دەروونێ ساخلەم ژیانەكا ئارام و گەشبینە
چنار شەمۆ قاسم 
ئێك ژ پێكهاتێن بنەرەتی یێن ساخلەمیا مرۆڤی ساخلەمیا دەروونی یە ، ئەو كەسێ دەروونێ وی یێ ساخلەم كەسەكی هەڤسەنگە دژیانێ دا و گرنگیدان ب گەشەكرنا دەروونیا مرۆڤی دهەموو قۆناغێن ژیانێ دا و وەرگرتنا زانیاریان دڤی بواری دا پێتڤیەكا بەردەوامە ب تایبەتی دژیانا ئیرۆ دا،ژبەركو جیهانا مادی و تەكنەلۆژی گەلەك كارتێكرن دروستكرینە و دەروونێ مرۆڤی پێ هەڤسەنگ دكت،هەر كەسەك پێتڤی ب تێگەهشتنا دەروونێ خۆ هەیە بەری تێگەهشتنا هەر تشتەكی دی د ژیانێ دا،ژبەر ڤێ چەندێ ل زۆربەیا وەلاتێن پێشكەفتی دجیهانێ دا ئیرۆ بابەتێ دەروونزانی و ساخلەمیا دەروونی دخوونن دقۆناغێن خووندنێ یێن جودا جودا ب ئاوایەكی كو ئەو زانیاریێن دئێنە خووندن لدوڤ قۆناغا تەمەنێ وان و بەرسڤدانا وان پرسیارا بن یێن بۆ هەر تاكە كەسەكی دروست بن،زانایێن دەروونی ساخلەمیا دەروونی بڤی شێوەی پێناسە دكن كو حالەتەكی خۆ گونجاندنێ یە دناڤبەرا هەموو لایەنێن مرۆڤی و ژیانا وی ب شێوەیەكی ژیرانە (عقلانی) وەك لایەنێ لەشی ، دەروونی ، جڤاكی و شیانێن خۆ گونجاندنێ دگەل خۆشی و نەخۆشیا و چارەسەركرنا ئاریشێن خۆ ب رێیێن گونجای،تاكو ببن مرۆڤەكی بەرهەمدار و رۆلێ خۆ دناڤا جڤاكی دا ببینن.،ژ گرنكترین فاكتەرێن پاراستنا ساخلەمیا دەروونی: 1_دڤێت مرۆڤ ئاگەه ژ شێوازێن ژیانا خۆ هەبت و هەڤسەنگیەكێ دناڤبەرا هەموو لایەنێ وی دا چێكت،چنكو هزرو دەروون و لەشێ مرۆڤی پێكڤەگرێداینە و كارتێكرنێ لسەر ئێك دكن،2_ هەبوونا پەیوەندیێن جڤاكی یێن باش دبنە ئەگەرێ خۆشكرنا ژیانا مرۆڤی و دەروونێ مرۆڤی ئارام دكت،مرۆڤ بوونەوەرەكی جڤاكی یە پێتڤیا وی ب جڤاكی هەیە،3_ هەبوونا كەسەكی گرنگ دژیانا مرۆڤی دا كو بكارت هەردەم پشتەڤانیا مرۆڤی بكت و هەروەسا نهێنیێن مرۆڤی بپارێزت،4_ ل خۆ تێبگەهە و خۆ قەبوول بكە،دانپێدانێ ب خالێن بهێز و لاواز یێن خۆ بكە و ب پێشبینیەكا گونجایی ئارمانجەكێ دیاربكە كو تە شیانێن جێبەجێكرنا وێ هەبن،هاڤێتنا پێنگاڤا بۆ چارەسەكرنا ئاریشان ب رێیێن گونجای،هەروەسا ژ فاكتەرێن كارتێكرنێ لسەر ساخلەمیا دەروونیا مرۆڤی دكن:1_ فاكتەرێن تایبەت یێن كەسی وەك(توخم زكماكی یان كو بۆ ماوەی) ژی ،رەگەز، بارێ ساخلەمیێ،ئاستێ خوندەواریێ و بارێ ئابووری،2_ئاستێ خزمەتكاری یێ ساخلەمیێ هەبوونا خزمەتكاریێن پێتڤی دهەموو بوارێن خۆپاراستنێ و چارەسەریێ و راهێنانێ دا،3_فاكتەرێن ژینگەهێ وەكو ئاڤ و هەوا و جیێ ئاكنجیبوونێ و هەروەسا جیێ كاركرنێ،4_فاكتەرێن رەفتاری(سلوكی) ئەو رەفتارێن گرێدایی مرۆڤی دڤێت دساخلەم بن وەك خوارنا ساخلەم و نڤستنا پێتڤی،نەكێشانا جگاران و نەڤەخوارنا ماددێن كحولی.
تُتاح هذه الصورة أيضا في: کوردی
