خۆكوشتن
عزەت برۆ 
ب درێژاهیا دیرۆكێ ل هەموو جڤاكان دا هندەك كەس هەبووینە خۆ دكوشتن ، واتا خۆكوشتن دیاردەیەكا كەڤنە ژ نوو سەرهلنەدایە لێ رۆژ بۆ رۆژێ بەرەف زێدەبوونێ دچت،و رێژەیا خۆكوشتنێ ژ جڤاكەكی بۆ جڤاكەكی دی جوداهی هەیە،ئەڤ چەندە ژی ڤەدگەرت ژبۆ زێدەبوونا ژمارا خەلكی،ژلایەكێ دی ڤە ئالۆزبوونا ژیانێ و زێدەبوونا ئاستەنگ و بەربەستا بەرامبەر تێركرنا پێتڤیێت ژیانێ ،ژبەر ڤێ یەكێ دیاردا خۆكوشتنێ رەهێن خۆ دناڤ كوراتیا مێژوویا مرۆڤاتیێ دا هەبوویە،خۆكوشتن بزاڤ و رەڤینەكە ژ ئاریشەكا بێ چارەسەری یان ژی پشتگوه هاڤێتن یان رەوشەكا نەئارامە دەمێ ئەو كەس نكارت وێ رەوشێ بگهۆرت د وی دەمی دا ئەو كەس هەولا خۆ كوشتنێ ددەت ، هەروەسا خۆكوشتن كریارەكە ب دەست و ب مەرەم دئێتە ئەنجام دان ژلایێ كەسەكی كو داویێ ب ژیانا خۆ دئینت ئەگەر ژی ئەو كەس بێ ئۆمێد دبت د ژیانێ دا یان گەلەك جارا نەخۆشیەكا دەروونی وەك خەمۆكی و بێزاری یان ئالودەبوون ب مادێ بێ هۆشكەر دبتە ئەگەرێ خۆكوشتنێ،هندەك ژ نیشانێن ئەوان كەسێن گۆمان لسەرە كو هەولا خۆكوشتنا خۆ بدەت ئەو كەسێ گەلەك جارا بەحسێ خۆكوشتنێ دكن ل نك هەڤال و كەسێن خۆ یێن نێزیك،هەروەسا ئەوێن هەردەم دبێژن مرن خۆشترە ژ ڤێ ژیانێ ، دیسان هەبوونا خەمۆكیەكا دژوار و ئالۆزی و رەشبینی د ژیانێ دا و گهۆرینا رەفتاران هەروەسا خۆ دووركرن ژ تێكەلیا خەلكێ،چاوا هاریكاریكرنا وی كەسی بكن ئەوێ كو هەولا خۆ كوشتنێ ددەت،پێتڤیە ئەو ئاخفتنێ ئەو كەسە دبێژت لسەر خۆكوشتنێ دڤێت ئەم ب راستی وەرگرن و پشتگوه نەهاڤێژن دیسان بزوترین دەم وی كەسی ببنە نك نۆژدارەكێ دەروونی هەروەسا دڤێت چاڤدێریەكا بەردەم لسەر هەبت ژبۆ خوارنا دەرمانێت خۆ و هەروەسا ب تنێ نەهێلن و ژینگەهەكا ئارام بۆ پەیدا بكن،گازندا نەكن ژ وی كەسێ هەولا خۆ كوشتنێ دایی چنكو هێش دەروونێ وی یێ تێكچۆیە داكو بتر كاریگەری ل مێشكێ وی نەیئَتە كرن.
تُتاح هذه الصورة أيضا في: کوردی
