نائێتە ژبیركرن ئەو فەرمانا مەزن كو دوژمنێن مرۆڤایەتیێ د ِڕۆژەكا ڕەش وەكو ئیڕۆ بەری یازدە ساڵان ل ٢٠١٤/٨/٣ ب سەرێ خەلكێ مە یێ بێ گونەهـ و ئاشتیخواز ل دەڤەرا شنگالێ ئینایی و ب تایبەت جڤاكێ ئێزدی و ئەڤ چەندە ژی دئێتە هەژمارتن ئێك ژ تاوانێن هەرە مەزن و هۆڤانە ل دژی خەلكێ مە هاتیە ئەنجامدان.
دڤێ هێرشا بێ وژدان و دوور ژ هەموو پرەنسیپێن مرۆڤایەتیێ دە ب هەزاران زارۆك و ژن و پیروكال ژ خەلكێ مە یێ سڤیل ب ڕەنگەكی دڕندانە قركرن و بن ئاخ كرن و بوونە ئارمانجا هزر وبیرێن نەژادپەرس و پاشڤەرۆیی یێن چەكدارێن ڕێكخراوا تیرۆرستی یا داعش، هەروەسا ب هەزاران كچ و ژنێن ئێزدی ژلایێ چەكدارێن وێ رێكخراوا تیرۆرستی ڤە هاتنە ڕەڤاندن، و ئارمانجا تیرۆرستێن داعشێ قركرن و نەمانا ئێزدیان بوو.
٣-٨ ئێكە ژ پڕ خەمترین ڕۆژێن خەمناك كو د لاپەڕێن تاریێن مێژوویا مرۆڤایەتییێ دا هاتییە نڤیسین،ئارمانجا داعش ژ وێ شاڵاوێ، ژ ناڤبرنا پێكڤەژیان و فرە ڕەنگی و تایبەتمەندییێن جوانێن هەرێما كوردستانێ بوو؛ بەلێ ب ئازایەتییا پێشمەرگەی و ب ڕابەرایەتییا سەرۆك بارزانی، داعش شكەست و تێكشكا و گەلێ كوردستانێ ب هەموو پێكهاتاڤە، دشەڕیدا سەركەفتن.
بێگۆمان ئەنجامدانا ئەڤێ هێرشا هۆڤانە هەر مینت خالەكا ڕەش بناڤ چاڤێن ئەوان بێ وژدانا و لایەنگر و پشتەڤانێن وان ڤە و دیرۆك دێ وان رسوا و شەرمەزاركەت.
یازدە سال دەربازبوون و خەلكێ مە یێ شنگال دڕەوشەكا گەلەكا خراب و نەخۆش دا ژیانا خۆ ل سنوورێ پارێزگەها دهۆكێ لژێر خیڤەتان دە دەربازدكەن و هەموو دەما چاڤەڕێی ڤەگەریانەكا سەرفەراز و شایستە بووینە بۆ سەر جهـ و وارێن خۆ، لێ ب مخابنی ڤە هەتا نها حكومەتا عێراقا فیدرال و جڤاكا نێڤدەوڵەتی ب ئەرك و ڕۆلێ خۆ یێ پێدڤی ڕانەبووینە و ب چ ڕەنگیی هاریكاری وپشتەڤانیا خەلكێ مە یێ ئاوارە نەكرینە و خەم ژ ڕەوشا وان نەخوارینە، ئەڤە و سەرەرایی ئەوان هەموو داخوازیی و رێككەفتنێن حكومەتا هەرێما كوردستانێ دگەل وان مۆركرین پێخەمەت ڤەگەراندنەكا ب سەربلندی.
هەر بڤێ هەلكەفتێ فرە ئەم ژدل سوپاسیا خەلكێ كوردستانێ ب گشتی وخەڵكێ دەڤەرا بەهدینان ب تایبەتی بكەین،كو ل ئەوێ ڕەوشا دژوار دا ل بەر بارێ خەلكێ مە رابووین و هاریكاریا وان كرین ب هەموو رەنگەكی، هەروەسا فەرە سوپاسیا حكومەتا كوردستانێ بكەین كو دڤان دەهـ سالان دە هیچ درێغی دەرهەق خەلكێ مە دە نەكریە و ب هەموو ڕەنگا هاریكاریێن پێدڤی بۆ وان پێشكێش كرینە.
ل داویێ ئەم ب توندی ئەوێ هێرشا هۆڤانە یا كو ژلایێ رێكخراوا تیرۆرستی یا داعش یا ل ڕۆژا ٣ی تەباخا سالا ٢٠١٤ ل دێ خەلكێ مە یێ بێ گونەهـ هاتیە ئەنجامدان، رسوا وشەرمەزار دكەین و داخواز دكەین ڕەڤاندیێن تا نوكە دەستێ تیرۆرستان دا ماین بێنە ڕزگاركرن و ڕەوشا شنگالێ ئارامی و سەقامگیریێ بخۆڤەببینت، داكو خەڵكێ مە ڤەگەڕنە سەر جهـ و وارێن خۆ ڤە، ئەم سۆز و پەیمانا ژبۆ خەلكێ خۆ نوو دكەینە ڤە كو ئەم دێ دبەردەوام بین ژبۆ خزمەتكرنا ئەوان ل گۆڕ شیانێن خۆ.
دەستەیا بڵندا بنگەهێ لالش یێ ڕِەوشەنبیری و كۆمەڵایەتی/ دهۆك
2/8/2025
تُتاح هذه الصورة أيضا في: کوردی
