شنگال،رۆندك دلۆپ دلۆپ ژ تەرا تێن بارین
چنار شمو قاسم 
هەردەم ئێزدی بوونە گوریكەرێن كوردستانێ هەر ژ سەردەمێن كەڤن و هەتا نهۆ،بەلێ هەر ئێزدیان دەست ژ بیر و باوەر و ئاخا خۆ بەرنەدایە،لەما پشتی ئەو كۆمكوژیا بسەر شنگالێ دا هاتی ژ ئالیێ تیرۆرستێن داعش ڤە ل رۆژا(3/8/2014)ێ و ئەو كچ و ژن و زارۆك و زەلام و پیر و كال هاتنە گرتن و كوشتن و دەربەدەركرن و یێن مای بوونە ئاوارە لسەر ئاخا هەرێما كوردستانێ و هەتا نهۆ بۆ ماوێ چار سالانە لبن چادرێن بێ سار و گەرم و كێمترین خزمەتكاری دژین،وێ ئۆمێدێ دخوازن كو جارك دن بزڤرنە سەرجی و وارێن خۆ ڤە.
ئیرۆ پتر ژ دوو هەزار كەسا ژ كچ و ژن و زارۆك و پیر كالا هاتنە رزگاركرن لێ مخابن ئێدی رێژەیەكا كێم ژ سالێن بۆری تێن رزگاركرن و جیێ داخێ یە كو پتریا وان جیێن كو د دەستێن تیرۆرستین داعش دا هاتنە كۆنترۆلكرن لێ هیچ شوونوارێن خەلكێ شنگالێ یێ دیار نینە،ئەڤ كەسێن هاتینە رزگاركرن ژی هێشتا ژیانا وان و بارێ وان یێ ئابووری و یێ دەروونی یێ ئارام نینە و هەردەم ب هیڤی نە كو جارەك دن خێزانا وان ل وان كۆم بت،ئیرۆ مە ب هەزاران چیرۆكێن تراژیدی هەنە كو تەڤ خەلكی بڤێ تاوانا هۆڤانە هایدار بكن و بكن پشتەڤان ژبۆ بدەستڤە ئینانا مافێن هەر كەسێ تووشی زۆری و قوتانێ و سكسی بووین،ژنا ئاوارە بتنێ هیڤیا وێ ئەوە بدلەكی خۆش خوارنێ ئامادە بكت،بەلێ ئاوارەیێ و چادرێ وەسا دەروونێ وێ تێكدایە ئێدی هەست ب بەرپرسیاریا خۆ نەكت، زارۆك ژبەر گەرما هاڤینێ و زڤستانا سار و دبن وان چادران دە هیستر خۆ ل چاڤان ناگرن و مینا دلۆپێن بارانێ و خۆدانا هاڤینێ لسەر چاڤێن وان دلۆپ دلۆپ دبارن،زەلام ژی ژبەر نەبوونا كاری و دابینكرنا پێتڤیێن خێزانێ دەست لبن روویێ ویە هزر دسبەی و پاشەرۆژا نەدیار دكت،كچ و كور ژی بابێ خۆ ب هیڤی دكن كو ئەو دكارن خێزانێ خودان بكن قەستا كارێ رۆژانە یێ كریكاریێ دكن و دەست ژ خواندنگەهێ بەرددەن،ژبەركو یێن ژ وان مەزنتر گەلەك زەحمەت ب خووندنێ ڤە بۆراندی لێ ل هیچ كولیژ و پەیمانگەهەكێ نە هاتنە وەرگرتن ژبەركو حكومەت خەلكێ ئاوارە و نە ئاوارە ب یەك رێزێ هژمار دكت.
ئەم هیڤی دكن كو حكومەت ب رژدی ل چارەسەریەكا بلەز بگەرت ژبۆ دەستپێكرنا ئاڤەدانكرنا شنگالێ ،ئەڤە چار سال بۆرین هیچ پێنگاڤەك ژبۆ ئاڤەدانكرنا شنگالێ نە هاتیە دان ئەرێ هەتا كەنگی خەلكێ شنگالێ دێ وەسا ب رەزالەت ژیت.
تُتاح هذه الصورة أيضا في: کوردی
