دێ خۆ كەتە سولتانێ چەرخێ بیست وئێكێ
خالد خدر 
سەرۆك كۆمارێ توركیا رەجەب تەیب ئەردۆگان بۆ جارا دووێ پۆستێ سەرۆك كۆمار بدەست خۆڤەئینا ب رێژەیا(52) ژ سەدێ ل جڤاكەكی دابەش كری لناڤ خۆدا ، لگۆرەی ڤی سیستەمێ حوكمی یێ نهۆ سەرۆكێ توركیا دكەتە سولتانێ ئوسمانی ب ڤان دەستهەلاتێت بێ سنوور ،پرسیار ل ڤێدەرێ ؟ گەلۆ ئەڤ چەندا هەنێ ژبۆ خورتكرنا سەرۆكاتیا خۆیە یان ژی بۆ نەمانا وێ یە ب دارێ زۆرێ بەریا ماوێ سەرۆكاتیا وی ب داوی بێت،یان ژی دڤێت حوكمێ دكتاتۆریێ بكت لبن ناڤێ دیموكراسیێ ولدوڤ هندەك شرۆڤەكارێت سیاسی و رۆژنامەڤانی كو ئەردۆگانی دڤێت خۆ مینا سەرۆكێ رووسیا پۆتینی لێ بكت،هەرچاوا بە ئەردۆگان ڤێ جارێ ژی بسەركەفت سەرەرایی كو رێژا سەركەفتنا وی ل هەلبژارتنا نە تێپەری ژ(53) ژ سەدێ نەوەك سەرۆك نە ژی ل پەرلەمانی.
ئەگەر ئەم بەرێ خۆ بدەینە رێژا سەركەفتنێ دیار دبت ئەم همبەری جڤاكەكی زیندی و خودان رەوشەنبیریەكا سیاسی نە ل چارچۆڤێ دەستهەلاتا خۆ دا ئەردۆگانی ژی وەك هەڤكیڤێت خۆ یێن بەری خۆ ژ سەرۆك كۆمارێت توركیا نكاری وان پرسگرێكێت وەلاتێ خۆ چارەبكەتن،كو گەلەكن و ل پێشیا هەموویان دۆزا گەلێ كورد ل توركیا و ئەندامبوونا توركیا دناڤ ئێكەتیا ئەورۆپی و باشكرن وگەشەپێدانا ئابوورێ وەلاتی و گەلەكێن دی سەرەرای كو ئەردۆگانی خۆ دایە دیاركرن ژبۆ چارەكرنا دۆزا كوردی ل وی وەلاتی بەلێ وە دبێژن بناغێ هاتی ئاڤاكرن ژی هاتە هەلوەشاندن كو جارەكا دی شەر و پێكدادان چێبوون ل دەڤەر و باژێرێن كوردان دناڤبەرا لەشكەر هێزێت ئەولەهیا توركیا و چەكدارێت پەكەكێ ، ژئەنجامێ وێ چەندێ وێ سیاسەتا شاش یا هەردوو ئالیان زەرەر و زیانەكا مەزن گەهشتە خەلكێ مەیێ كورد و دەڤەرێت وان وێران بوون و گەلەك بێ گونەه بوونە قوربانی،هەر دیسان دڤی بیاڤی دا سیاسەتمەدارێت كوردان ژی ل توركیا شاشیێت خۆهەنە بۆ نموونە ل هەلبژارتنێت سالا(2015)ێ دەمێ پارتیا گەلێت دیموكراتی (هەدەپێ ) رێژەكا باش یا دەنگان بدەست خۆڤەئینایی و ئەگەر ژ بیرا من نەچۆبت هەدەپێ(80) كورسیێت پەرلەمانی مسۆگەر كربوون جارا ئێكێ هنگی پارتیا ئەردۆگانی دادپەروەری وگەشەپێدان (ئاكەپێ) داخواز هەڤپەیمانیێ ژ هەدەپێ كر ژبۆ پێكئینانا حكومەتێ ب مخابنی ڤە وان رەتكر و دەلیڤەكا باش ژدەست دان،چنكو وی دەمی هەدەپە یە ب هێز بوو و بەرۆڤاژی ئاكەپە نە مینا نهۆ یە بهێز بوو و هێشتا دەستوورێ وەلاتی ژی نەهاتبوو هەمواركرن.
پێتڤی بوو هەدەپێ ئەو دەلیڤە د بەرژەوەندا خۆ دا بكارئینابا و هەڤپەیمانی دگەل ئاكەپێ كربا نهۆ گەلەك تشت نە بڤی رەنگی بانە و هەروەسا دۆزا كوردی ژی دێ مفا ژ بەشداریا حكومەتێ كربا،چنكو چوو جاران ب شەری و زمانێ چەكی هیچ مللەتەك مافێ خۆ بدەستڤە نائینت بەلكو بەروڤاژی ب زمانێ دیالۆكێ و سیاسەتێ و ئاشتیێ دێ گەهتە مافێت خۆ یێن رەوا،ژئەنجامێ وێ چەندێ پتر ئەردۆگانی دەستهەلاتا خۆ سەپاند و دەستوور دبەرژەوەندا خۆدا هەمواركر ودێ خۆ كەتە سولتانێ چەرخێ بیست وئێكێ وزیانەكا مەزن ب دۆزا كوردی كت و چەندین پلەیا پاشڤە هات،چاوا بت نهۆ توركیا دچەندین قەیرانان دا دەبازدبت مینا داكەفتنا بەهایێ دراڤێ وێ و پەیوەندیێن وان دگەل ئێكەتیا ئەورۆپی و كۆما گۆلەن و مایتێكرنێت وێ دكاروبارێت عێراق وسووریا دا و وهەروەسا دەستێوەردانا وێ یا بەرچاڤ دكاروبارێت وەلاتێن كەنداڤی دا و گرفتا قەتەرێ دا ب تایبەتی و زێدەباری دۆزا كوردی وشەرێ وێ دگەل گەریلایێت پەكەكێ.
تُتاح هذه الصورة أيضا في: کوردی
