چ ل شنگال دقەومت ؟
بەختیار قادر
ژ ئەنجامێ هێرشا رێكخراوا تیرۆرستیا داعش بۆ سەر شنگال ل رۆژا(3/8/2014)ێ بتری(300)هەزار ئێزدی دەربەدەر و ئاوارەبوون و ئەڤە پێنج سالە نێزیكی(80%) هێش ئاوارەنە و ل كەمپان و خیڤەت و كاڤلان دا ل سنوورێ پارێزگەها دهۆكێ دژین و ب تنێ رێژەیەكا كێم ڤەگەریاینە سەر جی و وارێن خۆ ڤە،ئاوارە دپرسن پشتی شنگال ژ دەستێن داعش هاتیە رزگاركرن گەلۆ هەتا نهۆ چ ل دەڤەرێ دقەومە و كی بەرپرسە ل مانا وان دبن خیڤەتان دا و بۆچی هێش رەوشا دەڤەرێ ئالۆزیێ بخۆڤە دبینت و رێگری ل هەمبەر ڤەگەریانا وان دئێتە كرن،ئاوارێن ئێزدی ل چەندین كەمپان و دەڤەرێن جوادیێن پارێزگەها دهۆكێ ل بن خیڤەت و كاڤلان دا ژیانا خۆ درەوشەكا پەریشان و سەخت و دژوار دا دەرباز دكن و هەتا ئیرۆ رۆژ هایداری رەوشا دەڤەرا خۆ نینن كو چ دقەومت و بۆچی دبنە قوربانیێن هەڤركیێن سیاسی و چارەنڤیسێ وان یێ دیار نینە،ژبەر رەوشا ئالۆز یا شنگال تێدا دەرباز دبت ب هەزاران ئاوارێن ئێزدی كۆچبەری دەرڤەی وەلاتی بووینە و رێژەیەكا ئاواران دەست ب كرینا پارچێن ئەردی و خانیان ل دەڤەرێن دی یێن ئێزدیان كرینە،ژلایەكێ دی ڤە چەند لایەنێن سیاسی و هێزێن چەكدار هەنە وعەرەبێن دەوروبەرێن شنگال ڤەگەریاینە ڤە و هێش رەوش ل دەڤەرێ یا ئالۆزە و ئارامی و تەناهی و سەقامگێریی بخۆڤە نەدیتیە،هەبوونا ڤان لایەن و هێزان بوویە رێگر ل هەمبەر ڤەگەریانا ئاواران بۆ سەر مال و حالێ خۆ ڤە و دووبارە ئاڤەدانیێ،ئاوارێن شنگال چاڤەرێنە پێشمەرگە‌یێ كوردستانێ بزڤرتە شنگال ڤە،چنكو راستی ژی بێی هەبوونا پێشمەرگەی ل شنگال زۆر یا ب زەحمەتە خەلك بكارن ڤەگەرن دتەناهیێ دا بن بتنێ پێشمەرگە دكارت تەناهیێ و سەقامگێریێ بۆ خەلكێ شنگال دابین بكت،پرسا شنگال نهۆ ژ پرسەكا ناڤخۆیی بوویە پرسەكا نێڤ دەولەتی و دەستێن دەرەكی كەفتینە تێدا وەك هێرشێن توركیا بۆ سەر هێزێن پەكەكێ ل شنگال و ڤێ چەندێ ژی رەوش ئالۆزتر لێكریە كو ئاوارە ڤەگەرنە ڤە،باشترین چارەسەری بۆ رەوشا نهۆ یا شنگال هێزێن نەشەرعی دەڤەرێ چۆل بكن و پێتڤیە حكوومەتا هەرێما كوردستانێ و حكوومەتا عێراقێ هەر چی زوویە لژنەیەكا هەڤبەش پێك بینن بۆ پاراستنا ئێمناهیا وی باژێری و خەلكێ دەڤەرێ بێتە قەرەبووكرن و ئاڤەدانی دەست پێ بكت،چنكو ئەگەر ئێمناهی ب تایبەتی بەرقەرار ببت و هەموو سەكتەرێن ژیانێ بۆ ئاواران هاتنە دابینكرن بێگۆمان پرۆسا ڤەگەریانا وان ژ كەمپان دێ دەست پێ كت.
تُتاح هذه الصورة أيضا في: کوردی
