شه‌رق ئه‌لئه‌وسه‌ت: ئیران و مالكی رێ بۆ شه‌رێ كوردان ل شنگالێ خوه‌ش كرییه
WAAR-دهۆك:
رۆژنامه‌یا شه‌رق ئه‌لئه‌وسه‌ت ئاگه‌هی ل سه‌ر شه‌رێ چه‌ند رۆژێن بۆری د ناڤبه‌را پێشمه‌رگه‌ی رۆژ و هێزه‌كا سه‌ر ب په‌كه‌كێ ڤه ل ده‌ردورێن شنگالێ به‌لاڤكرینه و دایه زانین: به‌ریا ده‌ستپێكرنا شه‌ری، شیره‌تكارێن ئیرانی سه‌ره‌دانا بنگه‌هێن وێ هێزا سه‌ر ب په‌كه‌كێ ڤه كریه.
رۆژنامه‌یا شه‌رق ئه‌لئه‌وسه‌ت یا له‌نده‌نی ژ زارێ سه‌ركرده‌یه‌كێ حزبا ده‌عوه ئه‌وا نووری مالكی سه‌ركردایه‌تیا وێ دكه‌ت، به‌لاڤكریه: یه‌كینه‌یێن پاراستنا شنگالێ یا سه‌ر ب په‌كه‌كێ ڤه ژ ئالیێ نووری مالكی و ب هه‌ماهه‌نگیا پاسدارێن ئیرانێ هاتیه دامه‌زراندن و ئارمانجا سه‌ره‌كی ژ دامه‌زراندنا وێ هێزێ، گه‌ره‌نتیكرنا كۆنترۆلا حه‌شدا شه‌عبی یه ل سه‌ر رێیا د ناڤبه‌را ئیراق و سووریێ دا.
ئه‌وی ژێده‌رێ نه‌ڤیای ناڤێ خوه ئاشكه‌را بكه‌ت، گۆت ژی: ئیرانێ چه‌ندین جاران ب فه‌رمی داخواز ژ هه‌رێمێ كریه رێیا هشكانی یا ئیراقێ ب سووریێ ژ بۆ گه‌هاندنا چه‌كی بۆ هێزێن خوه ل سووریێ بكاربینیت، لێ هه‌رێمێ ئه‌و داخوازیه ب ته‌مامی ره‌تكریه.
دا زانین ژی: ئیران ناخوازیت پێشمه‌رگه كۆنترۆلێ ل سه‌ر وێ رێیا ستراتیژی بكه‌ت، له‌ورا هه‌لكرنا شه‌ری د ناڤبه‌را هێزێن كوردی دا، دێ رێ ل هه‌مبه‌ری حه‌شدا شه‌عبی خوه‌شكه‌ت تا كۆنترۆلێ ل سه‌ر وێ ده‌ڤه‌رێ بكه‌ت و ده‌ستهه‌لاتا ئیرانێ ل ده‌ڤه‌رێ به‌رفره‌هتر لێ بكه‌ت، وه‌ك پێنگاڤه‌ك ژ بۆ رێگریا سه‌رخوه‌بوونا كوردستانێ، ئه‌وا ئیران ب هه‌می رێیان ل دژی د راوه‌ستیت.
رۆژنامه‌یا شه‌رق ئه‌لئه‌وسه‌ت به‌لاڤكری ژی: پشتی چه‌ندین بزاڤان ئه‌و شیان داخویانیان ژ چه‌ند شه‌رڤانێن هێزێن یه‌كینه‌یێن پاراستنا شنگالێ وه‌ربگرن و ب گۆتنا وان، ئه‌فسه‌رێن پاسدارێن ئیرانێ لگه‌ل فه‌رمانده‌یێن حه‌شدا شه‌عبی به‌رده‌وام سه‌ره‌دانا بنگه‌هێن وان دكه‌ن و به‌ریا ده‌ستپێكرنا شه‌ری ئه‌وانا سه‌ره‌دان كریه.
تُتاح هذه الصورة أيضا في: کوردی
