تۆرا لالش
چلێ ھاڤینێ ژ (۱۱)ی خزیرانێ دەستپێدكەت و ل (۲۰)ی تیرمەهێ ب هژمارا رۆژهەلاتی ب داويى تێت ئانكو (٢٤) خزیرانێ دەست پێ دکەت و هەتا(۲)تەباخێ ب هژمارا زاینی، چلە (٤٠ )رۆژن دبێژنێ چلێ ھاڤينێ ئەڤ چلە ب دەمی ڤه د گرێداینە د ڤان رۆژێن گەرم و درێژ دا زەلامێن ئۆلی و هەر ئێزدییەکی بڤێت چل رۆژی ژ بۆ خودێ دگرن، د باوەريا مە ئێزديان دا چلێ ھاڤينێ و چلێ زڤستانێ گرنگيەكا مەزن ھەيە ھەر چەندە ل سەر ھەموو ئێزدیان نە فەرزن بەلكو ل سەر جڤاتا روحانی و شكەستیێن مالا شێخادی و كەسێن بینە چلەگر رۆژیێن چلێ ھاڤینێ و زڤستانێ فەرزن تەنھا ل سەر ڤان.
ژ لایەكی دیڤە ھەر ئێزدیەكی ڤان رۆژیان بگەرت دروستە و خێرەكا مەزن د ھێتە حسابێ بو ھەر مرۆڤەكى ئێزدى رۆژيێن چلێ زڤستانێ و چلێ ھاڤينێ بو دەمێ (٢٠) سالا ب رۆژى بت د بێژنێ (چلەگر) ئەڤە ژی د باوەریا مەدا خەلاتەكی رەب ئەلعالمین وەردگرت و دبتە چلەگر ئەو كەسێن چل رۆژێن چلێ ھاڤينێ و زڤستانێ ب رۆژى دبن بۆ دەمێ بیست سالا و خۆ خەولە دكەن ژ بۆ پەروەرستەبوونێ و دوعا كرنێ و ژیێ خو یێ مای ژی دبنە شكەستیەكا مالا شیخادی و خێر خوازەك ل ھەموو ھێڤاران ژ خودێ تەعالا د خوازن دەریەكی خێرێ ل ئێزدیا ڤەكەت و سوڕ و كەرەمێت باتنی ل ئێزدیا ڤەگەرینیت بۆ خاترا ناڤێ خۆ و عەزیز یا خۆ و خاترا وان ئێ سەرێ خۆ ل رێیا ناڤێ تاووسی مەلەك دایی و بۆ خاترا بەلنگازا و شكەستیا و خودان ئیمانا و خلمەتكارا و سێویا و خاترا وان ئیختیارێت سەرێ خۆ داین بۆ رێیا ئێزدیاتیێ، لەوما ژ ھەر ئێزدیەكی د ھێتە خواستن رێزەكا تایبەت و پیرۆز ل ھەر چلەگرەكی بگرت وەكی ل ڤان سەبەقا دیار:
چلەگرا نەئیشینە
ئەو ژی ب ئاخرەتێ ب ھیڤینە
ھاڤینێ و زڤستانێ ب رۆژینە
و ب وەكاز و تزبینە
چەند جارا ب عەبادەتن و جندیێت سلتینە
*
ئەو جندیێت سڵتین ب ھیڤینە ب مەھدەرن
ل رێیا خودێ و شیخادی ب جەھوەرن
ئەو ژی ب شێشمس مەفەرن.
ل ھەر چل رۆژ و شەڤێن رۆژيا چلەگر خۆ ژ خوشى و لەفزەتێن دنێ دوور د كەن د باوەريا مە ئێزديان دا ھەر كەسێ ڤان رۆژيان ب دروستاھى بڤى رەنگى بگرت روحا وى د بتە بەھشتى ب بەھشتا بەرين دێ شادبت، ل نيڤا چلەيى ژى جڤاتا روحانى ب سەرپه‌رشتيا بابێ شێخ ل بيستى چلەيى دچنە لالش و چەند رێ و رەسمێن ديتر ئەنجامدەن.
ھەر بۆ زانین رێ و رەسمێن چلەیێ ھاڤینێ و زڤستانێ سێ جارا دھێنە گێران ل دەستپێكێ و نیڤا چلەی و دوماھیكێ ل ھێڤارا عیدێ ئەوژی ھەموو ب رێ و رەسم ل پەرستگەھا لالش د ھێنە برێڤەبرن.
رێ و رەسمێن دەسپێكرنا رۆژيا ئێكێ ل پەرستگەھا لالش د ھێنە كرن ل ھێڤارا رۆژيێن چلێ ھاڤينێ جڤاتا روحانى و ھەر چلەگرەكى ل دەڤەرێ و نێزيكى پرستگەھا لالش ژ شكەستى و زانايێن ئێزديان ئەڤێن ناڤێ چلەگريێ ل سەر ل رێ و رەسمێن دەسپێكا گرتنا رۆژێن چلێ ھاڤينێ حازردبن دگەل بابا شێخ و وجوقەتا وى پشتى ھێڤارى و شيڤ خارنێ ل لالشا نورانى ل چلەخانێ كوم دبن و دوعايەكا پێكڤە د كەن دناڤا چلەخانێ وھندەك ئاخ ژ چلەخانێ دگەل خۆ ھلدگرن بخو و ھندەكێ بۆ وان ھەڤال و شكەستى يێن حازرنەبى و د ڤێن ب روژى بن ھندەك ئاخێ بو وان د گەل خو د بەن مەبەست ھەر كەسەكی چلەگر دڤێت ھندەك ئاخا چلەخانێ دگەل دا بت، رۆژا ئێكێ ل لالش د مينن و ھێڤارى ھەر كەسەكى بمينت دروستە و كەسێ بڤێت دێ ھێتە مال ژى فتاربت دێ چل رۆژێن ديتر ل مال تەمام كەن، پشتی چل رۆژ تەمام دبت رۆژا چلێ دبتە چەژن ل ھێڤارا دوماھیكا چلەی ھندەك رێ و رەسمێن ديتر د ھێنە گێران و سبەیكێ دبتە چەژن چلێ ھاڤینێ .
ھەر وەکی ڤان سەبەقا ژ ئەدەبێ دینێ ئێزدیان دبێژت:
مەلەک فەخرەدین دەنگ ھلتینە
ھنجیێ خاترا من تێ ببینە
دلێ چللە گرە نا ئیشینە
چللە گر ب رۆژينە
فەرز ێن خۆ ب جی تینە
ئەون جندیێن سلتینە
بشەڤ رۆژ ب رۆژینە
ئەوان فتار نینە
ئەو جندیێن سلتان ئێزینە
ژێدەر:
– پەرتۆكێن پەروەردا ئێزدیاتیێ.
– مامۆستایێ ئایينی پیر خەلات ئەلياس
– ژ نڤیسین ماموستا شەرۆ
تُتاح هذه الصورة أيضا في: کوردی
