جوداهی دناڤبەرا رەش وسپی دا
خالد ئەحمەد بادی
پشكا دووێ 
قۆناغ بۆ قۆناغێ رەوش بەرەف باشتر لێ هات وپشتی قۆناغێن شۆرەشێن كوردان ب داوی هاتین ب تایبەت شۆرەشا ئیلون وگولانێ وقۆناغا شۆرەشەكا نووی یا مودێرن یا پێشكەفتی دەست پێكر ب هیمەتا پێشمەرگە وجەماوەر وخەباتكەرێن كوردستانێ و ب یەك جاری دوژمن را تەقاند ونەهێلا وژ قۆناغا چیایی وشەرێ پارتیزانی كەفتنە دقۆناغا حوكمرانی ومەدەنیەتێ دا،پشتی جەنگا دناڤبەرا رژێما ئیرانێ وعێراقێ دا ب داوی هاتی ئێكسەر رژێما عێراقێ بریارا ڤەگوهاستنا هەمی هێزێن خۆ دەركر ئەوێن ل بەروكێن شەرێ ئیرانێ بۆ كوردستانێ و هەوێن ئەنفالان دژی مللەتێ كورد یێن ئێزدی وموسلمان ومەسیحی وسنی وشیعی وسابئە ومەندائی ل كوردستانا عێراقێ دەست پێكرن ژلایێ رژێما بەعسا ژناڤچۆیی ڤە ل سالا (1988)ێ.
دڤان هەوێن هۆڤانە دا هێرشێن مەزن وبەرفرەه سوپایێ عێراقێ یێ چەكدار ب هەمی جۆرێن چەكێ گران و نوی وپێشكەفتی وب تكنلۆژیایەكا لەشكەری یا سەردەمیانە هێرشێن قركرنێ ژ چەندین ئالی ودەڤەرا ڤە كرنە سەر خەلكێ كوردستانێ یێ بێ گونەه وسڤیل وستەم دیتی ودڤان هێرشێن مەزن وبەرفرەه دا سوپایێ عێراقێ ب هەمی پێكهاتەیێن خۆ ڤە یێن جۆراوجۆر كو پێك دهاتن ژ سوپا وچەتەیێن كرێ گرتی وهێزێن ئاسمانی وهێزێن تۆپخانێ وهێزێن تانك وزریپۆشا سەرەدەریەكا توند وهۆڤانە ودویر ژمرۆڤاتیێ دگەل مللەتێ كورد ئەنجام ددا ودڤان هێرشا دا (4500) گوند سۆتن ومزگەفت ودێر و كەنیسە وجهێن ئایینی یێن ئێزدیان خراب كرن هەرفاندن وب سەدان وب دەهان مەلا وفەقی وقەوال وقەشە وزەلامێن هەمی ئایینان ل كوردستانێ گرتن وشەهیدكرن وب سەدان كانی هشك كرن وب هزارەها چەم وبیستان پویچ كرن وژناڤبرن وب هزارەها سەرێن پەزو چێلا كوشتن وتالان كرن وب هزارەها خەلكێ بێ گونەه وسڤیل وسادە كوشتن وگرتن وزیندان كرن وب سەدان هزار دۆنەمێن ئەردێ چیایی ودارستانان هاتنە شەوتاندن وژناڤبرن چەندی بنڤێسین ئەو زولم وستەما هولاكو وهیتلەرێ بەغدایێ بسەر مللەتێ كورد سەپاندی هەر بداوی ناهێت،وەسا دیمەن دهاتنە پێش چاڤ وهزر دهاتنە كرن كوئەڤ سوپایێ رژێما گۆربەگۆرا بەعسی یان یێ هێرشێ دكەنە سەر مللەتێن كافرودوژمن وبیانی یا.
خەلكێ بێ گونەه وسادە وسڤیل چ رێكێن شەروبەرگریێ نەمان چونكە بریارا رژێمێ نەمان ونەهێلانا مللەتێ كورد بوو ونەشیان بەرسینگێ ڤان هێزێن زەبەلاح بگرن و ب بریارا سەركردایەتیا كوردی هەمی خەلكێ ئاكنجیێن دەڤەرێن ئازاد بەرەف سنوورێن ئیرانێ وتوركیا ڤە كەفتنە رێ ولبن هێرشێن توپ وفرۆكا وچەكێ كیمیاوی یێ قەدەغەكری ل سەرانسەری جیهانێ،پتریا خەلكی گەهشتنە سەر سنوورێن دەولەتێن دۆرماندۆر یێن دی ژی نەشیان خۆ قورتال بكەن وكەفتنە ددەستێن زرتەك وزەبانیێن رژێما بەعسا ژناڤچۆیی ولدویڤ حەزێن خۆ ژناڤبرن وڤاڤارتن دگەل مللەتێ كورد هاتنە كرن وئەڤێن شیان خۆ قورتال بكەن بەرەف سنوورێن ئیران وتوركیا ڤە چۆن و ل كەمپێن ئاوارەیێ دژیانەكا سەخت ودژوار دا دژیان كو سادەترین پێتڤی یێن ژیانێ بۆ وان ئاوارەیان نەدهاتنە دابین كرن و هەروەسا دبێ بەهربوون ژ كێمترین مافێن هاوەلاتینیێ لناڤ كەمپێن ئاوارەیێ دا.
تُتاح هذه الصورة أيضا في: کوردی
