بنگەهێ لالش رۆلەكێ مەزن دپێشڤەبرنا رەوشەنبیریا ئێزدیان دا گێرایە
تۆرا لالش:
ب هەلكەفتا سالڤەگەرا دامەزراندنا بنگەهێ لالش یێ رەوشەنبیری و جڤاكی ل دهۆكێ،تەخ و چینێن جودا یێن جڤاكی ددەن خویاكرن كو بنگەهێ لالش رۆلەكێ مەزن د پێشڤەبرنا رەوشەنبیریا گشتی یا كوردێن ئێزدی و پێكڤەژیانێ ل كوردستانێ هەبوویە،هەروەسا كاریە پەیاما ئێزدیان بگەهینن جیهانێ.
رەغد غانم،ئاوارەیەكێ شنگالێ یە دیاركر،ژ دەستپێكا ئاوارەبوونا خەلكێ شنگالێ ل(3/8/2014)ێ و هەتا نهۆ بنگەهێ لالش خەلكێ شنگالێ بتنێ نەهێلایە و هەردەم لدووڤ خواست و داخوازیێن وان هاتیە و بەردەوام هاریكاریان پێشكێشی ئاوارەیێن ئێزدی ل كەمپێن سنوورێ پارێزگەها دهۆكێ دكت،هەروەسا هەیڤانە هاریكاریا پێشكێشی خێزانێن هەژار و كەسێن كێم ئەندام و رزگاربویێن دەستێ تیرۆستێن داعشێ دكت.
هەروەسا رەیان خەلەف قوتابیەكی ئێزدی یە ل زانكۆیا دهۆكێ یە بۆ رۆژناما دەنگێ لالش دبێژت:بنگەهێ لالش ب هەموو تایێن خۆ ڤە لسەر هاریكاریكرنا قوتابیان بەردەوامە و هەیڤانە هاریكاریێن دارایی پێشكێشی قوتابیان دكت،بڤان جۆرە هاریكاریا ئیرۆ ب سەدان قوتابی درێژیێ ب خووندنا خۆ ددەن،ژلایەكێ دی ڤە بنگەهی ب هەزاران قوتابیێن ئێزدی ل كولیژ و پەیمانگەهێن عێراقێ و ب تایبەت یێن مووسلێ بۆ كولیژ و پەیمانگەهێن هەرێما كوردستانێ ڤەگوهاستینە.
ژلایەكێ دی ڤە رۆژنامەڤان فەیسەل عەلی بۆ رۆژناما دەنگێ لالش گۆت:بنگەهێ لالش رۆلەكێ مەزن هەبوویە دناڤ جڤاكێ ئێزدی دا،پشتی هێرشا تیرۆرستێن داعشێ بۆ سەر شنگالێ و ئاوارەبوونا ب سەدان هەزار كەسان ژ ئێزدیان بۆ دەڤەرێن ئارامێن هەرێما كوردستانێ ب هیچ رەنگەكی بنگەهێ لالش خۆ ژ خەلكێ خۆ دوورنەكریە و ئێكسەر ل ناڤ كەمپان هاریكاری و خزمەتەكا مەزن پێشكێشی ئاواران كر،هەروەسا كاری پەیاما راست و دورست یا خەلكێ شنگالێ بگەهینن جیێن پەیوەندیدار لسەر ئاستێ هەرێما كوردستانێ و عێراقێ و جڤاكێ نێڤ دەولەتی.
ژبال خۆڤە نڤیسەر ئەدریس زۆزانی بۆ رۆژناما دەنگێ لالش دیاركر،بنگەهێ لالش رۆلەكێ مەزن د پێشڤەبرنا نڤیسینا پەرتۆكێ و رەوشەنبیریا گشتی یا كوردێن ئێزدی دا هەبوویە و هەموو گاڤا لدووڤ خواست و داخوازیێن نڤیسەران بوویە،ب تایبەت پشتی كۆمەلكۆژیا شنگالێ گەلەك نڤیسەران یێن ئێزدی و نە ئێزدی گەلەك پەرتۆك لدۆر جینۆسایدێ نڤیسین،و بنگەهێ لالش رۆلەكێ مەزن هەبوویە دنڤیسینا پەرتۆكان و هاریكاریكرنا نڤیسەرێن ئێزدی دا و خواستیە ب رێیا نڤیسینا پەرتۆكان پەیاما كوردێن ئێزدی بگەهینن جیهانێ و هەتا نهۆ ژی لسەر ڤێ خزمەتێ د بەردەوامن،ئەم دخوازن هێشتا بتر پشتەڤان بن و پلانێن مەزنتر هەبن ژبۆ پێشخستنا نڤیسینا پەرتۆكێ.
قەولبێژ و ئۆلدارێ ئێزدی خەواجا خەتاری خویاكر،دبیاڤێ خورتكرنا گیانێ پێكڤەژیانێ دا بنگەهێ لالش رۆلەكێ كارا هەیە دناڤبەرا جڤاكێ ئێزدی و مەسیحی و موسلمان و هەموو پێكهاتێن دی ل هەرێما كوردستانێ،چەندین جاران بنگەهێ لالش سمینار و ۆركشوپ دەربارەی خورتكرنا پێكڤەژیانێ ل دارخستینە و ئەڤ پێنگاڤێن بنگەهی د تەمەنێ خۆ دا هاڤێتین جیێ سەربلندی و شانازیێ نە بۆ مە هەموویان،دیسان بزاڤێن بنگەهێ لالش بۆ پێشڤەبرنا پێكڤەژیانێ ل كوردستانێ بلند دنرخینم،ژلایەكێ دی ڤە داخوازێ ژ گشت سەرۆكێن تایی و نڤسینگەهێن بنگەهێ لالش دكەین بتر رۆلێ خۆ دناڤ جڤاكێ ئێزدی و كوردستانێ دا ببینن داكو بتر كارێ وان یێ دیار بت،هەر چەندە تەخسیری نەكرینە ل هەموو هەلكەفت و جەژن و توافان ل سەرانسەری دەڤەرێن ئێزدیان بنگەهێ لالش هەردەم پشتەڤان بوویە و ئەڤ بیرەوەری و جەژن و سەرسال ساخكرینە و هەموو گاڤا پشتەڤانیا كەسایەتیێن ئایینی یێن ئێزدیان بووینە.
تُتاح هذه الصورة أيضا في: کوردی
