ژ كەلەپۆرێ باب و كالا.. تواف و توافیك
ئلیاس نەعمۆ خەتاری
هەر مللەتەك هەبت ب داب ونەریتێن خۆ دیاردبت وهەر مللەتەكی مێژوویا خۆ هەیە وهەلبەت گەلەك ب مێژوویا خۆ سەربلندە،لەوما ئەم مللەتێ ئێزدی ب جەژن وئەرەفات وتواف وجەژن وعلمێ باب چاكێن مە ئوو خاسین مە بۆ مە نڤیسی،داب و نەریتێن ئێزدیاتیێ گەلەك دكەڤنن هەر دیسان رێورەسمێن ئایینی ئێت سەردەمێن بەرێ و كەڤناتیا ڤان جەژن و تواف وهەلكەفت و جەژن وێ چەندێ دیاردكت كو ئایینێ ئێزدیاتیێ ئاینەكی گەلەكی كەڤن و دێرینە كەڤناتیا وی دزڤرتە دەستپێكا ئافراندنا كنیاتێ وجەژنا سەرسالێ باشترین بەلگەنامەیە بۆ ڤێ چەندێ.
دڤێ جارێ دا ژ كەلەپۆرێ باب وكالا ئەم دێ كەینە بەحسێ تواف و توافیكا لسەر وی دەمی كا چاوا بوو خۆ ئامادەدكرن و رێورەسمێن وان چاوا برێڤە دچۆن و چێدكرن،تواف هەلكەفتێن خاس وباب چاكێن مە ئێزدیانە پشتی جەژنا سەرسالێ ل هەموو گوندێن ئێزدیان دەست پێ دكن ب رێورەسمێن تایبەت و توافیك ورێزكرنا قەول وبەیت وقەسیدێن ئۆلی ئەو كەسێن ژ گوندێن دی دئێنە وی گوندی ئەوێ تواف لێ دبێژنێ توافیك ئانكو مێڤانێن توافێ،بەری سەقایێ توافێ دەست پێكربا ب هەیامەكێ ئانكو پشتی سەرما و سر وسەقەم خلاسبا ل پێشیا توافا دێ خەلك رابانە ب سپیكرنا مالا وخانیان هەلبەت زۆربەیا مالێن بەرێ ب ئاخێ د ئاڤاكری بوون دێ چۆبانە پشتا گوندان و ل دەوروبەرێن ب كەند وگرك وچیا ب مەرەما راكرنا ئاخە سپیكێ ژبۆ سپیكرنا خانیان و دێ ئەوو ئاخ ب ئاڤێ شێلابانە و ل جیێ بۆیاغێ بكارئینابا وب پارچێن بەرۆك وكنچكان ژۆرێن خانیان ودۆرماندۆری دەرگەهان سپیكربان دیسان دێ گێچ ئینابا بۆ قەسرێن گێچ وبەری،نائێتە ژبیركرن ل وی سەردەمی قوب ونیشانگەهێن ئێزدیان دهاتنە سپیكرن وخەلك هەموو دچۆنە خێر وخلمەتێ بەلكو هەموو قوب ونیشانگەه ل سەردەمێن بەرێ ئاكنجی دبوون لێ ئیرۆ پتریا وان بووینە جوانە،پاشی خەلكێ سەربرێن خۆ حازردكرن وجلكێن جوان وتازە وەكی كومك ورەشك وكراس وشال وشەبك وشەروال ودەمیرە ولەوندی وكولاف وحازركرنا شرینیا وەكی قەسب وهژیر ومێویژ،ل دەمێ هاتنا توافیكا دێ پێكڤە چۆبانە ناڤ توافێ وزیارەتی بانە وپشكداریا خەلكێ گوندی كربانە ب كەیف وخۆشی لدۆر داب و نەریتێن ئێزدیاتیێ پاشی دێ هاتبانە مال بۆ نان خوارنا توافێ دگەل مالێ ئەگەر پاشی توافیك چۆبانە مالێن خۆ و هندەك شرینی ونان و تەنكێت توافێ دگەل خۆ دبرن بۆ وان كەسان ئەوێت نەهاتینە توافێ دگۆتنێ سماتا توافێ، هەر دیسان خەلكێ توافیك دبرنە مالا خۆ ل دەمێ ئێك مابا ل ناڤ توافێ بۆ نان خوارنا توافێ یان بۆ شەڤبێریێ ئەگەر مابانا ب شەڤ دێ باكربانێ وگۆتبانێ كەرەمكە ببە توافیكێ مە ، ژ رێورەسمێن توافێ ل وی دەمی سواركرنا پەری وگرێدانا لفین خاس وچاكا دگەل دهۆل وزرنایا و خەلك دێ چۆبانە خێرێ ب وەزنە وتەغارین گەنمی بوو و دگۆتن خێر یەژدلە.
ل رۆژێن توافا دەستوربوو بۆ شڤان و گاڤانا مۆلەتا توافێ وەرگرن ودگەل مالا خۆ توافێ بگێرن، ژنیشانێن توافێ دیلانێن مللی وەكی پشت وبەرێ و سێ لۆتكێ یان ڤەگێران و كولشینی وسێ پێچكی ودیلانا ملا،هەردیسان نائێنە ژبیركرن گۆڤەندكەرێن تواف كو ل هەر گوندەكی یان دەڤەرەكێ چەند كەسێن بناڤ ودەنگ هەبوون بەهلەوانێن گۆڤەند و دیلانا بوون وخۆشیەك دئێخستە سەر رەوشا توافێ.
تُتاح هذه الصورة أيضا في: کوردی
