مه‌سروور بارزانى ل دهۆكێ: هه‌ر كه‌سێ به‌لگه ل دۆر به‌رپرسان هه‌بن ده‌رگه‌هێ من ڤه‌كریه
گاڤ نیوز – تایبه‌ت
سه‌رۆكێ حكومه‌تا هه‌رێما كوردستانێ، ئه‌ڤرۆ د كۆمبوونا ل گه‌ل به‌رپرسێن حزبى و حكومى دا راگه‌هاند: هه‌ر كه‌سێ به‌لگه ل دۆر به‌رپرسان هه‌بن ده‌رگه‌هێ وى ڤه‌كریه و دێ پێرابوون هه‌بن.
ل گۆره‌ى زانیاریێن گاڤ نیوز، دو رۆژن مه‌سروور بارزانى سه‌رۆكێ حكومه‌تا هه‌رێما كوردستانێ ل دهۆكێ یه و چه‌ندین كۆمبوونێن نهێنى و گشتى ل دۆر كێشه و ره‌وشا خه‌لكێ پارێزگه‌هێ ل گه‌ل كه‌سایه‌تى و رێڤه‌به‌ر و به‌رپرسێن حزبى، حكومى و ئێمناهى یێن دهۆكێ كرینه، ئه‌ڤرۆ ژى جودا ل گه‌ل رۆژنامه‌ڤان و چالاكڤان و سه‌ندیكا و كۆمه‌له و كه‌سایه‌تى و به‌رپرس و كادرێن حزبى و حكومى كۆمبوویه.
ژێده‌ره‌كێ پشكدار د كۆمبوونا سه‌رۆكێ حكومه‌تێ ل گه‌ل كادر و به‌رپرسێن پارتى دا راگه‌هاند: مه‌سروور بارزانى داخواز ژ به‌رپرسێن حزبى و حكومى یێن دهۆكێ كر، پتر بچنه ناڤ خه‌لكى و خۆ ل كێشه‌یێن وان بكه‌نه خودان و هه‌ر گازنده و كێشه‌یه‌كا خه‌لكى هه‌بیت دیڤچوونێ بۆ بكه‌ن و چاره‌بكه‌ن.
وى ژێده‌رى گۆت ژى: سه‌رۆكێ حكومه‌تێ ب ئاشكرایى گۆته به‌رپرسێن حزبى و حكومى: ده‌رگه‌هێ وى دى یێ ڤه‌كرى بیت و هه‌ر كه‌سێ به‌لگه ل دۆر به‌رپرسان هه‌بن ئه‌و دێ وه‌رگریت و سۆز ژى دا دیڤچوونا هه‌مى به‌لگه و گۆتنێن ل دۆر به‌رپرسان بكه‌ت و پێرابوونان وه‌ربگریت.
تُتاح هذه الصورة أيضا في: کوردی
