مۆرالا خەلكێ كوردستانێ هێشتا یا ب گاڤ دەمێن جاران ب هێزە
جوان بەرواری 
سیاسەت، مینا شەرێن توندو دژوارە ل هەر دەرێ بت سیاسەت دكارت كارێ خۆ ل گۆر بەرژەوەندیا خۆ پراكتیزە بكت،بەلێ ئەوا د واقعیەتا سیاسەتێ دە دیاردبت، پێتڤیە لگور بەرژەوەندیێن تاك و جڤاكی ب گشتی بت،داكو ببتە داهێنان بۆ تەڤاهیا خێرو بەرەكەتا مللەتان،چنكو سیاسەت گەلی چێدكت و گەل ژی سیاسەتێ چێدكت.
ل ڤێرە دیروك سیاسەتێ و شارستانیەتێ دەتە ئاڤاكرن، ئەگەر بنێرین دیرۆكا مە كوردان چاوان هاتبوو نڤیساندن، وەسان دهات خووندن لەورا ژی بەردەوام گەلێ كورد كەفتیە بەر داسا تراژیدیان،گەلۆ مە كوردان جارەكێ پرسا ئەزموونێَن سالێن دیرۆكێ دایە خووندن كا شاشیا مە چ بوویە؟ ب مەبەستا من راستە بەردەوام ئەم كورد ب ناڤێ قەهرەمانیێ هاتینە ناساندن، لێ بەلێ ئەم ب وێ قەهرەمانیێ نكاریە روحا ئێكگرتنێ ب پارێزین،چنكو كوردان دیرۆكا خۆ ب شێوەیێ پراكتیزا هزری نەدایە خووندن،لەورا ئەم بەردەوام توشی كارەسات و تراژیدیان بووینە،ئەها ئەڤەیە كو بەرێ مە د دەت وێ یەكێ ئەم پراكتیزا حكومێن خوۆ یێن سیاسی لگۆر تراژیدیێن چووی دناڤ خەلكی دە بەلاڤ بكەین، لەورا ئێدی روویێ راستیا سیاسەتا هەی ل جەم تاكێ كورد بوویە هێمایێ كارانەكرنێ نە خولقاندنا پەیرەوێن سیاسی و ئەكادیمی دهزرا جڤاك و تاكی دە،ل ڤێرە دەما پرسەكێ هات گەلۆ لگۆر سیاسەتا هەی دماوێ بیست شەش سالان دا، تاكێ كورد چەند كاریە ب هزرو هەدارا خۆ خۆ لبەر هەر كێشە و گرفتەكێ بگرت؟ دیارە تاك ل هەر دەرو جی بت بەردەوام پێشەنگیا وێ یەكێ دكت، كو خۆ لبەر زولم نەهەماتیا دوژمنێن سەرەدەست بگرت،چنكو دیرۆكا كوردان ب درێژاهیا سالان تووشی دەردەسەری، ئەنفال، كیمیا باران، تالانكرن، گرتن و كوشتن و زولم زۆرداریێ بە دبەختیێ هاتیە،لەورا خەلكێ كوردستانێ ژی بەردەوام كاریە خۆ لبەر لاپەرێن رەش و هەر توندو تیژیەكێ بگرت.
ژلایەكێ دنڤە قەیرانێن ئابووری، دارایی رەوشا خەلكێ هەرێما كوردستانێ بەرەف ئاوایەكێ نالەبارو سەخت دا بریە، ژبەركو تاكێ كورد ئێدی گەهشتیە وێ باوەرێ كو نكارت، ژیانا خۆ یا رۆژانە بەردەوامیێ ب دەتێ هەم ژ ئالیێ مادی ڤە و هەم ژ ئالیێ مەعنەوی ڤە،رەنگە ئەڤە ژی بوویە ئەگەرێ زۆربەیا سەدەمێن نەچاڤەرێكری د هزرو ئەقلێ تاكێ كورد دە، چنكو ئەوا ئیرۆ دناڤا جڤاكێ كوردی دا هلدای بوویە بەشەك ژناڤبرنا سایكولۆژییا تاكێ كورد،لەورا ژی ئێدی خەلكێ كوردستانی ل دووڤ كاودانێن نهۆ دە بارێ خۆ بەر ب گرانیێ دە بریە و هێزا خۆ كریە د چارچووڤێ بێ هیڤیبوون و لاوازیێ دە،كەواتە قەیرانێن جڤاكی سیاسی ل هەر وەلاتەكێ روودەن، لێ هەر ئێك ژ وان ب شێوەیەكی یە، بەلێ دوەلاتێن جیهانێ دا قەیرانێن هەرئێك ژوان نێزیكیەك بۆ ئێك هەیە، ئەو ژی ژبەر پێكڤە گرێدانا یاسایەكا سەروەرانە،چنكو دەستهەلاتێن وان گرنگیەكا زۆر ددەنە پرەنسیپێن یاسایی،هەروەسا موكومكرنا پەیوەندیێن جڤاكی پێكڤەژیانێ،لەورا ئەڤێ چەندێ ژی سەدەمێن خۆ هەنە كو پێكڤە بێنە گرێدان پتریا وان ژی بۆ لایەنێن پوزەتیڤ دچن،سەبارەت وان قەیرانێن سیاسی ئەوێن ئیرۆ دوەلات و جڤاكێ مە دا رووددەن ژ ئەگەرێ نەبوونا ئێك رێزیێ ئاشتی تەڤای ئێك هەلویستبوون و نە تەخمینكرنا وان پێكهات و پێشهاتێن لایەنێن سیاسی یە، ژئالیەكێ دنڤە باندۆرا شەرێ داعش حەشدا شەعبی و كێشەیێن گرێدایی حكومەتا عێراقێ نەچارەسەركرنا قەیرانێن پێش وەخت د دەمەكێ نەگونجای دا كاریكەریەكا دژوار كرە سەر رەوشا سیاسی،ئەڤێ چەندێ ژی سێمایێ فشارا تیرۆرا دەرونی جڤاك، گەهاندە وێ قەناعەتێ كو ئارمانج ژێ ئەوە حەزێن گەلێ كوردستانێ ب هەموو پێكهاتان ڤە هاتنە پشتگوهخستن، لەورا ژی هزرا خەلكێ بەرەف بێ هیڤیێ دا چوو.
سەرەرای ڤان هەموو ئاستەنگان ژی، مۆرالا خەلكێ كوردستانێ هێشتا یا ب گاڤ دەمێن جاران دا ب هێزە،چنكو گەلێ كورد هەردەم كاریە خۆ لبەر سینگێ هەر كاودانەكی دا بگرت ب هیڤیا وەشان و نەتەوە باوەریا خۆ دا پاش دا نە چوویە،هەتا دكاودانێت سەخت دا ژی تاكێ كورد، بوویە هێمایێ شەنگستەبوونا گەل و خاكێ خۆ یێ پیرۆز و ژبەر ئەو هزرا نەتەوەبوونێ و وەلات پارێزی كاری هەدارا بێن فرەهیا خۆ لسەر هەر دژواریەكێ دا بكێشت،ئەڤجا پەیاما من ژبۆ خەلكێ كوردستانێ ئەوە هەردەم مە كوردا كاریە خۆ لسەر لنگێن خۆ بگرین و هەتا د قادێن شەران دە ژی مە بەرگری یاكری و تەنازل بۆ هیچ دوژمنەكی نەكریە و دتەنگاڤیان دا ژی مە هەر خۆ راگرتیە،لەورا پێتڤیە ئەم خۆ لبەر ڤێ تەنگاڤیێ ژی دە بگرین، چنكو بەندەك كوردی هەیە دبێژن(بەندكێ تەنگاڤیا یێ كورتە) ئەوژی دێ بۆرت وەكو هەر كاودانەكا چووی،لەورا رۆلێ تاكێ كورد بلا ببتە رۆلێ بەرخودان و هێزو خۆراگریێ ل هەمبەر ڤێ دەلیڤەیا بەرتەنگ دە.
تُتاح هذه الصورة أيضا في: کوردی
