۆ گەنجێن ئێزدیان تێدا چیرۆك و گۆتار و نڤیسینێن خۆ یێن رەوشەنبیری و ئایینی و كەلتۆری و ئەدەبی تێدا بەلاڤ بكن و هەم خووندەڤانێ‌ ئێزدی ژی مفایەكی باش ژی وەرگرتیە،گۆڤار و رۆژناما لالش ژێدەرەكی باشن بۆ ڤەكۆلینێن ئەدەبێ‌ ئێزدیان ب تایبەتی و ئەدەبێ‌ كوردی ب گشتی،هیڤیخوازین ئەو رۆژنامە و گۆڤارێن ل تایی و نڤیسینگەهێن بنگەهێ‌ لالش ل دەڤەرێن ئێزدیان دئێنە وەشاندن بێنە دەرێخستن ڤە و بنگەهێ‌ لالش كانیەكا پری زانیاری یە دەرباری كەلتۆر و ئەدەبێ‌ ئایینێ‌ ئێزدیان ئەڤەژی كارەكی باشە بۆ نڤیسەر و ڤەكۆلەرێن ئێزدی و یێن بیانی.
دەربارەی سالڤەگەرا دەنگێ‌ لالش مامۆستا(رێزان كچل)گۆت:رۆژناما دەنگێ‌ لالش ئێكەم رۆژنامە بوویە دناڤا جڤاكا ئێزدیان دا هاتیە دەرێخستن وئەڤ رۆژنامە بوویە گەنجینەك ژبۆ سەدان نڤیسەرێن ئێزدیان،ب هەلكەفتا ئێكەم رۆژا دامەزراندنێ‌ پیرۆزباهیێ‌ ل تەڤایا خووندەڤان ونڤیسەرێن رۆژنامێ‌ ودەستەكا نڤیسینێ‌ دكەم و ب وێ‌ هیڤیێ‌ دسالا خۆ یا نوودا پێنگاڤێت باشتر بهاڤێژن بۆ خزمەتكرنا بزاڤا رۆژنامەگەری وتایبەت پرسێن گرێدایی جڤاكا ئێزدیان ڤە و دخوازم پتر گرنگیێ‌ بدەن بابەتێن جڤاكی و ببت پرەك دناڤبەرا خەلكێ‌ وجیێن شۆلەژێ‌ دا بۆ گەهاندنا داخوازیێن خەلكێ‌،هەروەسا ئێدی گرنگە بەرپەرێن رۆژنامێ‌ هەموو ب رێنڤیسا كوردی بن و هەبوونا وێ‌ ل پەرتۆكخانە وپەرگەهێن ناڤا باژاران دا زۆر یا گرنگە هەبت ژبۆ هندێ‌ خووندەڤانێن وێ‌ زێدەتر بن وجڤاكێ‌ دەوروبەرژی بخوونن،ب دیتنا من گهۆرین بكەڤنە دەستەكا رۆژنامێ‌ دا باشترە ژبەركو هەڤالێن دەستەكا نهۆ ماندووبوونە وخزمەتەك درێژكرنە وئێدی ئەڤ رۆژنامە پێتڤی گهۆرینێیە و دڤێت دەستەكا وێ‌ هەولێن گهۆرینا بكت یان ژی گهۆرینا بیاڤێ‌ كارێ‌ رۆژنامێ‌ ،پێشنیار دكەم ل رادیۆیا دهۆك دا پتر گرنگی پێ‌ بێتە دان كو بابەتێن وێ‌ بۆ گوهدارا ژی بێنە خووندن.
رۆژنامەڤانا كچ(رسالە شەركانی)دبێژت:ب هەلكەفتا بیرەوەریا دەرێخستنا رۆژناما دەنگێ‌ لالش ل دەستپێكێ‌ پیرۆزباهیێ‌ ل ستافێ‌ وێ‌ دكەم،سەبارەی رۆلێ‌ رۆژنامێ‌ هەتا نهۆ دەنگ و وێنێ‌ جڤاكێ‌ ئێزدیان بوویە و گرنگی دایە هەموو بابەتێن رەوشەنبیری و جڤاكی و ئابووری و ئایینی و چەند بوارێن دیتر،بەلێ‌ ب دیتنا من ئەڤ رۆژنامە پێتڤیە پتر بەرفرەه بت ل ناڤ عێراقێ‌ و كوردستانێ‌ داكو جڤاكێ‌ كوردستانێ‌ پتر ئێزدیان ناس بكت،زێدەباری گرنگیدان ب بابەتێن گرنك وەك دۆسا ئێزدیا و كچ و ژنێن رزگاربووی و بەلاڤكرنا ڤەكۆلین و خووندنێن زانستی ل رۆژنامێ‌ دا ب تایبەت لڤی ماوێ‌ گرنگ دا.
رۆژنامەڤان(قەیسەر حەسەن)گۆت:گۆمان تێدا نینە هەر ژ دەستپێكا دامەزراندنا رۆژناما دەنگێ‌ لالش ژبلی پشكا زمانێ‌ ئەرەبی خزمەتەكا مەزن یا زمانێ‌ كوردی كریە و د تەمەنێ‌ خۆ دا وهەتا نهۆ ئەو ڤالاهیا سەرێ‌ سالان بوو ل دەڤەرێن ئێزدیان ژ دەرڤەیی ئیدارا هەرێما كوردستانێ‌ تژی بكت و ب سەدەهان خووندەڤان ل خۆ كۆمكرینە،دبینم ئەگەر رۆژنامە بڤی شێوەی یا بەردەوام بت دێ‌ پتر زمانێ‌ كوردی یێ‌ دەیكێ‌ ل هەموو دەڤەرێن ئێزدیان گەش بكت وهیڤیدارن گرنگیەكا باش بدەنە رێورەسم و جەژن و هەلكەفتێن ئێزدیان، هیڤیا پتر بەردەوامیێ‌ بۆ تەمەنێ‌ رۆژنامێ‌ دخوازم،ژبەركو ئێكەم رۆژنامە بوو پشتی روخاندنا رژێما بەعس یا ژناڤچۆیی دەركەفتیە دناڤا جڤاكێ‌ ئێزدیان دا و دەنگێ‌ ئێزدیان گەهاندیە دونیایێ‌ و ئێش و ئازارێن ئێزدیان ژی و تایبەت كارەسات و كۆمكوژیا شنگال یا سالا(2014)ێ‌،ل داویێ‌ سالڤەگەرا رۆژنامێ‌ ل هەموو ستاف وكارمەندێن وێ‌ پیرۆز دكەم.
ژئالیێ‌ خۆڤە رەوشەنبیر(شوكری رەشید)خویاكر،دامەزراندنا بنگەهێ‌ لالش ل پارێزگەها دهۆكێ‌ ل(12/5/1993)ێ‌ دەستكەفتەكی دیرۆكی بوو ژبۆ ئێزدیان بۆ ئێكەم جار ب شێوەیەكی فەرمی بنگەهەكی تایبەت ب ئایین وكەلتۆر وجڤاكێ‌ ئێزدیان ڤەبت،ئەڤ بنگەهە رۆژ بۆ رۆژێ‌ ل ژێر پشتەڤانیا حكومەتا هەرێما كوردستانێ‌ پێشدا دچت ژبۆ ناساندنا ئایین و جڤاكێ‌ ئێزدیان ژبۆ خەلكێ‌ كوردستانێ‌ وجیهانا ئەرەبی وئەورۆپی ب رێیا چەندین چالاكیێن جۆرا و جۆر مینا سمینار وكۆنفراس وگۆڤار و تۆرا جڤاكی،ل سالڤەگەرا رۆژناما دەنگێ‌ لالش ئەڤە پتر ژ چاردە سالایە كەفتیە دخزمەتا جڤاك وچاندا ئێزدیان دا دڤی ماوێ‌ درێژدا كاری یە خزمەتەكا باش وبەرچاڤ پێشكێشی هەموو تەخ و چینێن كۆمەلگەها ئێزدیان بكت،زێدەباری بەلاڤكرنا چەندین بابەتێن دیرۆكی وئایینی ورەوشەنبیری،دیسان چەندین نڤیسەرێن ناڤدار وبەرناس بابەتێن پر ب مفا و گرنگ دناڤ بەرپەرێن وێ‌ دا بەلاڤ كرینە،هەروەسا رۆژنامێ‌ كاریە دماوێ‌ ڤان سالان دا ببتە پرەكا باش دناڤبەرا جڤاكێ‌ ئێزدی وبنگەهێ‌ لالش و ئێزدیان ودام ودەزگەهێن حكومەتا هەرێما كوردستانێ‌ دا،ئاماژەكر چەندین نڤیسەر وهۆزانڤانێن گەنج ژ هەردوو رەگەزان پشتەڤانی ل وان هاتیە كرن ونڤیسینێن وان دبەرپەرێن رۆژنامێ‌ دا دئێنە بەلاڤكرن،ب هەلكەفتا سالڤەگەرا دەنگێ‌ لالش ئەم پیرۆزباهیێ‌ ل ستافێ‌ وێ‌ دكن وهیڤیدارین پتر خۆ بەردەنە ناڤ جڤاك ومیژوو ورێورەسمین ئایینی دا و گرنگیێ‌ ب نڤیسەرێن گەنج بدەن.
نڤیسكار(فەهمی بابێ‌ رۆژانێ‌) دیاركر،دەنگێ‌ لالش رۆژناما دەستەكا بلندا بنگەهێ‌ لالش دەردئێخت ودئێتە بەلاڤكرن لسەر تایی و نڤیسینگەهێ‌ بنگەهی ل دەڤەرێن ئێزدیان،هەلبەت ل دام ودەزگەهێن میری دئێتە دیتن و ئەو دەنگێ‌ زەلالێ‌ رەوشەنبیریا دیرۆكی یا ئێزدیانە كو كەڤنترین كلتۆر و شارستانیەتا مرۆڤاتیێ‌ یە بەری هەزارێن سالان بەری زایینی ل میزوپۆتامیا و رۆژهەلاتا ناڤین ئەو داب ونەریت و رەشەنبیریە پەیدابوویە وهەتا نهۆ هاتیە پاراستن دسینگێ‌ زانایێن ئێزدیان و دناڤ لاپەرێن پەرتۆكێن دیرۆكناسان ئەوێن خودان وژدان وبێ‌ لایەن دنڤیسن و نهۆ ب زەلالی دیار دبت پشتی ئازادیا كوردستانێ‌،بەلێ‌ مخابن وەك پێتڤی نائێتە بەلاڤكرن ل ناڤ خەلكێ‌ خەمخۆرێ‌ رەوشەنبیریا كوردی یا رەسەن نەخاسمە ل تایێن بنگەهی دەرڤەی باژاران هەروەكی بۆ ئەنداما بتنێ‌ یە و ژبلی بوویە ریكلام بۆ هندەك كەس ولایەنا و زۆر بابەتێن لاوەكی دئێنە بەلاڤكرن بێی كو كوراتی وبەهایێ‌ گۆتارێ‌ بێتە راچاڤكرن وئەڤە ژی ژ بەهایێ‌ رۆژنامێ‌ كێم دكت و ب تایبەت پشكا كوردی،هەروەسا پشكا ئەرەبی ژبلی دووبارەكرنا دەنگوباسێن میدیا ناڤخۆیی ژبۆ پكرنا لاپەران،سەرەرای دەستخۆشیێ‌ ل هەڤالێن بەرپرسێن پشكان ونڤیسەران هیڤیدارین پتر بابەتێن گرێدایی ئێزدیاتیێ‌ وكلتۆرێ‌ رەسەنێ‌ كوردەواریێ‌ بێنە نڤیسین و تایی و نڤیسینگەهێن لالش پتر گرنگیێ‌ بدەنە بەلاڤكرنا وێ‌ لسەر هەموو دام ودەزگەهێن میری وكەسانێن خەمخۆرێ‌ دووڤچۆنا رە و تا رەوشەنبیریا گشتی داكو بگەهتە زۆرترین كەسان و پشكداری تێدا بێتەكرن ژلایێ‌ نڤیسەرێن ناڤدار دوارێ‌ رەوشەنبیریا ئێزدیاتی وكوردەواریێ‌ دا ونەمینت لسەر مێزان ل بنگەه و نڤیسینگەهان.
نڤیسكار و رۆژنامەڤانێن ئێزدی دخوازن ل ماوێ‌ داهاتی دا رۆژنامە پتر بەرفرەه بت ل ناڤ عێراقێ‌ و كوردستانێ‌،داكو جڤاكێ‌ كوردستانێ‌ پتر ئێزدیان ناس بكت و پتر گرنگیێ‌ ب بابەتێن گرێدایی ئێزدیاتیێ‌ وكلتۆرێ‌ رەسەنێ‌ كوردەواریێ‌ بدەت و هەبوونا وێ‌ ل پەرتۆكخانە وپەرگەهێن ناڤا باژاران دا هەبت ژبۆ خووندەڤانێن وێ‌ زێدەتر بن وجڤاكێ‌ دەوروبەر ژی بخوونن.

تُتاح هذه الصورة أيضا في: کوردی

مقالات ذات صله

الرد

پۆستی ئەلکترۆنیکەت بڵاو ناکرێتەوە . خانە پێویستەکان دەستنیشانکراون بە *

Copyright © 2021 by Lalish Media Network .   Developed by Ayman qaidi